തീവണ്ടിയില് നിന്ന് പൊതികള് വലിച്ചെറിയുന്നത് കണ്ടു; പൊലീസിനെ വിളിച്ച് നാട്ടുകാര്; കഞ്ചാവ് പൊതികളുമായി യുവതി പിടിയില്
കൊച്ചി: ട്രെയിനില് നിന്ന് എറിഞ്ഞു കൊടുത്ത കഞ്ചാവ് പൊതികളുമായി യുവതി പിടിയില്. ഒഡീഷ കണ്ഡമാല് സ്വദേശിനി ശാലിനി ബല്ലാര് സിങ്ങിനെ (24)യാണ് നെടുമ്പാശേരി പൊലീസ് പിടികൂടിയത്. ഞായറാഴ്ച പുലര്ച്ചെ നെടുവന്നൂരാണ് സംഭവം.
തീവണ്ടിയില് നിന്ന് എന്തോ പൊതികള് വലിച്ചെറിയുന്നത് കണ്ട് നാട്ടുകാര് പൊലീസിനെ വിളിച്ചറിയിക്കുകയായിരുന്നു. തുടര്ന്ന് പൊലീസ് സ്ഥലത്തെത്തിയപ്പോള് പൊതികള് ശേഖരിച്ച് പോകുന്ന യുവതിയെയാണ് കണ്ടത്. യുവതിയുടെ ബാഗില് നാല് പൊതികളിലായി തീവണ്ടിയില് നിന്നും എറിഞ്ഞു കൊടുത്ത എട്ട് കിലോ കഞ്ചാവാണ് ഉണ്ടായിരുന്നത്.
റെയില്വേ സ്റ്റേഷനുകളില് പരിശോധന ശക്തമാക്കിയതോടെയാണ് കഞ്ചാവ് കടത്തുകാര് പുതിയതന്ത്രം പരീക്ഷിച്ചത്. ആളൊഴിഞ്ഞ സ്ഥലം നേരത്തെ കണ്ടുവയ്ക്കും. തീവണ്ടിയില് കൊണ്ടുവരുന്ന കഞ്ചാവ് ആ ഭാഗത്ത് എത്തുമ്പോള് പുറത്തേക്ക് എറിയും. അവിടെ കാത്തു നില്ക്കുന ആളുകള് കഞ്ചാവുമായി സ്ഥലം വിടും. പിടിയിലായ യുവതി നേരത്തെ ഈ രീതിയില് കഞ്ചാവ് കടത്തിയിട്ടുണ്ടോയെന്ന് പൊലീസ് അന്വേഷിക്കുന്നുണ്ട്.