തെരഞ്ഞെടുപ്പ് വിജയാഘോഷം; മുന്കൂര് അനുമതി വാങ്ങണമെന്ന് മലപ്പുറം എസ്പി
മലപ്പുറം: തദ്ദേശ തെരഞ്ഞെടുപ്പ് വിജയാഘോഷവുമായി ബന്ധപ്പെട്ട് നിര്ദേശങ്ങളുമായി മലപ്പുറം എസ്പി. ആഹ്ലാദ പ്രകടനങ്ങളുടെ ഭാഗമായി ക്രമസമാധാന ലംഘനം ഉണ്ടാക്കരുതെന്നും ആഘോഷങ്ങള്ക്ക് ബന്ധപ്പെട്ട അധികാരികളുടെ മുന്കൂര് അനുമതി ഉറപ്പാക്കണമെന്നുമാണ് നിര്ദേശം. കൂടാതെ പാര്ട്ടി/ സംഘടനയുടെ ഉത്തരവാദപ്പെട്ട ഭാരവാഹികള് ഉണ്ടായിരിക്കണം, പ്രകടനങ്ങളില് നാസിക്ക് ഡോള് മറ്റു മാരക ശബ്ദ മലിനീകരണം വരുത്തുന്ന വസ്തുക്കള്, ഉപകരണങ്ങള് എന്നിവ ഉപയോഗിക്കരുത്, വിജയാഘോഷ പരിപാടികളുടെ ഭാഗമായി ലോറികളിലും മറ്റും ആളുകളെ അപകടകരമാം വിധം കൊണ്ടുപോകുന്നത് പ്രത്യേകിച്ച് കുട്ടികളെ കൊണ്ടുപോകുന്നത് ഒഴിവാക്കണം, വിജയാഘോഷ പരിപാടികളുടെ ഭാഗമായി പൊതുനിരത്തില് ബൈക്കുകളില് അഭ്യാസ പ്രകടനങ്ങള് നടത്തരുത്, അനധികൃതമായി രൂപ മാറ്റം വരുത്തിയ വാഹനങ്ങള് ഉപയോഗിക്കാന് പാടില്ല എന്നിവയാണ് നിര്ദേശങ്ങള്.
തദ്ദേശ തെരഞ്ഞെടുപ്പില് നാളെയാണ് വോട്ടെണ്ണല്. രാഷ്ട്രീയ കേരളം ഉറ്റുനോക്കുന്ന ഒരു ദിവസമാണ് നാളെ. ആര് വാഴും ആര് വീഴും എന്നറിയുന്നതിന് മണിക്കൂറുകള് മാത്രമാണ് ബാക്കി. ആദ്യ പത്ത് മിനിറ്റിനുളളില് ഫലസൂചനകള് ലഭിക്കുമെന്ന് സംസ്ഥാന തെരഞ്ഞെടുപ്പ് കമ്മീഷണര് എ.ഷാജഹാന് പറഞ്ഞു. രാവിലെ എട്ടു മണി മുതലാണ് വോട്ടെണ്ണല്. രാവിലെ എട്ടരയ്ക്കുള്ളില് ആദ്യഫലങ്ങള് വന്നു തുടങ്ങും. ഗ്രാമപഞ്ചായത്ത്, മുനിസിപ്പാലിറ്റികളുടെ ഫലങ്ങള് ആദ്യമറിയാം. സംസ്ഥാനത്ത് ആകെ 244 വോട്ടെണ്ണല് കേന്ദ്രങ്ങളാണ് ഉള്ളത്. ത്രിതല പഞ്ചായത്തുകളുടേത് ബ്ലോക്ക് തലത്തിലുള്ള കേന്ദ്രങ്ങളിലും മുനിസിപ്പാലിറ്റികളുടെയും കോര്പേറേഷനുകളുടെയും അതാത് കേന്ദ്രങ്ങളിലും വോട്ടെണ്ണും. വാര്ഡുകളുടെ ക്രമ നമ്പര് അനുസരിച്ചായിരിക്കും വോട്ടെണ്ണല്. തപാല് വോട്ടുകള് ആദ്യമെണ്ണും.