സ്വത്തുതര്‍ക്കത്തിന് പിന്നാലെ ഭാര്യയെ കൊലപ്പെടുത്താന്‍ ശ്രമം; ജനല്‍ ചില്ല് തകര്‍ത്ത് പെട്രോള്‍ ഒഴിച്ച് തീ കൊളുത്തി; ഭര്‍ത്താവിന് പൊള്ളലേറ്റു
കാസര്‍കോട്: സ്വത്ത് തര്‍ക്കത്തിന്റെ പേരില്‍ ഭാര്യയെ തീ കൊളുത്തി കൊലപ്പെടുത്താനുള്ള ശ്രമത്തിനിടെ ഭര്‍ത്താവ് പൊള്ളലേറ്റ് ഗുരുതരാവസ്ഥയില്‍. ഭാര്യയുമായി അകന്ന് ചെമ്പേരിയില്‍ താമസിക്കുന്ന പാണത്തൂര്‍ നെല്ലിക്കുന്നിലെ ജോസഫിനാണ് (71) പൊള്ളലേറ്റത്. ഭാര്യ സിസിലിയെയാണ് ഇയാള്‍ കൊല്ലാന്‍ ശ്രമിച്ചത്. രാജപുരത്ത് ഇന്നലെ രാത്രി ഒന്‍പതരയോടെയാണ് സംഭവം.
സിസിലി ഉറങ്ങിക്കിടന്ന മുറിയുടെ ജനല്‍ ചില്ല് പുറത്തുനിന്ന് തകര്‍ത്ത് മുറിക്കുള്ളിലേക്ക് പെട്രോള്‍ ഒഴിച്ച് തീകൊളുത്തുകയായിരുന്നു. ഇതിനിടെ തീ ജോസഫിന്റെ ദേഹത്തേക്ക് പടര്‍ന്നു. മുറിയിലെ സാധനസാമഗ്രികള്‍ കത്തിനശിച്ചെങ്കിലും സിസിലിയും ഒപ്പമുണ്ടായിരുന്ന പേരക്കുട്ടിയും പൊള്ളലേല്‍ക്കാതെ രക്ഷപ്പെട്ടു.
ബഹളം കേട്ടെത്തിയ നാട്ടുകാര്‍ രാജപുരം പൊലീസില്‍ വിവരമറിയിക്കുകയും ജോസഫിനെ കാഞ്ഞങ്ങാട്ടെ ആശുപത്രിയില്‍ എത്തിക്കുകയുമായിരുന്നു. നില ഗുരുതരമായതിനാല്‍ ഇയാളെ പിന്നീട് കണ്ണൂര്‍ ഗവ. മെഡിക്കല്‍ കോളജ് ആശുപത്രിയിലേക്ക് മാറ്റി. സ്വത്തുതര്‍ക്കമാണ് കൊലപാതകശ്രമത്തിന് കാരണമെന്നാണ് പ്രാഥമിക വിവരം.