രാവിലെ 5.10ന് ബംഗളൂരുവില്‍ നിന്ന് പുറപ്പെട്ട് ഉച്ചയ്ക്ക് 1.50ന് എറണാകുളത്ത് എത്തും; 2.30ന് എറണാകുളം ജംഗ്ഷനില്‍ നിന്ന് പുറപ്പെട്ട് അന്ന് രാത്രി 11ന് ബംഗളൂരുവില്‍ എത്തും; പുതിയ വന്ദേഭാരതിന് സമയക്രമം; ഉദ്ഘാടന തീയതിയും ഉടന്‍
കൊല്ലം: ബംഗളുരു-എറണാകുളം റൂട്ടില്‍ ഉടന്‍ സര്‍വീസ് ആരംഭിക്കുന്ന പുതിയ വന്ദേ ഭാരത് എക്‌സ്പ്രസിന്റെ സമയക്രമവും സ്റ്റോപ്പുകളും സംബന്ധിച്ച് തീരുമാനമായി. ഉദ്ഘാടന തീയതി പിന്നീട് പ്രഖ്യാപിക്കും.
ട്രെയിന്‍ നമ്പര്‍ 22651 കെഎസ്ആര്‍ എറണാകുളം വന്ദേഭാരത് രാവിലെ 5.10ന് ബംഗളൂരുവില്‍ നിന്ന് പുറപ്പെട്ട് ഉച്ചയ്ക്ക് 1.50ന് എറണാകുളത്ത് എത്തും. ട്രെയിന്‍ നമ്പര്‍ 22652 എറണാകുളം കെഎസ്ആര്‍ ബംഗളൂരു സര്‍വീസ് ഉച്ചകഴിഞ്ഞ് 2.30ന് എറണാകുളം ജംഗ്ഷനില്‍നിന്ന് പുറപ്പെട്ട് അന്ന് രാത്രി 11ന് ബംഗളൂരുവില്‍ എത്തും.
പുതിയ സര്‍വീസ് എട്ടുമണിക്കൂര്‍ 40 മിനിറ്റിനുള്ളില്‍ യാത്ര പൂര്‍ത്തിയാക്കുന്ന രീതിയിലാണ് സമയം ക്രമീകരിച്ചിട്ടുള്ളത്. ബുധനാഴ്ച സര്‍വീസ് ഉണ്ടായിരിക്കില്ല. കൃഷ്ണരാജപുരം, സേലം, ഈറോഡ്, തിരുപ്പൂര്‍, കോയമ്പത്തൂര്‍, പാലക്കാട്, തൃശൂര്‍ എന്നിവിടങ്ങളിലാണ് സ്റ്റോപ്പുകള്‍ നിശ്ചയിച്ചിട്ടുള്ളത്.