കണ്ണൂര്‍ ഗവ. മെഡിക്കല്‍ കോളേജില്‍ 124.95 കോടി രൂപയുടെ സമഗ്ര വികസന പദ്ധതികള്‍ക്ക് ഭരണാനുമതി
കണ്ണൂര്‍ ഗവ. മെഡിക്കല്‍ കോളേജില്‍ 124.95 കോടി രൂപയുടെ സമഗ്ര വികസന പദ്ധതികള്‍ക്ക് ഭരണാനുമതി
കണ്ണൂര്‍ :പരിയാരത്തെ കണ്ണൂര്‍ ഗവ. മെഡിക്കല്‍ കോളേജിന്റെ നവീകരണ പ്രവൃത്തികള്‍ക്കും ട്രോമാ കെയര്‍ ബ്ലോക്ക് നിര്‍മാണത്തിനുമായി കിഫ്ബി ധനസഹായത്തോടെ 124.95 കോടി രൂപയുടെ സമഗ്ര വികസന പദ്ധതികള്‍ക്ക് ആരോഗ്യം, വനിത, ശിശു വികസന വകുപ്പ് ഭരണാനുമതി നല്‍കി. ഇതില്‍ നവീകരണ പ്രവര്‍ത്തനങ്ങള്‍ക്ക് മാത്രമായി 29.78 കോടി രൂപ വകയിരുത്തി. ഇതിന്റെ ഭാഗമായുളള അറ്റകുറ്റപ്പണികള്‍ അന്തിമഘട്ടത്തിലാണ്. ക്രിട്ടിക്കല്‍ കെയര്‍ ബ്ലോക്ക് സ്ഥാപിക്കുന്നതിന് 23.75 കോടി, പി.ജി ഹോസ്റ്റല്‍ നിര്‍മാണത്തിന് 28.16 കോടി രൂപയുടെയും സമഗ്ര ഭരണാനുമതി ലഭിച്ചു. ഇതിന്റെ രണ്ടാംഘട്ട പ്രവൃത്തികള്‍ക്കായി മൂന്ന് കോടി രൂപ അനുവദിച്ചു.
അടിസ്ഥാന സൗകര്യ വികസനത്തിന്റെ ഭാഗമായ നിര്‍മാണ പ്രവര്‍ത്തനങ്ങള്‍ വേഗത്തിലാക്കുക, കേടായ ഉപകരണങ്ങള്‍ മാറ്റി സ്ഥാപിക്കുക, പുതിയ ഉപകരണങ്ങള്‍ വാങ്ങുക, പുതിയ പി.ജി കോഴ്‌സുകള്‍ ആരംഭിച്ച് ആവശ്യമായ തസ്തികകള്‍ സൃഷ്ടിക്കുക തുടങ്ങിയവയ്ക്കുള്ള നടപടികളും സ്വീകരിച്ചിട്ടുണ്ട്. പക്ഷാഘാത കേന്ദ്രം സ്ഥാപിക്കുന്നതിന് 5.5 കോടി രൂപയുടെ പ്രൊപ്പോസല്‍ സര്‍ക്കാരിന്റെ സജീവ പരിഗണനയിലാണെന്നും ജീവനക്കാരെ സര്‍ക്കാര്‍ സര്‍വീസിലേയ്ക്ക് വേഗത്തില്‍ ഏറ്റെടുക്കുന്നതിനുള്ള നടപടി സ്വീകരിച്ചിട്ടുണ്ടെന്നും മെഡിക്കല്‍ കോളേജ് വികസനത്തിന് സര്‍ക്കാര്‍ മുന്തിയ പരിഗണനയാണ് നല്‍കി വരുന്നതെന്നും ആരോഗ്യ വനിതാ ശിശു വികസന വകുപ്പ് മന്ത്രി വീണ ജോര്‍ജ് പറഞ്ഞു. മെഡിക്കല്‍ കോളേജിന്റെ വിവിധ വിഷയങ്ങള്‍ സംബന്ധിച്ച് നിയമസഭയില്‍ എം വിജിന്‍ എം എല്‍ എ ഉന്നയിച്ച സബ്മിഷന് മറുപടി പറയുകയായിരുന്നു മന്ത്രി.
