അന്തരീക്ഷത്തിലെ എല്ലാ മാറ്റങ്ങളും കൃത്യമായി നിരീക്ഷിക്കും; ഇനി വടക്കൻ കേരളവും റഡാർ കണ്ണിൽ തെളിയും; മഴയും ചുഴലിക്കാറ്റും ഇടിമിന്നലുമൊക്കെ നേരത്തെ അറിയാം

മംഗളുരു: രാജ്യത്തെ തത്സമയ കാലാവസ്ഥാ നിരീക്ഷണം കൂടുതൽ കൃത്യമാക്കുന്നതിനായി ആദ്യത്തെ അത്യാധുനിക ഡോപ്ലർ റഡാർ കർണാടകയിലെ മംഗളൂരുവിൽ പ്രവർത്തനക്ഷമമായി. കേന്ദ്ര ശാസ്ത്ര സാങ്കേതിക സഹമന്ത്രി ഡോ. ജിതേന്ദ്ര സിങ് സംവിധാനം ഉദ്ഘാടനം ചെയ്തു.

250 കിലോമീറ്റർ നിരീക്ഷണ പരിധിയുള്ള ഈ സി-ബാൻഡ് റഡാർ സ്ഥാപിച്ചതോടെ കേരളത്തിലെ വടക്കൻ ജില്ലകളായ കാസർഗോഡും കണ്ണൂരും ഇനിമുതൽ റഡാർ നിരീക്ഷണ പരിധിയിലാകും. നിലവിൽ തിരുവനന്തപുരത്തും കൊച്ചിയിലുമാണ് കേരളത്തിൽ റഡാറുകളുള്ളത്.

പുതിയ റഡാർ വഴി മഴയുടെ തീവ്രത, ചുഴലിക്കാറ്റുകൾ, ഇടിമിന്നൽ എന്നിവ തത്സമയം കൃത്യമായി നിരീക്ഷിച്ച് മുന്നറിയിപ്പുകൾ നൽകാൻ സാധിക്കും. കേരളം, കർണാടക തീരപ്രദേശങ്ങൾ, ഗോവ, ലക്ഷദ്വീപ് തീരങ്ങൾ തുടങ്ങിയ പ്രദേശങ്ങളിലെ കാലാവസ്ഥാ പ്രവചനം കൂടുതൽ കാര്യക്ഷമമാക്കാൻ ഇത് സഹായിക്കും. വയനാട്, കൊല്ലം, ലക്ഷദ്വീപിലെ മിനിക്കോയ്, അമിനി എന്നിവിടങ്ങളിലും പുതിയ റഡാറുകൾ സ്ഥാപിക്കാനുള്ള ഒരുക്കങ്ങൾ പുരോഗമിക്കുകയാണ്.