ദേവനന്ദയ്ക്ക് വിദ്യാഭ്യാസ വകുപ്പ് വീട് നിര്‍മിച്ച് നല്‍കും; താരത്തെ കണ്ട് ഉറപ്പുനല്‍കി മന്ത്രി വി ശിവന്‍കുട്ടി
ദേവനന്ദയ്ക്ക് വിദ്യാഭ്യാസ വകുപ്പ് വീട് നിര്‍മിച്ച് നല്‍കും; താരത്തെ കണ്ട് ഉറപ്പുനല്‍കി മന്ത്രി വി ശിവന്‍കുട്ടി
തിരുവനന്തപുരം: ട്രാക്കിലെ വേഗറാണിയെ ചേര്‍ത്തുപിടിച്ച് വിദ്യാഭ്യാസ മന്ത്രി വി ശിവന്‍കുട്ടി . സംസ്ഥാന സ്‌കൂള്‍ ഒളിമ്പിക്‌സില്‍ റെക്കോര്‍ഡ് നേട്ടം കൈവരിച്ച ദേവനന്ദ വി ബിജുവിന് പൊതുവിദ്യാഭ്യാസ വകുപ്പ് വീട് നിര്‍മിച്ച് നല്‍കും. താരത്തെ നേരില്‍ കണ്ട് അഭിനന്ദനം അറിയിച്ച വേളയിലാണ് മന്ത്രി വി ശിവന്‍കുട്ടി പ്രഖ്യാപനം നടത്തിയത്.
കോഴിക്കോട് സെന്റ് ജോസഫ് എച്ച്എസ്എസ് പുല്ലൂരാംപാറയിലെ കായികതാരമായി ദേവനന്ദ ജൂനിയര്‍ പെണ്‍കുട്ടികളുടെ 200 മീറ്റര്‍ ഓട്ടത്തില്‍ 24.96 സെക്കന്‍ഡില്‍ ഫിനിഷ് ചെയ്താണ് പുതിയ മീറ്റ് റെക്കോര്‍ഡ് സ്ഥാപിച്ചത്. 2017ല്‍ ആന്‍സി സോജന്‍ സ്ഥാപിച്ച 25.13 സെക്കന്‍ഡിന്റെ റെക്കോര്‍ഡാണ് ഈ പ്ലസ് ടു വിദ്യാര്‍ഥിനി തിരുത്തിയെഴുതിയത്. 100 മീറ്റര്‍ ഓട്ടത്തിലും ദേവനന്ദ സ്വര്‍ണ മെഡല്‍ കരസ്ഥമാക്കിയിരുന്നു.
ഒരു മാസം മുന്‍പ് അപ്പെന്റിസൈറ്റിസ് സ്ഥിരീകരിച്ചിട്ടും, ശസ്ത്രക്രിയ മാറ്റിവെച്ച് കടുത്ത വേദന സഹിച്ച് മത്സരത്തില്‍ പങ്കെടുത്ത ദേവനന്ദ നിശ്ചയദാര്‍ഢ്യത്തിന്റെ പ്രതീകമാണെന്ന് മന്ത്രി ശിവന്‍കുട്ടി പറഞ്ഞു. ബാര്‍ബറായ അച്ഛന്‍ ബിജുവിനും തൊഴിലുറപ്പ് തൊഴിലാളിയായ അമ്മ വിജിതയ്ക്കുമൊപ്പം താമസിക്കുന്ന ദേവനന്ദയുടെ കുടുംബസാഹചര്യം മനസ്സിലാക്കിയ മന്ത്രി, പൊതുവിദ്യാഭ്യാസ വകുപ്പിന് കീഴിലുള്ള കേരള സ്‌കൗട്ട്‌സ് ആന്‍ഡ് ഗൈഡ്സിനെ വീട് നിര്‍മ്മിക്കുന്നതിനായി ചുമതലപ്പെടുത്തുകയായിരുന്നു. ദേവനന്ദയ്ക്ക് എല്ലാവിധ പിന്തുണയും മന്ത്രി വാഗ്ദാനം ചെയ്തു.