വീട്ടിൽ മദ്യപിച്ചെത്തി എപ്പോഴും ബഹളം; അമ്പലപ്പുഴയിൽ മകന്റെ മർദനമേറ്റ വീട്ടമ്മ മരിച്ചു; പിടിച്ചു മാറ്റാനെത്തിയ പിതാവിനെയും ആക്രമിച്ചു; പ്രതി റിമാൻഡിൽ

അമ്പലപ്പുഴ: മദ്യപിച്ചെത്തിയ മകന്റെ മർദനമേറ്റ് വീട്ടമ്മ അതി ദാരുണമായി മരിച്ചു. അമ്പലപ്പുഴയിലാണ് നാടിനെ നടുക്കിയ സംഭവം നടന്നത്. അമ്പലപ്പുഴ വടക്ക് പഞ്ചായത്തിൽ താമസിക്കുന്ന ആനി (55) ആണ് ഇന്ന് പുലർച്ചെ ആലപ്പുഴ മെഡിക്കൽ കോളേജ് ആശുപത്രിയിൽ മരിച്ചത്. ആനിയെ കഴിഞ്ഞ ഞായറാഴ്ചയാണ് നിർമ്മാണ തൊഴിലാളിയായ മകൻ ജോൺസൺ ജോയി (34) ക്രൂരമായി ആക്രമിച്ചത്. ആനിയെ മർദിക്കുന്നത് കണ്ട് പിടിച്ചു മാറ്റാനായി എത്തിയ പിതാവ് ജോയിച്ചനും മർദനമേറ്റിരുന്നു.

പരിക്കേറ്റ ഇരുവരും സമീപത്തെ പ്രാഥമികാരോഗ്യ കേന്ദ്രത്തിൽ ചികിത്സ തേടിയെങ്കിലും പിന്നീട് ആനിയെ ആലപ്പുഴ മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയായിരുന്നു. ജോൺസൺ മദ്യപിച്ചെത്തി സ്ഥിരം വഴക്കുണ്ടാക്കുന്ന ആളാണന്ന് നാട്ടുകാർ പറയുന്നത്. സംഭവത്തെ തുടർന്നുള്ള പരാതിയിൽ അമ്പലപ്പുഴ പൊലീസ് കേസെടുത്ത് ജോൺസണെ റിമാൻഡ് ചെയ്തു. വണ്ടാനം മെഡിക്കൽ കോളേജ് ആശുപത്രി മോർച്ചറിയിൽ പോസ്റ്റുമോർട്ടം നടത്തി മൃതദേഹം ബന്ധുക്കൾക്ക് വിട്ടു നൽകുകയും ചെയ്തു.