സംസ്ഥാനത്ത് വീണ്ടും മരണാനന്തര അവയവദാനം; അഞ്ച് പേര്ക്ക് പുതുജീവനേകി കൃഷ്ണലാല് യാത്രയായി; രണ്ടുമാസത്തിനിടെ കേരളത്തില് നടക്കുന്ന അഞ്ചാമത്തെ അവയവദാനം
തിരുവനന്തപുരം: ഉറ്റവരുടെ തീരാവേദനയുടെ നിമിഷങ്ങളിലും ആറുപേര്ക്ക് പുതുജീവന് സമ്മാനിച്ച് തിരുവനന്തപുരം സ്വദേശിയായ കൃഷ്ണലാല് യാത്രയായി. അപകടത്തില് മസ്തിഷ്കമരണം സംഭവിച്ച മുപ്പത്തിമൂന്നുകാരന് കൃഷ്ണ ലാലിന്റെ ആറ് അവയവങ്ങള് ദാനം ചെയ്യും. കിംസ് ആശുപത്രിയില് വെന്റിലേറ്ററില് ചികിത്സയില് ആയിരിക്കവെയാണ് മസ്തിഷ്ക മരണം സംഭവിച്ചത്. വാഹനാപകടത്തില് പരിക്കേറ്റ് ചികിത്സയിലിരിക്കെ മസ്തിഷ്കമരണം സംഭവിച്ച കൃഷ്ണലാലിന്റെ ആറ് അവയവങ്ങളാണ് കുടുംബത്തിന്റെ സമ്മതത്തോടെ ദാനം ചെയ്യുന്നത്. കൃഷ്ണലാലിന്റെ ഹൃദയം, രണ്ട് വൃക്കകള്, കരള്, നേത്രപടലങ്ങള് എന്നിവ വഴി ആറോളം പേര്ക്കാണ് പുതുജീവന് ലഭിക്കുന്നത്.
ഏപ്രില് ഒന്നിന് തിരുവനന്തപുരം ഒരുവാതില്ക്കോട്ടയില് വെച്ചുണ്ടായ അപകടത്തിലാണ് വെല്ഡിങ് തൊഴിലാളിയായ കൃഷ്ണലാലിന് ഗുരുതരമായി പരിക്കേറ്റത്. അദ്ദേഹം സഞ്ചരിച്ചിരുന്ന സൈക്കിള് കാറുമായി കൂട്ടിയിടിക്കുകയായിരുന്നു. ഉടന് തന്നെ തിരുവനന്തപുരത്തെ കിംസ് ആശുപത്രിയില് പ്രവേശിപ്പിച്ചെങ്കിലും ആരോഗ്യനില വഷളാവുകയും വെന്റിലേറ്റര് സഹായത്തോടെ ചികിത്സ തുടരുകയുമായിരുന്നു. എന്നാല് വിദഗ്ധ പരിശോധനകള്ക്കൊടുവില് മസ്തിഷ്കമരണം സ്ഥിരീകരിച്ചതോടെ അവയവങ്ങള് ദാനം ചെയ്യാന് കുടുംബം മുന്നോട്ടുവരികയായിരുന്നു.
കൃഷ്ണലാലിന്റെ ഹൃദയം കോട്ടയം മെഡിക്കല് കോളേജില് ചികിത്സയിലുള്ള രോഗിക്കായി എയര് ആംബുലന്സ് വഴി എത്തിച്ചു. ഉച്ചയ്ക്ക് ഒരു മണിയോടെ തിരുവനന്തപുരത്ത് നിന്ന് പുറപ്പെട്ട ഹൃദയം അതിവേഗം കോട്ടയത്തെത്തിച്ച് ശസ്ത്രക്രിയ നടപടികളിലേക്ക് കടന്നു. ഒരു വൃക്ക തിരുവനന്തപുരം മെഡിക്കല് കോളേജിലേക്കും മറ്റൊരു വൃക്കയും കരളും കിംസ് ആശുപത്രിയിലെ തന്നെ രോഗികള്ക്കുമാണ് നല്കുന്നത്. കൃഷ്ണലാലിന്റെ കണ്ണുകള് തിരുവനന്തപുരം കണ്ണാശുപത്രിക്ക് കൈമാറി.
രണ്ടുമാസത്തിനിടെ കേരളത്തില് നടക്കുന്ന അഞ്ചാമത്തെ അവയവദാനമാണിത്. തന്റെ കഠിനാധ്വാനം കൊണ്ട് കുടുംബം പുലര്ത്തിയിരുന്ന ഒരു സാധാരണ തൊഴിലാളിയുടെ വിയോഗം നാടിനെ ദുഃഖത്തിലാഴ്ത്തുമ്പോഴും, ആറ് പേര്ക്ക് ജീവിതത്തിലേക്ക് തിരിച്ചുവരാന് അവസരമൊരുക്കിയ കൃഷ്ണലാലിന്റെയും കുടുംബത്തിന്റെയും തീരുമാനം വലിയ ആദരവോടെയാണ് സമൂഹം നോക്കിക്കാണുന്നത്. സംസ്കാര ചടങ്ങുകള് ഔദ്യോഗിക ബഹുമതികളോടെ പിന്നീട് നടക്കും.