'ആളൊരു മാന്യനാണ്..'; നെറ്റിൽ കുടുങ്ങി കിടന്നത് രണ്ടു ദിവസം; വേദന കൊണ്ട് പുളഞ്ഞ് അതിഥി; ഒടുവിൽ 'ചേര'യ്ക്ക് രക്ഷകരായി ഫയർഫോഴ്സ്

തിരുവനന്തപുരം: വലയിൽ കുരുങ്ങി കിടന്ന ചേരയ്ക്ക് രക്ഷകരായി ഫയർഫോഴ്സ്. വിഴിഞ്ഞം കഴിവൂർ വേങ്ങാപ്പൊറ്റയിലെ ഗുരു ദീപം വീട്ടിലെ വിറക് പുരയുടെ പുറത്ത് വിരിച്ചിരുന്ന നൈലോൺ നെറ്റിലാണ് ചേര കുടുങ്ങി പോയത്. വലയിൽ കുടുങ്ങിയ നിലയിൽ ചേരയെ കണ്ട വീട്ടുകാർ ഫയർഫോഴ്സിനെ വിവരം അറിയിക്കുകയായിരുന്നു.

ഒടുവിൽ വിഴിഞ്ഞം യൂണിറ്റിൽ നിന്നും ഫയർ ആൻഡ് റെസ്ക്യൂ സേന എത്തി. രണ്ട് ദിവസമായി നെറ്റിൽ കുടുങ്ങി അവശനായി കിടന്ന ചേരയെ പരിക്കേൽക്കാതെ അഗ്നിരക്ഷാ സേന നെറ്റ് മുറിച്ച് രക്ഷിച്ചു. അവശ നിലയിലായിരുന്നെങ്കിലും മറ്റ് പരിക്കുകളില്ലാത്തതിനാൽ ചേരയെ സമീപത്തെ കാട്ടിലേക്ക് തുറന്നുവിടുകയും ചെയ്തു.