വാണിയംകുളത്ത് ശക്തമായ മലവെള്ളപ്പാച്ചിൽ; വീടുകളുടെ മതിൽ ഇടിഞ്ഞ് താഴ്ന്നു; ഉരുൾ പൊട്ടലെന്ന് സംശയം

പാലക്കാട്: വാണിയംകുളം പനയൂരിൽ ഉണ്ടായ ശക്തമായ മലവെള്ളപ്പാച്ചിലിനെ തുടർന്ന് പ്രദേശവാസികൾ ആശങ്കയിൽ. ഉരുൾ പൊട്ടിയതാണോയെന്നും സംശയമുണ്ട്. ഏഴ് വീടുകളാണ് പ്രദേശത്തുള്ളത്. ഇളങ്കുളത്ത് ഭയാനകമായ ശബ്ദം കേട്ടതായി പ്രദേശവാസികൾ പറഞ്ഞു.

പെട്ടെന്നൊരു ശബ്ദമുണ്ടാകുകയും മലവെള്ളപാച്ചിലുണ്ടാകുകയുമായിരുന്നുവെന്നാണ് പ്രദേശവാസികൾ പറയുന്നത്. വീടുകളുള്ള സ്ഥലത്തിന്റെ മുകൾ ഭാ​ഗത്ത് ഒരു എസ്റ്റേറ്റാണ് ഉള്ളത്. എസ്റ്റേറ്റിലെവിടെയെങ്കിലും ഉരുൾ പൊട്ടിയതാണെയെന്നാണ് സംശയം ഉയരുന്നത്.

ഇതോടെ വീടുകളിൽ നിന്നും ആളുകൾ ഇറങ്ങി ഓടി. വീടുകളുടെ മുറ്റത്ത്‌ മണ്ണും കല്ലുകളും നിറഞ്ഞിട്ടുണ്ട്. മൂന്ന് വീടുകളുടെ മതിൽ ഇടിഞ്ഞ് താഴ്ന്നു. റവന്യു അധികൃതരെ വിവരം അറിയിക്കുകയും അധികൃതർ എത്തി പരിശോധന നടത്തുന്നുണ്ടെന്നുമാണ് വിവരം. നിലവിൽ മറ്റ് അപകടങ്ങളൊന്നും റിപ്പോർട്ട് ചെയ്തിട്ടില്ല. എന്നാൽ ആളുകൾ ആശങ്കയിലാണ്.