'കടലിളക്കി പട പൊരുതണം...'; രഹസ്യ വിവരത്തിന്റെ അടിസ്ഥാനത്തിൽ പാഞ്ഞെത്തി എക്സൈസ്; പത്തനംതിട്ടയിൽ കഞ്ചാവുമായി ആർഎസ്എസ് പ്രവർത്തകൻ പിടിയിൽ

പത്തനംതിട്ട: അടൂർ ഇളമണ്ണൂരിൽ കഞ്ചാവുമായി ആർഎസ്എസ് പ്രാദേശിക നേതാവ് എക്സൈസ് സംഘത്തിന്റെ പിടിയിലായി. ജിതിൻ ചന്ദ്രൻ എന്നയാളെയാണ് 10 ഗ്രാം കഞ്ചാവുമായി അറസ്റ്റ് ചെയ്തത്. വിൽപ്പനയ്ക്കായി എത്തിച്ച കഞ്ചാവുമായി ഇളമണ്ണൂർ ഹൈസ്കൂൾ ജംഗ്ഷനിലെ ഫ്ലാറ്റിൽ നിന്നാണ് ഇയാളെ പിടികൂടിയത്.

ജിതിൻ കഞ്ചാവ് വിൽപ്പന നടത്തുന്നു എന്ന രഹസ്യ വിവരത്തെ തുടർന്നാണ് എക്സൈസ് സംഘം പരിശോധന നടത്തിയത്. ഏറെനാളായി പ്രതി എക്സൈസ് നിരീക്ഷണത്തിലായിരുന്നു. നാർക്കോട്ടിക് ഡ്രഗ്സ് ആൻഡ് സൈക്കോട്രോപിക് സബ്സ്റ്റൻസസ് (എൻഡിപിഎസ്) ആക്ട് പ്രകാരമാണ് ഇയാൾക്കെതിരെ കേസെടുത്ത് അറസ്റ്റ് ചെയ്തത്.

ജിതിന് കഞ്ചാവ് എത്തിച്ചു നൽകുന്നവരെക്കുറിച്ചും എക്സൈസ് അന്വേഷണം ആരംഭിച്ചിട്ടുണ്ട്. സംസ്ഥാന വ്യാപകമായി എക്സൈസ് നടത്തുന്ന പരിശോധനയുടെ ഭാഗമായാണ് ജിതിനെ പിടികൂടിയത്. കഞ്ചാവ് വിൽപ്പനക്കാരെ കണ്ടെത്താനുള്ള ഊർജിത ശ്രമങ്ങൾ തുടരുകയാണ്.