മരുന്ന് ലഭ്യത ഉറപ്പാക്കുന്നതിനായി 19 കോടി രൂപയാണ് 2025-26 വര്‍ഷത്തെ കെ എം എസ് സി എല്‍ വഴി അനുവദിച്ചത്. ഒന്‍പത് കോടി രൂപ ഫാര്‍മസി സ്റ്റോര്‍ നിര്‍മിക്കാന്‍ ഭരണാനുമതി നല്‍കുകയും അതിന്റെ ആദ്യ ഘട്ടത്തിനുളള 3.5 കോടി പി.ഡബ്ല്യൂ.ഡിയില്‍ അടക്കുകയും ചെയ്തു. പഴയ കെട്ടിടത്തില്‍ എച്ച്.ഡി.എസ് ഫണ്ട് ഉപയോഗിച്ച് അറ്റകുറ്റപണി പൂര്‍ത്തീകരിച്ച് മരുന്ന് സംഭരണത്തിനായി ഉപയോഗിച്ചു വരുകയാണ്.
മെഡിക്കല്‍ കോളേജിന്റെ അടിസ്ഥാന സൗകര്യ വികസനത്തിന്റെ ഭാഗമായി നിരവധി പ്രവൃത്തികള്‍ പുരോഗമിക്കുകയാണ്. ആറു കോടി രൂപയുടെ പാരാമെഡിക്കല്‍ ഹോസ്റ്റല്‍, ഫാര്‍മസി കോളേജ് ക്ലാസ് റൂം, പരീക്ഷാ ഹാള്‍ റൂഫിംഗ് പ്രവൃത്തി, 2.5 കോടി രൂപ ചെലവില്‍ ലേഡീസ് ഹോസ്റ്റല്‍, ജെന്റ്സ് ഹോസ്റ്റല്‍, ഫാര്‍മസി കോളേജ് എന്നിവയുടെ നവീകരണ പ്രവൃത്തി പൂര്‍ത്തിയായി. അംഗപരിമിതര്‍ക്കുളള റാംപ് നിര്‍മാണത്തിന് 18 ലക്ഷവും പോസ്റ്റ് ഗ്രാജ്വേറ്റ് ഹോസ്റ്റലിന് രണ്ട് കോടി രൂപയും അനുവദിച്ചിട്ടുണ്ട്. ആശുപത്രിയില്‍ വരുന്ന രോഗികളുടെ കൂട്ടിരുപ്പുകാര്‍ക്ക് താമസിക്കുന്നതിനായി ഹൗസിംഗ് ബോര്‍ഡ് ആശ്വാസഭവന നിര്‍മാണ പദ്ധതിയുടെ കെട്ടിട നിര്‍മാണ പ്രവൃത്തിയും പുരോഗമിക്കുകയാണ്.
ഡിജിറ്റല്‍ റേഡിയോഗ്രാഫി, ഹാര്‍ട്ട് ലംഗ് മെഷീന്‍, കാത്ത് ലാബ്, അനസ്‌തേഷ്യ വര്‍ക്ക് സ്റ്റേഷന്‍, വെന്റിലേറ്റര്‍ തുടങ്ങിയ പ്രധാനപ്പെട്ട ഉപകരണങ്ങള്‍ വാങ്ങുന്നതിന് 10.59 കോടി രൂപയും മെഷീനുകളും മറ്റ് അനുബന്ധ ഉപകരണങ്ങളും വാങ്ങുന്നതിനായി 26.50 കോടി രൂപയും അനുവദിച്ചിട്ടുണ്ട്. കൂടാതെ പുതിയ എം.ആര്‍.ഐ മെഷീന്‍ സ്ഥാപിക്കുന്നതിന് 13.74 കോടി രൂപയുടെ ഭരണാനുമതിയും ലഭ്യമായിട്ടുണ്ട്.
