'മകളെ വിവാഹം ചെയ്തു നല്‍കാത്തതിന്റെ വൈരാഗ്യം'; ഹജ്ജ് കര്‍മത്തിന് പോകാനിരിക്കെ അയല്‍വാസിയായ ബന്ധുവിന്റെ കുത്തേറ്റയാള്‍ മരിച്ചു; 31 കാരന്‍ അറസ്റ്റില്‍
അയല്‍വാസിയായ ബന്ധുവിന്റെ കുത്തേറ്റയാള്‍ മരിച്ചു; 31 കാരന്‍ അറസ്റ്റില്‍
തിരുവനന്തപുരം: മകളെ വിവാഹം ചെയ്ത് കൊടുക്കാത്തതിലുള്ള വൈരാഗ്യത്തില്‍ അയല്‍വാസിയായ ബന്ധുവിനെ യുവാവ് കുത്തിക്കൊലപ്പെടുത്തി. മംഗലപുരം പതിനാറാം മൈല്‍ പാട്ടത്തില്‍ ഗവ. എല്‍.പി സ്‌കൂളിന് സമീപം ടി.എന്‍ കോട്ടേജില്‍ എ. താഹ (67) ആണ് കൊല്ലപ്പെട്ടത്. സംഭവത്തില്‍ ബന്ധുവായ പാട്ടത്തില്‍ പൊയ്കയില്‍ ഷിഹാസ് മന്‍സിലില്‍ റാഷിദിനെ (31) മംഗലപുരം പൊലീസ് അറസ്റ്റ് ചെയ്തു.
ഭാര്യയോടൊപ്പം താഹ ഈ മാസം 28ന് ഹജ്ജ് കര്‍മത്തിന് പോകാനിരിക്കെയാണ് ദാരുണം സംഭവം. ബുധനാഴ്ച ഉച്ചക്ക് കത്തിയുമായി വീട്ടിനുള്ളിലേക്ക് ഓടികയറിയ റാഷിദ് താഹയെ ആക്രമിക്കുകയായിരുന്നു. താഹക്ക് നേരെയുള്ള ആക്രമണം ഭാര്യ നൂര്‍ജഹാന്‍ തടഞ്ഞു. എന്നാല്‍, നൂര്‍ജഹാനെ തള്ളിയിട്ട ശേഷമാണ് റാഷിദ് താഹയെ കുത്തി.
ബുധനാഴ്ച ഉച്ചക്ക് രണ്ടരയോടെയാണ് ആക്രമണം നടന്നത്.താഹയുടെ വീട്ടിലെത്തിയ പ്രതിയുമായി വാക്കേറ്റവും കയ്യേറ്റവും നടന്നു. ഇതിന് പിന്നാലെയാണ് റാഷിദ് കത്തിയെടുത്ത് കുത്തിയത്. താഹയുടെ മകളെ വിവാഹം കഴിച്ചു തരാത്തിലുള്ള വൈരാഗ്യമാണ് കൊലപാതകത്തിന് കാരണമെന്ന് പ്രതി പൊലീസിനോട് പറഞ്ഞു.
വയറില്‍ കുത്തേറ്റ താഹ വീടിന്റെ രണ്ടാമത്തെ നിലയിലേക്ക് ഓടികയറിയെങ്കിലും പ്രതി പിന്നാലെ എത്തി വീണ്ടും കുത്തുകയായിരുന്നു. താഹയുടെ വയറ്റില്‍ നാലിടത്ത് കുത്തേറ്റത്. തുടര്‍ന്ന് കുടല്‍മാല പുറത്തു ചാടിയിരുന്നു. ബന്ധുക്കളും നാട്ടുകാരും ചേര്‍ന്ന് തിരുവനന്തപുരത്തെ സ്വകാര്യ ആശുപത്രിയില്‍ എത്തിച്ചെങ്കിലും രാത്രി ഒരു മണിയോടെ താഹ മരിച്ചു.
ആക്രമണത്തിന് ശേഷം രക്ഷപ്പെടാന്‍ ശ്രമിച്ച റാഷിദിനെ നാട്ടുകാര്‍ പിടികൂടി മംഗലപുരം പൊലീസിന് കൈമാറി. താഹയുടെ മകളെ വിവാഹം ചെയ്ത് കൊടുക്കാത്തതിന്റെ പ്രതികാരത്തിലാണ് ആക്രമിച്ചതെന്നാണ് പ്രതി പൊലീസിന് മൊഴി നല്‍കിയത്. താഹയെ പ്രതി മുമ്പും മര്‍ദിച്ചിട്ടുണ്ടെന്നാണ് പൊലീസ് കണ്ടെത്തല്‍.