'ഹേ..പുട്ട് യുവർ വെപ്പൺ ഡൗൺ..; സർ..പ്ലീസ് പുട്ട് യുവർ വെപ്പൺ ഡൗൺ ആൻഡ് നീൽ..!!'; എത്ര പറഞ്ഞിട്ടും ചെവികൊള്ളാതെ നിൽക്കുന്ന സിഖ് യുവാവ്; പോലീസ് ഗൺ പോയിന്റിൽ നിർത്തിയിട്ടും രക്ഷയില്ല; നടുറോഡിൽ വെട്ടുകത്തിയുമായി അഭ്യാസ പ്രകടനം; പൊടുന്നനെ വെടിപൊട്ടുന്ന ശബ്ദം; ഭയന്ന് നിലവിളിച്ച് ആളുകൾ; പേടിപ്പെടുത്തുന്ന ദൃശ്യങ്ങൾ പുറത്ത്

ലോസാഞ്ചലസ്: അമേരിക്കയിലെ ലോസാഞ്ചലസിൽ റോഡരികിൽ മതപരമായ ചടങ്ങുകൾ നടത്തിവുകയായിരുന്ന സിഖ് യുവാവിനെ പൊലീസ് വെടിവച്ചുകൊന്നു. 35 വയസ്സുള്ള ഗുർപ്രീത് സിംഗ് ആണ് കൊല്ലപ്പെട്ടത്. ജൂലൈ 13-നാണ് സംഭവം നടന്നത്. ലോസാഞ്ചലസ് പൊലീസ് ഡിപ്പാർട്ട്‌മെന്റ് പുറത്തുവിട്ട വീഡിയോ ദൃശ്യങ്ങൾ ഇക്കാര്യം സ്ഥിരീകരിക്കുന്നു.

'ഗട്‌ക' എന്നറിയപ്പെടുന്ന സിഖ് മാർഗ്ഗത്തിലുള്ള ആയുധമുപയോഗിച്ചുള്ള അഭ്യാസ പ്രകടനം നടത്തുകയായിരുന്ന ഗുർപ്രീതിനെ പൊലീസ് വളയുകയായിരുന്നു. അമിതമായി സംസാരിക്കുകയും പൊലീസുമായി സഹകരിക്കാതിരിക്കുകയും ചെയ്തതോടെയാണ് വെടിവയ്പ്പ് നടന്നതെന്നാണ് പ്രാഥമിക റിപ്പോർട്ടുകൾ.

ഗുർപ്രീതിന്റെ കൈവശം 'വെട്ടുകത്തി' പോലുള്ള ആയുധം കണ്ടതിനാലാണ് കീഴടങ്ങാൻ ആവശ്യപ്പെട്ടതെന്നും, എന്നാൽ പിന്നീട് അത് സിഖ് മതപരമായ ചടങ്ങുകളിൽ ഉപയോഗിക്കുന്ന ഇരുതല മൂർച്ചയുള്ള കത്തിയാണെന്ന് മനസ്സിലാക്കിയെന്നുമാണ് പൊലീസ് ഭാഷ്യം. വാൾ, കുന്തം, പരിച, വടി തുടങ്ങിയ ആയുധങ്ങൾ ഗട്‌ക അനുഷ്ഠാനങ്ങളിൽ ഉപയോഗിക്കാറുണ്ട്. ഈ ആയുധത്തെ വെട്ടുകത്തിയെന്ന് തെറ്റിദ്ധരിച്ചതാവാം സംഭവത്തിലേക്ക് നയിച്ചതെന്ന് വിലയിരുത്തപ്പെടുന്നു.

സംഭവത്തെക്കുറിച്ച് പൊലീസ് നൽകുന്ന വിശദീകരണം അനുസരിച്ച്, ഗുർപ്രീത് സിംഗ് വഴിയിലൂടെ സഞ്ചരിക്കുന്നവർക്ക് നേരെ കൈവശമുണ്ടായിരുന്ന ആയുധവുമായി എത്തുകയായിരുന്നു. ആയുധം താഴെ വെക്കാൻ ആവശ്യപ്പെട്ടെങ്കിലും ഇയാൾ വഴങ്ങിയില്ല. തങ്ങൾക്ക് നേരെ ആക്രമിക്കാൻ ശ്രമിച്ചതിനാലാണ് വെടിവച്ചതെന്നും, തുടർന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ലെന്നും പൊലീസ് അറിയിച്ചു.

ഈ സംഭവം അമേരിക്കയിൽ വലിയ ചർച്ചകൾക്ക് വഴിവെച്ചിട്ടുണ്ട്. പൊലീസിന്റെ നടപടി പക്ഷപാതപരമാണെന്നും, സാംസ്കാരികപരമായ കാര്യങ്ങളിൽ അറിവില്ലായ്മയാണ് ഇത്തരമൊരു ദുരന്തത്തിലേക്ക് നയിച്ചതെന്നും വിമർശനം ഉയരുന്നുണ്ട്. സംഭവത്തെക്കുറിച്ച് വിശദമായ അന്വേഷണം നടക്കുന്നുണ്ട്. സിഖ് സമൂഹത്തിന്റെ സാംസ്കാരികമായ അവകാശങ്ങളെ മാനിക്കണമെന്നും ഇത്തരം തെറ്റിദ്ധാരണകൾ ഉണ്ടാകാതിരിക്കാൻ പൊലീസിന് പ്രത്യേക പരിശീലനം നൽകണമെന്നും വിവിധ കോണുകളിൽ നിന്ന് ആവശ്യമുയരുന്നുണ്ട്. ഈ സംഭവം അമേരിക്കയിലെ വംശീയ സംഘർഷങ്ങളുടെയും, മതപരമായ സംരക്ഷണത്തിന്റെയും പ്രാധാന്യം വീണ്ടും എടുത്തു കാണിക്കുന്നു.