ഉച്ചയ്ക്ക് തലസ്ഥാനത്തെ നടുക്കി ഇ-മെയിൽ സന്ദേശം; പത്മനാഭസ്വാമി ക്ഷേത്രത്തിനും ആറ്റുകാല്‍ ക്ഷേത്രത്തിനും നേരെ ബോംബ് ഭീഷണി; സുരക്ഷാപരിശോധന ശക്തമാക്കി;പ്രദേശത്ത് അതീവ ജാഗ്രത
തിരുവനന്തപുരം: അതിപ്രശസ്തമായ തിരുവനന്തപുരം പത്മനാഭസ്വാമി ക്ഷേത്രത്തിനും ആറ്റുകാൽ ക്ഷേത്രത്തിനും ഇമെയിൽ വഴി ബോംബ് ഭീഷണി ലഭിച്ചു. ഇന്ന് ഉച്ചയോടെയാണ് ഭീഷണി സന്ദേശം എത്തിയതെന്ന് അധികൃതർ അറിയിച്ചു. സന്ദേശത്തെ തുടർന്ന് പോലീസ് ഡോഗ് സ്ക്വാഡിൻ്റെ സഹായത്തോടെ ക്ഷേത്ര പരിസരങ്ങളിൽ വിശദമായ പരിശോധന നടത്തി.
പരിശോധനയിൽ സംശയാസ്പദമായ യാതൊന്നും കണ്ടെത്താനായിട്ടില്ലെന്നും, ലഭിച്ച സന്ദേശം വ്യാജമാണെന്നും പോലീസ് അറിയിച്ചു. എന്നാൽ, ഇമെയിൽ സന്ദേശത്തിൻ്റെ ഉറവിടം കണ്ടെത്താൻ സൈബർ സെൽ വിശദമായ അന്വേഷണം ആരംഭിച്ചിട്ടുണ്ട്. സമാനമായ ബോംബ് ഭീഷണി സന്ദേശങ്ങൾ നേരത്തെ ഡൽഹി, ബോംബെ ഹൈക്കോടതികൾക്കും ലഭിച്ചിരുന്നു. അത്തരം സന്ദർഭങ്ങളിലും വിശദമായ പരിശോധനകൾ നടത്തിയിരുന്നെങ്കിലും യാതൊരു കണ്ടെത്തലുമില്ലായിരുന്നു.
ക്ഷേത്രങ്ങളിലെ സുരക്ഷ വർദ്ധിപ്പിക്കുകയും അതീവ ജാഗ്രത പാലിക്കാനും പോലീസ് നിർദ്ദേശം നൽകിയിട്ടുണ്ട്. ഇത്തരം വ്യാജ സന്ദേശങ്ങൾ ലഭിക്കുന്ന സാഹചര്യത്തിൽ ജനങ്ങൾ പരിഭ്രാന്തരാകേണ്ടതില്ലെന്നും, അധികൃതർ സ്ഥിതിഗതികൾ നിരീക്ഷിച്ചു വരികയാണെന്നും പോലീസ് വ്യക്തമാക്കി. ഇമെയിൽ അയച്ച വ്യക്തിയെ കണ്ടെത്താനുള്ള ശ്രമങ്ങൾ പുരോഗമിക്കുകയാണ്.