മന്ത്രിയുടെ ഓഫിസില്‍ നിന്നെന്ന് പറഞ്ഞ് ഫോണ്‍ വിളിച്ച് പോലിസുകാര്‍ക്ക് ശാസന; യുവാവ് അറസ്റ്റില്‍

കോട്ടയ്ക്കല്‍: മന്ത്രിയുടെ ഓഫിസില്‍ നിന്നെന്ന് പറഞ്ഞ് സ്‌റ്റേഷനിലേക്ക് ഫോണ്‍ വിളിച്ച് പോലിസുകാരെ ശാസിച്ച യുവാവ് അറസ്റ്റില്‍. കോട്ടയ്ക്കല്‍ അരിച്ചോള്‍ തട്ടാരതൊടി സനൂപി (28) നെയാണ് അറസ്റ്റ് ചെയ്തത്. പണം തട്ടിയ കേസില്‍ പോലീസ് വീട്ടില്‍ അന്വേഷിച്ചുവന്നതിലുള്ള ദേഷ്യത്തിനാണ് സനൂപ് മന്ത്രിയുടെ പേര് ദുരുപയോഗം ചെയ്തത്. സ്റ്റേഷനില്‍നിന്ന് അപ്പോള്‍ത്തന്നെ മന്ത്രിയുടെ ഓഫീസുമായി ബന്ധപ്പെട്ടതോടെയാണ് സനൂപിന്റെ കള്ളി വെളിച്ചത്തായത്.

ബിടെകിന് പ്രവേശനം വാങ്ങിത്തരാമെന്നു വിശ്വസിപ്പിച്ച് പണംതട്ടിയെന്ന് സനൂപിനെതിരേ കോട്ടയ്ക്കല്‍ സ്റ്റേഷനില്‍ പരാതി ഉണ്ടായിരുന്നു. ഇത് അന്വേഷിക്കാന്‍ പോലീസ് സനൂപിന്റെ വീട്ടിലെത്തി. പോലീസുകാര്‍ വീട്ടില്‍നിന്നിറങ്ങി കുറച്ച് സമയത്തിന് ശേഷം കോട്ടയ്ക്കല്‍ സ്റ്റേഷനിലേക്ക് മന്ത്രി പി. രാജീവിന്റെ ഓഫീസില്‍നിന്നാണെന്നു പറഞ്ഞ് ഫോണ്‍ വന്നു. സനൂപിന്റെ വീട്ടിലേക്കു പോയ പോലീസുകാരുടെ തൊപ്പി തെറിപ്പിക്കുമെന്നും ഞങ്ങള്‍ ഭരിക്കുന്ന പാര്‍ട്ടിയാണെന്നും പറഞ്ഞ് അസഭ്യം പറഞ്ഞു.

സ്റ്റേഷനില്‍നിന്ന് അപ്പോള്‍ത്തന്നെ മന്ത്രിയുടെ ഓഫീസുമായി ബന്ധപ്പെട്ടു. വന്ന കോള്‍ ഏതു നമ്പറില്‍നിന്നാണെന്നും അന്വേഷിച്ചു. അത് സനൂപിന്റെ ഫോണില്‍നിന്നുതന്നെയാണെന്നു കണ്ടെത്തി. ഇതോടെ പാറാവ് ഡ്യൂട്ടിയിലുണ്ടായിരുന്ന പോലീസുദ്യോഗസ്ഥന്റെ പരാതിയില്‍ ആള്‍മാറാട്ടത്തിനു കേസെടുത്തു. സനൂപിനെ സ്റ്റേഷനിലേക്കു വിളിച്ചുവരുത്തി അറസ്റ്റ് രേഖപ്പെടുത്തി ജാമ്യത്തില്‍ വിട്ടു.