വേറിട്ട വേഷവുമായി അനുപമ; കൂടെ തകർത്തഭിനയിച്ച് ദർശനയും; 'പര്‍ദ്ദ' ഒടിടി സ്ട്രീമിങ്ങ് ആരംഭിച്ചു; സ്ത്രീപക്ഷ സിനിമയെന്ന് കണ്ടവർ
ഹൈദരാബാദ്: അനുപമ പരമേശ്വരനും ദർശന രാജേന്ദ്രനും പ്രധാന വേഷങ്ങളിൽ എത്തിയ 'പർദ്ദ' എന്ന തെലുങ്ക് ചിത്രം ആമസോൺ പ്രൈം വഴി ഒടിടിയിൽ സ്ട്രീമിംഗ് ആരംഭിച്ചു. ഓഗസ്റ്റ് 22-ന് റിലീസ് ചെയ്ത ചിത്രം മികച്ച സ്ത്രീപക്ഷ സിനിമയാണെന്നാണ് പ്രേക്ഷക പ്രതികരണങ്ങൾ സൂചിപ്പിക്കുന്നത്. പ്രവീൺ കന്ദ്രേഗുല സംവിധാനം ചെയ്യുന്ന ചിത്രത്തിന്റെ നിർമ്മാണം ആനന്ദ മീഡിയയുടെ ആദ്യ തെലുങ്ക് സംരംഭമാണ്. സംഗീതയും ചിത്രത്തിൽ ഒരു പ്രധാന വേഷം കൈകാര്യം ചെയ്യുന്നുണ്ട്.
ഹൃദയം, ജയ ജയ ഹേ തുടങ്ങിയ ചിത്രങ്ങളിലൂടെ ശ്രദ്ധേയയായ ദർശന രാജേന്ദ്രന്റെ ആദ്യ തെലുങ്ക് ചിത്രം കൂടിയാണ് 'പർദ്ദ'. മെയിൽ ഹൈദരാബാദിൽ ചിത്രീകരണം പൂർത്തിയായ സിനിമയുടെ പ്രധാന ലൊക്കേഷനുകൾ ദില്ലി, ഹിമാചൽ പ്രദേശ്, ഗ്രാമീണ മേഖലകൾ എന്നിവിടങ്ങളായിരുന്നു. ദർശനയുടെ അവസാന മലയാള ചിത്രം ആഷിക് അബു സംവിധാനം ചെയ്ത 'റൈഫിൾ ക്ലബ്' ആയിരുന്നു. അനുപമയുടെ അവസാന മലയാള ചിത്രം സുരേഷ് ഗോപി നായകനായ ജെ.എസ്.കെ. ആണ്. മാരി സെൽവരാജ് സംവിധാനം ചെയ്യുന്ന ധ്രുവ് വിക്രം ചിത്രം 'ബൈസൺ' ആണ് അനുപമയുടെ പ്രധാന വരാനിരിക്കുന്ന ചിത്രം.
രോഹിത് കോപ്പുവാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർ. ഗോപി സുന്ദറാണ് സംഗീതം നൽകിയിരിക്കുന്നത്. പൂജിത ശ്രീകാന്തും പ്രഹാസ് ബൊപ്പുടിയുമാണ് തിരക്കഥ രചിച്ചിരിക്കുന്നത്. കൃഷ്ണ പ്രത്യുഷയാണ് സ്ക്രിപ്റ്റ് കോർഡിനേറ്റർ. മൃദുൽ സുജിത് ഛായാഗ്രഹണവും ധർമേന്ദ്ര കകരള എഡിറ്റിംഗും നിർവ്വഹിച്ചു. വരുൺ വേണുഗോപാൽ സൗണ്ട് ഡിസൈൻ കൈകാര്യം ചെയ്യുന്നു. ശ്രീനിവാസ് കലിംഗയാണ് കലാസംവിധായകൻ.