വിദ്യാർത്ഥിനിയെ ഇന്‍റേണൽ മാർക്കിന്‍റെ പേരിൽ പീഡിപ്പിച്ചു; നഗ്ന ചിത്രങ്ങൾ പകർത്തി സമൂഹമാധ്യമങ്ങൾ വഴി പ്രചരിപ്പിക്കുമെന്ന് ഭീഷണിപ്പെടുത്തി; പിടിയിലായത് എന്‍ഐടി അധ്യാപകൻ

കോഴിക്കോട്: കോഴിക്കോട് നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജി (എൻഐടി)യിലെ വിദ്യാർത്ഥിനിയെ ഇൻ്റേണൽ മാർക്കിന്റെ പേരിൽ ഭീഷണിപ്പെടുത്തി ബലാത്സംഗം ചെയ്തെന്ന പരാതിയിൽ അധ്യാപകൻ അറസ്റ്റിൽ. എൻഐടിയിൽ ടീച്ചിങ് അസിസ്റ്റൻ്റായ പാലക്കാട് സ്വദേശി വിഷ്ണു (32)വിനെയാണ് കുന്ദമംഗലം പോലീസ് അറസ്റ്റ് ചെയ്തത്. കളൻതോട് വെച്ചാണ് ഇയാൾ പിടിയിലായത്.

ഈ വർഷം ഏപ്രിൽ മുതൽ വിവിധ ദിവസങ്ങളിലായി കെട്ടാങ്ങലിലെ ഒരു ഹൗസിംഗ് കോംപ്ലക്സിലും കോഴിക്കോട് പൊറ്റമ്മലിലും വെച്ച് വിഷ്ണു വിദ്യാർത്ഥിനിയെ ബലാത്സംഗം ചെയ്തെന്നാണ് പെൺകുട്ടി നൽകിയ പരാതിയിൽ പറയുന്നത്. കൂടാതെ, വിദ്യാർത്ഥിനിയുടെ നഗ്ന ചിത്രങ്ങൾ പകർത്തി സമൂഹമാധ്യമങ്ങൾ വഴി പ്രചരിപ്പിക്കുമെന്ന് ഭീഷണിപ്പെടുത്തിയതായും പരാതിയിൽ പറയുന്നു. പെൺകുട്ടിയുടെ മൊഴിയെടുത്ത ശേഷം പോലീസ് കേസ് രജിസ്റ്റർ ചെയ്യുകയായിരുന്നു.