2050 ഓടെ കേരളത്തെ കാര്‍ബണ്‍ ന്യൂട്രലാക്കുക ലക്ഷ്യമെന്ന് മുഖ്യമന്ത്രി; സീഡ് ബോള്‍ നിര്‍മാണം വേള്‍ഡ് ബുക്ക് ഓഫ് റെക്കോര്‍ഡ്‌സിലേക്ക്
തിരുവനന്തപുരം: 2050 ഓടെ കേരളത്തെ കാര്‍ബണ്‍ ന്യൂട്രലാക്കുകയാണ് ലക്ഷ്യമെന്ന് മുഖ്യമന്ത്രി പിണറായി വിജയന്‍. സുസ്ഥിര വികസന പദ്ധതികളുടെ ഭാഗമായി തിരുവനന്തപുരം നഗരസഭ നടപ്പിലാക്കുന്ന സീഡ് ബോള്‍ നിര്‍മ്മാണത്തിന്റെ ഉദ്ഘാടനവും ഗ്രീന്‍ ബജറ്റ് 2025 ന്റെ പ്രകാശനവും പുത്തരിക്കണ്ടം മൈതാനത്തു നിര്‍വഹിച്ചു സംസാരിക്കുകയായിരുന്നു മുഖ്യമന്ത്രി.
കേരളത്തില്‍ ആദ്യമായി ഗ്രീന്‍ ബജറ്റ് നടപ്പാക്കുന്ന നഗരം എന്ന സ്ഥാനം തിരുവനന്തപുരം സ്വന്തമാക്കുകയാണ്. കാര്‍ബണ്‍ ബഹിര്‍ഗമനത്തെ പരിമിതപ്പെടുത്താനായി നഗരത്തില്‍ നടപ്പിലാക്കുന്ന പ്രവര്‍ത്തനങ്ങളാണ് ഗ്രീന്‍ ബജറ്റില്‍ വ്യക്തമാക്കുന്നത്. ഇത് മറ്റു തദ്ദേശ സ്ഥാപനങ്ങള്‍ക്ക് മാതൃകയാണ്. കാലാവസ്ഥാ വ്യതിയാനം, പ്രകൃതി ക്ഷോഭം തുടങ്ങിയ ഒട്ടേറെ വിഷയങ്ങളെക്കുറിച്ച് ലോകത്തെമ്പാടും ചര്‍ച്ചകള്‍ നടക്കുന്നുണ്ട്. എന്നിരുന്നാലും കാലാവസ്ഥാ വ്യതിയാനത്തെ ചെറുക്കുന്നതിന് പൊതുവായ യോജിപ്പ് അന്താരാഷ്ട തലത്തില്‍ ഉയര്‍ന്നു വരുന്നില്ല. യുഎന്‍ ക്ലൈമറ്റ് ചെയ്ഞ്ച് കോണ്‍ഫറന്‍സിലും വ്യക്തമായ മാര്‍ഗരേഖകളൊന്നും രൂപീകരിച്ചില്ല. അതിനൊന്നും കാത്തുനില്‍ക്കാതെയാണ് നാം നടപടികളിലേക്ക് കടക്കുന്നതെന്ന് മുഖ്യമന്ത്രി പറഞ്ഞു.
ഇലക്ട്രിക് വാഹനങ്ങള്‍ക്ക് പ്രോത്സാഹനം നല്‍കുന്നുണ്ട്. ഗ്രീന്‍ ഹൈഡ്രജന്‍ ഹബ്ബുകളും പുനരുപയോഗ ഊര്‍ജ സ്രോതസുകളും ഉപയോഗപ്പെടുത്തുന്നുണ്ട്. തിരുവനന്തപുരത്തെ സോളാര്‍ നഗരമാക്കുന്നതിനുള്ള നഗരസഭയുടെ പ്രവര്‍ത്തനം അഭിനന്ദനീയമാണ്. 125 കോടി രൂപ ചെലവിലാണ് സര്‍ക്കാര്‍ ഓഫീസ് കെട്ടിടങ്ങളില്‍ നരഗസഭ സൗരോര്‍ജ പാനലുകള്‍ സ്ഥാപിക്കുന്നത്. ഇലക്ട്രിക് ബസ് വാങ്ങാനായി. 100 ഇലക്ട്രിക് ഓട്ടോറിക്ഷകള്‍ നഗരസഭ വാങ്ങി വിതരണം ചെയ്തു. ഇത്തരത്തിലുളള പ്രവര്‍ത്തനങ്ങളിലൂടെ അതിവേഗം വികസിക്കുന്ന നഗരങ്ങളില്‍ ഒന്നാമതാകാന്‍ തിരുവനന്തപുരത്തിന് കഴിയുമെന്നും മുഖ്യമന്ത്രി പറഞ്ഞു.
