മമ്മൂട്ടിക്ക് വേണ്ടി തളിപ്പറമ്പ് രാജരാജേശ്വര ക്ഷേത്രത്തില്‍ പൊന്നിന്‍കുടം വഴിപാട്; ഉത്രം നക്ഷത്രത്തില്‍ ആയുരാരോഗ്യസൗഖ്യത്തിനായി വഴിപാട് നടത്തിയത് ആര്‍ എസ് എസ് നേതാവ് എ.ജയകുമാര്‍
മമ്മൂട്ടിക്ക് വേണ്ടി തളിപ്പറമ്പ് രാജരാജേശ്വര ക്ഷേത്രത്തില്‍ പൊന്നിന്‍കുടം വഴിപാട്
കണ്ണൂര്‍: മമ്മൂട്ടിക്ക് വേണ്ടി കണ്ണൂര്‍ തളിപ്പറമ്പ് രാജരാജേശ്വര ക്ഷേത്രത്തില്‍ പൊന്നിന്‍കുടം വഴിപാട്. മുതിര്‍ന്ന ആര്‍ എസ് എസ് നേതാവ് എ.ജയകുമാറാണ് മമ്മൂട്ടിയുടെ ആയുരാരോഗ്യസൗഖ്യത്തിനായി പൊന്നിന്‍കുടം വഴിപാട് നടത്തിയത്. ഉത്രം നക്ഷത്രത്തില്‍ ആയിരുന്നു വഴിപാട്. എ.ജയകുമാറിനെ ക്ഷേത്രം ഭാരവാഹികള്‍ ക്ഷേത്രത്തിലെ ആരാധാനാ മൂര്‍ത്തിയായ രാജരാജേശ്വരന്റെ ഫോട്ടോ നല്‍കി സ്വീകരിച്ചു. നേരത്തെ ശബരിമലയില്‍ മമ്മൂട്ടിയുടെ പേരില്‍ നടന്‍ മോഹന്‍ലാല്‍ വഴിപാട് നടത്തിയതും വാര്‍ത്തയായിരുന്നു.
കണ്ണൂര്‍ ജില്ലാ ആസ്ഥാനത്തു നിന്ന് 23 കിലോമീറ്റര്‍ വടക്കു ഭാഗത്തുള്ള തളിപ്പറമ്പ് ടൗണില്‍ നിന്ന് 3 കിലോ മീറ്റര്‍ ദൂരത്തിലാണ് രാജരാജേശ്വര ക്ഷേത്രം സ്ഥിതി ചെയ്യുന്നത്. നെയ്യ് നിറച്ച വെള്ളിക്കുടവും പൊന്നിന്‍കുടവും സമര്‍പ്പിക്കുന്നത് ക്ഷേത്രത്തിലെ പ്രധാന വഴിപാടാണ്. കഴിഞ്ഞ ജൂലൈയില്‍ കേന്ദ്ര ആഭ്യന്തര മന്ത്രി അമിത് ഷാ രാജരാജേശ്വര ക്ഷേത്രത്തില്‍ ദര്‍ശനം നടത്തുകയും പൊന്നിന്‍കുടം വച്ച് തൊഴുകയും ചെയ്തിരുന്നു. 2017ല്‍ ബിജെപി ദേശീയ അധ്യക്ഷനായിരുന്ന സമയത്തും അമിത് ഷാ ദര്‍ശനത്തിന് ഇവിടെ എത്തിയിരുന്നു.
അമിത് ഷായെ കൂടാതെ തമിഴ്‌നാട് മുന്‍ മുഖ്യമന്ത്രി ജയലളിത, കര്‍ണാടക മുന്‍ മുഖ്യമന്ത്രി ബി.എസ്.യെഡിയൂരപ്പ, ഐസിസി മുന്‍ ചെയര്‍മാന്‍ എന്‍. ശ്രീനിവാസന്‍ എന്നിവരും ക്ഷേത്രം ദര്‍ശനം നടത്തുകയും പൊന്നിന്‍കുടം വച്ച് തൊഴുകയും ചെയ്തിട്ടുണ്ട്. കൂടാതെ സിനിമാ രംഗത്തെ മറ്റ് പല പ്രമുഖരും ക്ഷേത്രം സന്ദര്‍ശിക്കാറുമുണ്ട്.
എട്ടുമാസത്തെ ഇടവേളയ്ക്ക് ശേഷം വ്യാഴാഴ്ചയാണ് മമ്മൂട്ടി കേരളത്തിലേക്ക് തിരിച്ചെത്തിയത്. നെടുമ്പാശേരി വിമാനത്താവളത്തില്‍ അദ്ദേഹമെത്തിയപ്പോള്‍ മന്ത്രി പി. രാജീവ് ഉള്‍പ്പെടെ നിരവധി പ്രമുഖര്‍ സ്വീകരിക്കാനെത്തിയിരുന്നു. ഭാര്യ സുല്‍ഫത്തിനോടൊപ്പമാണ് താരം ഉച്ചയോടെ കൊച്ചിയിലെത്തിയത്. കഴിഞ്ഞ മാര്‍ച്ചുവരെ കേരളത്തിലുണ്ടായിരുന്ന മമ്മൂട്ടി, തുടര്‍ന്ന് ചികിത്സക്കായി ചെന്നൈയിലേക്കും പിന്നീട് പുതിയ ചിത്രമായ 'പാട്രിയോറ്റി'ന്റെ ചിത്രീകരണത്തിനായി ഹൈദരാബാദിലേക്കും ലണ്ടനിലേക്കും യാത്രയായിരുന്നു. വിമാനത്താവളത്തില്‍ അദ്ദേഹത്തിനായി ഊഷ്മളമായ സ്വീകരണമാണ് ആരാധകര്‍ ഒരുക്കിയത്. പ്രിയതാരത്തെ കാണാന്‍ വന്‍ ജനാവലിയാണ് തടിച്ചുകൂടിയത്. സ്വയം ഡ്രൈവ് ചെയ്താണ് മെഗാസ്റ്റാര്‍ ലാന്‍ഡ് ക്രൂയിസറില്‍ വിമാനത്താവളത്തിന് പുറത്തേക്ക് പോയത്.
ഇനി വരുന്ന ദിവസങ്ങളില്‍ നിരവധി പരിപാടികളില്‍ മമ്മൂട്ടി പങ്കെടുക്കുമെന്നാണ് സൂചന. പ്രതിനായക വേഷത്തിലെത്തുന്ന 'കളങ്കാവല്‍' എന്ന പുതിയ സിനിമയുടെ റിലീസ് സംബന്ധിച്ച ചടങ്ങുകളിലും പങ്കെടുക്കാനായാണ് താരം കൊച്ചിയിലെത്തിയിരിക്കുന്നത്.