ലണ്ടൻ നഗരത്തിന്റെ ഇരട്ടിയിലധികം വലിപ്പം; ഏകദേശം ഒരു ട്രില്യൺ ടൺ ഭാരം; ലോകത്തെ തന്നെ ആശങ്കയിലാക്കി അറ്റ്ലാൻ്റിക് സമുദ്രത്തിൽ ഒരു അസാധാരണ കാഴ്ച; കൂറ്റൻ മഞ്ഞുപാളി കഷ്ണങ്ങളായി അടർന്ന് കടലിൽ അലിഞ്ഞുതീരുന്നു; ജീവജാലങ്ങൾക്ക് വൻ ഭീഷണി; ജാഗ്രത മുന്നറിയിപ്പുമായി വിദഗ്ധർ

ലണ്ടൻ: ലോകത്തിലെ ഏറ്റവും വലിയ ഹിമാനിയായ 'എ 23 എ' (A23a) അതിൻ്റെ അവസാന നാളുകളിലേക്ക്. ഒരിക്കൽ ഗ്രേറ്റർ ലണ്ടൻ്റെ ഇരട്ടി വലുപ്പമുണ്ടായിരുന്ന, ഒരു ട്രില്യൺ ടൺ ഭാരമുണ്ടായിരുന്ന ഈ കൂറ്റൻ മഞ്ഞുപാളി, ഇപ്പോൾ ചെറിയ കഷണങ്ങളായി പിരിഞ്ഞ് സമുദ്രത്തിൽ അലിഞ്ഞുതീരുകയാണ്. ചൂടുള്ള ജലാശയങ്ങളിലെ തീവ്രമായ ഉരുകൽ പ്രക്രിയയും തിരമാലകളുടെ ആഘാതവും കാരണം, ഈ കൂറ്റൻ ഹിമാനി 'ചീഞ്ഞഴിയുകയാണെന്ന്' വിദഗ്ധർ പറയുന്നു.

ഈ വർഷമാദ്യം ഏകദേശം 1,540 ചതുരശ്ര മൈൽ വിസ്തീർണ്ണമുണ്ടായിരുന്ന 'എ 23 എ', ഇപ്പോൾ 683 ചതുരശ്ര മൈലായി ചുരുങ്ങിയിട്ടുണ്ട്. ഇതിൻ്റെ വീതി 37 മൈലായി കുറഞ്ഞുവെന്നും, ഇത് അതിൻ്റെ യഥാർത്ഥ വലുപ്പത്തിൻ്റെ പകുതിയിൽ താഴെയാണെന്നും സാങ്കേതിക വിദഗ്ധർ നടത്തിയ ഉപഗ്രഹ ചിത്രങ്ങളുടെ വിശകലനത്തിൽ വ്യക്തമാക്കുന്നു. അടുത്തിടെ, ഏകദേശം 150 ചതുരശ്ര മൈൽ വലുപ്പമുള്ള വലിയ കഷണങ്ങൾ ഇതിൽ നിന്ന് അടർന്നുമാറിയിരുന്നു.

ദക്ഷിണ അറ്റ്ലാൻ്റിക് സമുദ്രത്തിലൂടെ മാസങ്ങളായി വടക്കോട്ട് സഞ്ചരിച്ചുകൊണ്ടിരുന്ന ഈ ഹിമാനി, ഇപ്പോൾ ചൂടുള്ള ജലാശയങ്ങളിലേക്ക് പ്രവേശിച്ചതോടെ അതിൻ്റെ ഘടനയിൽ കാര്യമായ മാറ്റങ്ങൾ സംഭവിച്ചുകൊണ്ടിരിക്കുകയാണ്. ബ്രിട്ടീഷ് അന്റാർട്ടിക്ക് സർവേയിലെ (BAS) ഭൗതിക സമുദ്രശാസ്ത്രജ്ഞനായ ആൻഡ്രൂ മീജേഴ്‌സ് പറയുന്നതനുസരിച്ച്, 'എ 23 എ' അതിൻ്റെ വടക്കോട്ടുള്ള യാത്രയിൽ നാടകീയമായ രീതിയിൽ വിഘടിച്ചുകൊണ്ടിരിക്കുകയാണ്. "ഇത് വളരെ വേഗത്തിൽ അലിഞ്ഞുകൊണ്ടിരിക്കുകയാണ്. ഇതിൻ്റെ അടിഭാഗം ഏതാണ്ട് ചീഞ്ഞഴിയുന്ന അവസ്ഥയിലാണ്. വളരെ ചൂടുള്ള ജലാശയത്തിൽ ഇത് പിടിച്ചുനിൽക്കാൻ സാധ്യതയില്ല," അദ്ദേഹം കൂട്ടിച്ചേർത്തു.

