മകളെ സ്ഥിരമായി ഓണ്‍ലൈനില്‍ കണ്ടു; വാട്ട്സ് ആപ്പ് ഡിലിറ്റ് ചെയ്യാന്‍ അമ്മയുടെ താക്കീത്; തലശ്ശേരിയില്‍ 14 വയസുകാരി തൂങ്ങി മരിച്ചു
തലശ്ശേരി: സ്മാര്‍ട്ട്‌ഫോണിന്റെ ഉപയോഗം കുറക്കണമെന്ന് അമ്മ പറഞ്ഞതിനെ തുടര്‍ന്ന് 14 കാരി ആത്മഹത്യ ചെയ്തു. തലശ്ശേരിയിലാണ് സംഭവം. ആമിന ക്വാര്‍ട്ടേഴ്സില്‍ മാതൃസഹോദരിയുടെ ഒപ്പം കഴിയുകയായിരുന്ന ആദിത്യയാണ് ജീവനൊടുക്കിയത്.
സ്റ്റെയര്‍കേസിന്റെ പടിയില്‍ തൂങ്ങി മരിച്ച നിലയിലാണ് ആദിത്യയെ കണ്ടെത്തിയത്. തിരുവനന്തപുരം ഉള്ളൂര്‍ സ്വദേശി അനൂപ് ധരണ്യ ദമ്പതികളുടെ മകളാണ്. ഇന്നലെ വൈകുന്നേരം നാലോടെയാണ് സംഭവം. വേനലവധി ആഘോഷിക്കാന്‍ മാതൃസഹോദരിയുടെ വീട്ടില്‍ കഴിഞ്ഞ ദിവസമാണ് ആദിത്യ എത്തിയത്. മാതൃ സഹോദരി കണ്ണൂരിലാണ് ജോലി ചെയ്യുന്നത്.
മകളെ സ്ഥിരമായി ഓണ്‍ലൈനില്‍ കണ്ടതോടെ വാട്ട്സ് ആപ്പ് ഡിലിറ്റ് ചെയ്യാന്‍ തിരുവനന്തപുരത്തുള്ള അമ്മ ഫോണിലൂടെ നിര്‍ദേശിച്ചിരുന്നു. ഇതിനു പിന്നാലെയാണ് ജീവനൊടുക്കിയത്. മൃതദേഹം തലശേരി ജനറല്‍ ആശുപത്രി മോര്‍ച്ചറിയിലേക്ക് മാറ്റി. തലശേരി ടൗണ്‍ പൊലിസ് അസ്വാഭാവിക മരണത്തിന് കേസെടുത്ത് അന്വേഷണമാരംഭിച്ചിട്ടുണ്ട്. തിരുവനന്തപുരം പട്ടം സെന്റ് മേരീസ് സ്‌കൂള്‍ വിദ്യാര്‍ഥിനിയാണ് ആദിത്യ. സഹോദരി: ദീക്ഷ.