സീഡ് ബോള്‍ കാംപെയിന്‍ ആറായിരം വിദ്യാര്‍ഥികളെ പങ്കെടുപ്പിക്കാനാണ് തീരുമാനിച്ചത്. എന്നാല്‍ ആയിരം വിദ്യാര്‍ത്ഥികള്‍ അധികമായെത്തുകയും ഇവര്‍ തയ്യാറാക്കിയ സീഡ് ബോളുകള്‍ ഗ്രീന്‍ ട്രിവാന്‍ഡ്രം എന്ന ആശയം മുന്‍നിര്‍ത്തി ഓഫീസ് പരിസരങ്ങളിലും തരിശുഭൂമിയിലുമാണ് നിക്ഷേപിക്കുന്നത്. നാലു ലക്ഷം സീഡ് ബോളുകള്‍ നഗരത്തിന്റെ വിവിധ ഇടങ്ങളില്‍ നിക്ഷേപിക്കുന്നതിലൂടെ നമ്മുടെ നാട്ടില്‍ വന്‍തോതില്‍ മരങ്ങള്‍ വളരാനിടയാകും. ഇത്തരത്തില്‍ പാരിസ്ഥിതിക വെല്ലുവിളികളെ അതിജീവിക്കുന്നതിനായി നാം ഏറ്റെടുത്തു നടത്തുന്ന പ്രവര്‍ത്തനങ്ങളിലൂടെ നല്ലതോതില്‍ പരിസ്ഥിതി സൗഹൃദ അവബോധം സൃഷ്ടിക്കാനാകുമെന്നും മുഖ്യമന്ത്രി വ്യക്തമാക്കി.
നഗരസഭ തയ്യാറാക്കിയ ഗ്രീന്‍ ബജറ്റ് മുഖ്യമന്ത്രി മേയര്‍ ആര്യ രാജേന്ദ്രന് നല്‍കി പ്രകാശനം ചെയ്തു. തലസ്ഥാനത്തെ കാര്‍ബണ്‍ രഹിതമാക്കുന്നതിനായി വിദ്യാര്‍ത്ഥികള്‍ കൈകോര്‍ത്ത സീഡ് ബോള്‍ നിര്‍മ്മാണം വേള്‍ഡ് ബുക്ക് ഓഫ് റെക്കോര്‍ഡ്‌സിലേക്ക് പരിഗണിക്കപ്പെട്ടതിന്റെ പ്രൊവിഷണല്‍ സര്‍ട്ടിഫിക്കറ്റ് വേള്‍ഡ് ബുക്ക് ഓഫ് റെക്കോര്‍ഡ്‌സ് ഇന്ത്യ പ്രതിനിധി റെനീഷ് മേയര്‍ ആര്യ രാജേന്ദ്രന് കൈമാറി.
മേയര്‍ ആര്യ രാജേന്ദ്രന് അദ്ധ്യക്ഷനായിരുന്ന ചടങ്ങില്‍ നഗരസഭ ഡെപ്യൂട്ടി സ്പീക്കര്‍ പി കെ രാജു സ്വാഗതം ആശംസിച്ചു. വിദ്യാഭ്യാസ ഡെപ്യൂട്ടി ഡയറക്ടര്‍ ശ്രീജ ഗോപിനാഥ്, എച്ച്എല്‍എല്‍ ലൈഫ് കെയര്‍ ലിമിറ്റഡ് ഡെപ്യൂട്ടി വൈസ് പ്രസിഡന്റ് ഡോ. നീരീഷ് പി.എച്ച്, നഗരസഭ സെക്രട്ടറി ജഹാംഗീര്‍ എസ്, സ്റ്റാന്റിംഗ് കമ്മിറ്റികളുടെ ചെയര്‍പേഴ്‌സണ്‍മാര്‍ തുടങ്ങിയവര്‍ സംബന്ധിച്ചു.