സമുദ്രശാസ്ത്രജ്ഞരുടെ കണക്കനുസരിച്ച്, 'എ 23 എ' ലോകത്തിലെ ഏറ്റവും പഴക്കമേറിയതും വലുതുമായ ഹിമാനികളിൽ ഒന്നാണ്. 37 വർഷത്തോളം അന്റാർട്ടിക്കയിലെ വെഡ്ഡൽ കടലിൽ തറയിൽ ഉറച്ചുനിന്ന ശേഷം 2020-ലാണ് ഇത് വീണ്ടും സമുദ്രത്തിലേക്ക് നീങ്ങാൻ തുടങ്ങിയത്. ഇതിൻ്റെ ഭാരം ഏകദേശം ഒരു ട്രില്യൺ ടൺ വരും, ഇത് പാരീസിലെ ഈഫൽ ടവറിൻ്റെ 100 മില്യൺ ഇരട്ടിയാണ്.

"എ 23 എ" എന്ന കൂറ്റൻ മഞ്ഞുപാളി സമുദ്രത്തിൽ അലിഞ്ഞുതീരുന്ന ഈ പ്രക്രിയ, ലോകമെമ്പാടുമുള്ള പരിസ്ഥിതി പ്രവർത്തകർക്ക് ആശങ്കയുളവാക്കുന്നു. ഹിമാനികൾ അലിഞ്ഞുതീരുന്നത് സമുദ്രനിരപ്പ് ഉയരാൻ കാരണമാകുമെന്നും, ഇത് തീരപ്രദേശങ്ങളെയും സമുദ്ര ആവാസവ്യവസ്ഥയെയും പ്രതികൂലമായി ബാധിക്കുമെന്നും അവർ മുന്നറിയിപ്പ് നൽകുന്നു. ഇത്തരം കൂറ്റൻ മഞ്ഞുപാളികൾ വിഘടിക്കുന്നത് അവയുടെ വാസസ്ഥലങ്ങളെയും അവിടത്തെ ജീവജാലങ്ങളെയും ഗുരുതരമായി ബാധിക്കുമെന്നും വിലയിരുത്തപ്പെടുന്നു.

"ഇതുവരെ കണ്ടിട്ടുള്ളതിൽ വെച്ച് ഏറ്റവും ഭീമാകാരമായ ഒന്നാണിത്. നിങ്ങൾക്ക് എത്ര ദൂരം കണ്ണെത്തുമോ അത്രയും ദൂരം ഇത് വ്യാപിച്ചുകിടക്കുന്നു," EYOS എന്ന കമ്പനിയിലെ വീഡിയോഗ്രാഫർ റിച്ചാർഡ് സൈഡി 'എ 23 എ' യെക്കുറിച്ച് വിവരിച്ചു.

'എ 23 എ'യുടെ നാശം, സമുദ്രത്തിലെ താപനില വർദ്ധിക്കുന്നതിൻ്റെയും കാലാവസ്ഥാ വ്യതിയാനത്തിൻ്റെയും ഒരു സൂചനയായി കണക്കാക്കപ്പെടുന്നു. ലോകത്തിലെ ഏറ്റവും വലിയ ഹിമാനിയുടെ വിഘടനം, സമീപ ആഴ്ചകൾക്കുള്ളിൽ പൂർണ്ണമായും സംഭവിക്കുമെന്നും, ഇത് അതിൻ്റെ അസ്തിത്വത്തിൻ്റെ അവസാനമായിരിക്കുമെന്നും ശാസ്ത്രജ്ഞർ പ്രവചിക്കുന്നു.