മെഡിക്കല്‍ കോളേജില്‍ മലിനജലം സംഭരിക്കുന്നതിനുള്ള പുതിയ കളക്ഷന്‍ ടാങ്ക് നിര്‍മിക്കുന്നതിന് 1.19 കോടി രൂപയുടെ എസ്റ്റിമേറ്റ് സമര്‍പ്പിച്ചിട്ടുണ്ടെന്നും ഭരണാനുമതി നല്‍കുന്നതിനുള്ള നടപടികള്‍ സ്വീകരിച്ചുവരുന്നതായും ആരോഗ്യ വകുപ്പ് മന്ത്രി അറിയിച്ചു. നിലവിലെ സീവേജ് ട്രീറ്റ്‌മെന്റ് പ്ലാന്റിന്റെ നവീകരണ പ്രവൃത്തി അക്രെഡിറ്റഡ് എജന്‍സിയായ പാലക്കാട് ഐ ആര്‍ ടി സി പ്രോജക്ട് ഇംപ്ലിമെന്റേഷന്‍ യൂണിറ്റ് എന്ന സ്ഥാപനമാണ് നടത്തുന്നത്. സംസ്ഥാന സര്‍ക്കാരും ആശുപത്രി വികസന സമിതിയും സംയുക്തമായി ഫണ്ട് ചെലവഴിച്ചാണ് പ്രവൃത്തി സ്ഥാപനത്തെ എല്‍പ്പിച്ചത്. നിലവില്‍ പ്രവൃത്തി പൂര്‍ത്തികരിച്ച് ട്രയല്‍ റണ്‍ ആരംഭിച്ചിട്ടുണ്ട്.
മെഡിക്കല്‍ കോളേജ് സര്‍ക്കാര്‍ ഏറ്റെടുക്കുന്നതിന്റെ ഭാഗമായി 147 മെഡിക്കല്‍ അധ്യാപക ജീവനക്കാര്‍, 521 നഴ്സിംഗ് വിഭാഗം ജീവനക്കാര്‍, 26 ഫാര്‍മസി അധ്യാപകര്‍, 43 ദന്തല്‍ അധ്യാപകര്‍, 210 നഴ്സിംഗ് അസിസ്റ്റന്റ് / ട്രോളി വര്‍ക്കേഴ്സ്, 27 നഴ്സിംഗ് അധ്യാപകര്‍, 212 പാരാമെഡിക്കല്‍ ജീവനക്കാര്‍, 237 മിനിസ്റ്റീരിയല്‍ ആന്‍ഡ് എഞ്ചിനീയറിംഗ് ജീവനക്കാര്‍, 17 ദന്തല്‍ വിഭാഗം അനധ്യാപക ജീവനക്കാര്‍ ഉള്‍പ്പടെ 1440 തസ്തികകളാണ് ഇവിടെ സൃഷ്ടിച്ചത്. കൂടാതെ മെഡിക്കല്‍ ഇന്ത്യന്‍ മെഡിക്കല്‍ കൗണ്‍സില്‍ മാനദണ്ഡപ്രകാരം 100 തസ്തികളും, 42 അഡ്മിനിസ്‌ട്രേറ്റീവ് തസ്തികകളും സൃഷ്ടിച്ചു.
മുമ്പത്തെ പരിയാരം മെഡിക്കല്‍ കോളേജില്‍ നിന്ന് ഏറ്റെടുത്ത എന്‍ട്രി കേഡര്‍/ സ്റ്റാന്‍ഡ് എലോണ്‍ സ്വീകരിച്ച മെഡിക്കല്‍ അധ്യാപകര്‍ എന്നിവരില്‍ ഒരാള്‍ ഒഴികെയുള്ള എല്ലാ അധ്യാപകരുടെയും റെഗുലറൈസേഷന്‍ പൂര്‍ത്തിയായിട്ടുണ്ട്. ഏറ്റെടുത്ത ദന്തല്‍, ഫാര്‍മസി, നഴ്സിംഗ് വിഭാഗങ്ങളിലായുള്ള അധ്യാപകര്‍ക്ക് താല്‍കാലിക നിയമന ഉത്തരവുകള്‍ നല്‍കി. പോലീസ് വെരിഫിക്കേഷന്‍ റിപ്പോര്‍ട്ട്, പി.എസ്.സിയുടെ അഡൈ്വസ് എന്നിവയുടെ അടിസ്ഥാനത്തില്‍ നിയമനം ക്രമീകരിക്കും.
പാരാമെഡിക്കല്‍ ജീവനക്കാരുടെ ആഗിരണവുമായി ബന്ധപ്പെട്ട് ധനവകുപ്പ് ശമ്പള സ്‌കെയില്‍ ശുപാര്‍ശ ചെയ്ത 26 തസ്തികകളിലെ ജീവനക്കാരെ അക്കൊമഡേറ്റ് ചെയ്തിട്ടുണ്ട്. മെഡിക്കല്‍ വിദ്യാഭ്യാസ ഡയറക്ടര്‍ തലത്തില്‍ ആയവര്‍ക്ക് താല്‍കാലിക നിയമന ഉത്തരവുകള്‍ നല്‍കിയിട്ടുണ്ട്. അവശേഷിക്കുന്ന തസ്തികകള്‍ക്ക് ശമ്പള സ്‌കെയില്‍ നിശ്ചയിക്കുന്നതിനുള്ള നടപടികള്‍ പുരോഗമിക്കുകയാണ്.
