ഭാര്യ വീട്ടിലില്ലാത്ത സമയം നോക്കിവെച്ചു; പിന്നാലെ കിടപ്പുമുറിയിൽ കയറി 'വാ' പൊത്തിപിടിച്ച് ക്രൂരത; വര്ക്കലയിൽ അമ്മായിയമ്മയെ ബലാത്സംഗം ചെയ്യാൻ ശ്രമം; മരുമകനെ തപ്പി പോലീസ്
തിരുവനന്തപുരം: വർക്കലയിൽ 52 വയസ്സുകാരിയായ അമ്മായിയമ്മയെ ബലാത്സംഗം ചെയ്യാൻ ശ്രമിച്ച കേസിൽ ഒളിവിൽ പോയ മരുമകനായി പൊലീസ് തിരച്ചിൽ ഊർജിതമാക്കി. ഫെബ്രുവരി 18-നായിരുന്നു മനസാക്ഷിയെ ഞെട്ടിച്ച ഈ സംഭവം നടന്നത്. പരാതി നൽകി ദിവസങ്ങൾ പിന്നിട്ടിട്ടും പ്രതിയെ പിടികൂടാൻ വൈകിയതിനെതിരെ പ്രതിഷേധം ശക്തമായതോടെയാണ് വർക്കല പൊലീസ് അന്വേഷണം ശക്തമാക്കിയത്.
പ്രതിയുടെ ഭാര്യ വീട്ടിലില്ലാതിരുന്ന തക്കം നോക്കിയായിരുന്നു അക്രമം. കിടപ്പുമുറിയിൽ വിശ്രമിക്കുകയായിരുന്ന വീട്ടമ്മയെ പ്രതി കടന്നുപിടിക്കുകയും വായ് പൊത്തിപ്പിടിച്ച് ബലാത്സംഗത്തിന് ശ്രമിക്കുകയുമായിരുന്നു.
അതിക്രമത്തിൽ നിന്ന് ബഹളം വെച്ച് കുതറി മാറിയ വീട്ടമ്മ ഉടൻ തന്നെ ഓടി രക്ഷപ്പെടുകയും പോലീസിൽ പരാതി നൽകുകയും ചെയ്തു. പരാതി ലഭിച്ച ഉടൻ പോലീസ് കേസെടുത്തെങ്കിലും പ്രതിയെ പിടികൂടാൻ വൈകിയത് വലിയ വിമർശനങ്ങൾക്ക് ഇടയാക്കിയിരുന്നു. തുടക്കത്തിൽ അന്വേഷണം ഇഴഞ്ഞുനീങ്ങിയെങ്കിലും സംഭവം മാധ്യമശ്രദ്ധ നേടിയതോടെ പോലീസ് ഇപ്പോൾ പ്രതിക്കായി വിപുലമായ തിരച്ചിൽ ആരംഭിച്ചിരിക്കുകയാണ്.
നിലവിൽ ഒളിവിലായ പ്രതിക്കായി അയൽ ജില്ലകളിലുൾപ്പെടെ അന്വേഷണം വ്യാപിപ്പിച്ചിട്ടുണ്ട്. സ്ത്രീ സുരക്ഷയുമായി ബന്ധപ്പെട്ട ഈ കേസിൽ എത്രയും വേഗം പ്രതിയെ നിയമത്തിന് മുന്നിൽ കൊണ്ടുവരുമെന്ന് പോലീസ് അറിയിച്ചു.