കാട്ടിനുള്ളിൽ രണ്ട് പ്ലാസ്റ്റിക് ബാരലുകൾ; വിവരം അറിഞ്ഞ് എക്സൈസ് പാഞ്ഞെത്തി; പരിശോധനയിൽ എല്ലാം കൈയ്യോടെ പൊക്കി; സംഭവം പാലക്കാട്

പാലക്കാട്: തദ്ദേശ സ്വയംഭരണ തിരഞ്ഞെടുപ്പിനോട് അനുബന്ധിച്ച് അഗളി എക്സൈസ് നടത്തിയ പ്രത്യേക പരിശോധനയിൽ 918 ലിറ്റർ വാഷും വാറ്റുപകരണങ്ങളും പിടിച്ചെടുത്തു. ചീരക്കടവ്, ആനക്കട്ടി എന്നിവിടങ്ങളിലെ വനമേഖലകളിൽ ഒളിപ്പിച്ച നിലയിലാണ് നിരോധിത വസ്തുക്കൾ കണ്ടെത്തിയത്.

ചീരക്കടവിൽ 500 ലിറ്റർ ടാങ്കിലും പ്ലാസ്റ്റിക് കുടങ്ങളിലുമായി 518 ലിറ്റർ വാഷ് കണ്ടെത്തി. കൂടാതെ, ആനക്കട്ടിയിലെ നീർച്ചാലിനടുത്ത് 200 ലിറ്റർ വീതമുള്ള രണ്ട് പ്ലാസ്റ്റിക് ബാരലുകളിലായി 400 ലിറ്റർ വാഷും വാറ്റുപകരണങ്ങളും പിടിച്ചെടുത്തു. പ്രിവെന്റീവ് ഓഫീസർ ജെ. ആർ. അജിത്തിൻ്റെ നേതൃത്വത്തിലുള്ള സംഘമാണ് വാഷ് കണ്ടെടുത്തത്. ഇവ സംഭവസ്ഥലത്തു വെച്ചുതന്നെ നശിപ്പിച്ചു.