ധനവകുപ്പിന്റെ നിര്‍ദ്ദേശാനുസരണം നോണ്‍ ടീച്ചിംഗ് ദന്തല്‍ തസ്തികകള്‍ വര്‍ഗീകരിക്കുന്നതിനുള്ള നടപടികളും സ്വീകരിച്ചുവരികയാണ്. ആകെയുള്ള 210 നഴ്സിംഗ് അസിസ്റ്റന്റ്/ ട്രോളി വര്‍ക്കര്‍ തസ്തികകളില്‍, ധന വകുപ്പിന്റെ ഉപദേശ പ്രകാരം 208 ജീവനക്കാരെ അക്കൊമൊഡേറ്റ് ചെയ്ത് ഉത്തരവ് പുറപ്പെടുവിച്ചിട്ടുണ്ട്. ഇവര്‍ക്ക് താല്‍കാലിക നിയമന ഉത്തരവുകള്‍ നല്‍കുന്നതിനുള്ള നടപടികള്‍ മെഡി. വിദ്യാഭ്യാസ ഡയറക്ടര്‍ തലത്തില്‍ സ്വീകരിച്ചുവരികയാണ്.
ആഗിരണത്തിനായി സൃഷ്ടിച്ച 772 തസ്തികകളിലുള്‍പ്പെട്ട എഞ്ചിനീയറിംഗ് വിഭാഗം ജീവനക്കാര്‍ക്കായുള്ള തസ്തികകളുടെ വര്‍ഗീകരണവും, ഏറ്റെടുക്കാനുള്ള 22 നോണ്‍, 237 മിനിസ്ടീരിയല്‍ മെഡിക്കല്‍ അധ്യാപകര്‍ക്കായി തസ്തികകള്‍ സൃഷ്ടിക്കുന്നതിനുമുള്ള നടപടികളും സ്വീകരിക്കുന്നുണ്ട്.
പരിയാരം മെഡിക്കല്‍ കോളേജില്‍ നിന്ന് ഏറ്റെടുത്തതും മെഡിക്കല്‍ വിദ്യാഭ്യാസ ഡയറക്ടര്‍ സര്‍ക്കാരില്‍ ലഭ്യമാക്കിയതുമായ സ്റ്റാഫ് നഴ്സ് 1 / ഹെഡ് നഴ്സ് / നഴ്സിംഗ് സൂപ്രണ്ട് 11 വിഭാഗത്തിലെ സ്റ്റാന്‍ഡ് എലോണ്‍ സ്വീകരിച്ച 48 ജീവനക്കാരുടെ ക്രമപ്പെടുത്തല്‍ പൂര്‍ത്തിയായിട്ടുണ്ട്. കൂടാതെ സ്റ്റാഫ് നേഴ്‌സ് ഗ്രേഡ് 11 വിഭാഗത്തിലെ 378 ജീവനക്കാരില്‍ എന്‍ട്രി കേഡര്‍ തെരഞ്ഞെടുത്ത ആദ്യഘട്ടത്തിലെ 272 സ്റ്റാഫ് നഴ്സ് ഗ്രേഡ് 11 ഓഫീസര്‍മാരുടെ ക്രമപ്പെടുത്തലും പൂര്‍ത്തിയായി. അവശേഷിക്കുന്ന 106 ജീവനക്കാരെ ക്രമപ്പെടുത്തുന്നതിന് നടപടികളും സ്വീകരിച്ചുവരികയാണ്. കൂടാതെ ഓപ്ഷന്‍ മാറുന്നതിനായി കോടതി വ്യവഹാരങ്ങള്‍ ഫയല്‍ ചെയ്തിട്ടുള്ള 73 നഴ്സിംഗ് വിഭാഗം ജീവനക്കാരുടെ ആവശ്യത്തിന്മേല്‍ തീരുമാനം കൈക്കൊള്ളുന്ന മുറയ്ക്ക് ഇവരുടെ ക്രമപ്പെടുത്തല്‍ നടപടികളും സ്വീകരിക്കും.