ശബരിമല സ്പോട്ട് ബുക്കിംഗ് കൗണ്ടറുകളുടെ എണ്ണം വർധിപ്പിക്കും; 60 വയസ് പൂർത്തിയായവർക്ക് പ്രത്യേക കൗണ്ടര്‍ തുറക്കും; ദേവസ്വം മന്ത്രിയുടെ അവലോകന യോഗത്തിൽ തീരുമാനം
പത്തനംതിട്ട: വലിയ കുഴപ്പങ്ങൾ ഒന്നുമില്ലാതെ മുൻവർഷത്തേക്കാൾ നല്ല രീതിയിൽ മണ്ഡലകാലം കഴിഞ്ഞതിന്റെ ആശ്വാസത്തിലാണ് ഇപ്പോൾ അധികൃതർ. ഈ വർഷവും വരുമാനത്തിൽ നല്ല കുതിപ്പാണ് ഉണ്ടായിരിക്കുന്നത്. ഇപ്പോഴിതാ മകരവിളക്ക് മഹോത്സവത്തിന് മുന്നോടിയായി യോഗത്തിൽ നിർണായക തീരുമാനം.
ശബരിമല തീർത്ഥാടകർക്കായി പമ്പയിലെ സ്പോട്ട് ബുക്കിംഗ് കൗണ്ടറുകളുടെ എണ്ണം വർധിപ്പിക്കും. നിലവിൽ ഏഴ് കൗണ്ടറുകളാണുള്ളത്. അവ പത്താക്കി ഉയർത്തും. 60 വയസ് പൂർത്തിയായവർക്ക് മാത്രമായി പ്രത്യേക കൗണ്ടർ തുറക്കും. ദേവസ്വം മന്ത്രിയുടെ നേതൃത്വത്തിൽ പത്തനംതിട്ടയിൽ ചേർന്ന അവലോകന യോഗത്തിൽ ആണ് തീരുമാനം. ഡിസംബർ മുപ്പതിന് വൈകിട്ടാണ് മകരവിളക്ക് മഹോത്സവത്തിനായി ഇനി ശബരിമല നട തുറക്കുന്നത്. ജനുവരി 14 നായിരിക്കും മകരവിളക്ക് മഹോത്സവം നടക്കുക.
അതേസമയം, ഈ വർഷം കാര്യമായ പരാതികളും പ്രശ്‌നങ്ങളുമില്ലാതെയാണ് ശബരിമലയില്‍ മണ്ഡലകാല സീസണ്‍ പൂര്‍ത്തിയാക്കിയതിന്റെ ആശ്വാസത്തിലാണ് സംസ്ഥാന സര്‍ക്കാര്‍. മുന്‍വര്‍ഷങ്ങളെ അപേക്ഷിച്ച് തീര്‍ത്ഥാടകരുടെ എണ്ണത്തില്‍ വലിയ വര്‍ദ്ധനവുണ്ടായിട്ടും കാര്യമായ പരാതികള്‍ ഉയര്‍ന്നിട്ടില്ല.
വരുമാനത്തിലും ഗണ്യമായ നര്‍ദ്ധനയുണ്ടായതോടെ തിരുവിതാംകൂര്‍ ദേവസ്വം ബോര്‍ഡും വളരെ സന്തോഷത്തിലാണ്. ദേവസ്വം വകുപ്പ് മന്ത്രി വി എൻ വാസവൻ തന്നെ സന്തോഷം പങ്കുവച്ച് രംഗത്തെത്തിയിരുന്നു.