'പാര്ട്ടി വഴിയുണ്ടായ ബന്ധം മാത്രമേ രാഹുലുമായുള്ളൂ; പിന്തുണച്ചത് രാഷ്ട്രീയമായി മാത്രം; വ്യക്തിപരമായി ചെയ്യുന്ന കാര്യങ്ങളില് തനിക്ക് ഉത്തരവാദിത്തമില്ല; ക്രിമിനല് സ്വഭാവം ഉള്ള പരാതി ആ സമയത്ത് രേഖ മൂലം കിട്ടിയിട്ടില്ല'; രാഹുല് മാങ്കൂട്ടത്തിലിനെ ഒടുവില് തള്ളിപ്പറഞ്ഞ് ഷാഫി പറമ്പില്
കോഴിക്കോട്: രാഹുല് മാങ്കൂട്ടത്തിലിനെ പിന്തുണച്ചത് രാഷ്ട്രീയമായി മാത്രമാണെന്ന് ഷാഫി പറമ്പില് എം പി. രാഹുല് വ്യക്തിപരമായി ചെയ്യുന്ന കാര്യങ്ങളില് തനിക്ക് ഉത്തരവാദിത്തമില്ലെന്നും ഷാഫി മാധ്യമങ്ങളോട് പറഞ്ഞു. രാഹുല് മാങ്കൂട്ടത്തിലുമായി വ്യക്തിപരമായി ഉണ്ടായിരുന്ന സൗഹൃദത്തെ പാര്ട്ടിയിലേക്ക് കൊണ്ട് വന്നിട്ടില്ല. രാഹുലിന്റെ സംഘടന പ്രവര്ത്തനത്തിലെ മികവ് പരിഗണിച്ചു. വ്യക്തിപരമായി ആരിലേക്കും ചൂഴ്ന്നിറങ്ങിയിട്ടില്ല. ആ സമയത്ത് ക്രിമിനല് പരാതികള് ഉണ്ടായിട്ടില്ലെന്നും രാഹുലിനെ രാഷ്ട്രീയമായി മാത്രമാണ് പിന്തുണച്ചതെന്നും അദ്ദേഹം പറഞ്ഞു.
രാഹുല് മാങ്കൂട്ടത്തിലിന്റെ വിഷയത്തില്, കോണ്ഗ്രസ് പാര്ട്ടിയില് നിന്ന് വേറിട്ട ഒരു നിലപാട് തനിക്കില്ലെന്നും ഷാഫി പറമ്പില് എംപി വ്യക്തമാക്കി. മറ്റ് രാഷ്ട്രീയ പാര്ട്ടികളെടുക്കാത്ത അച്ചടക്ക നടപടിയാണ് പാര്ട്ടി രാഹുലിന്റെ കാര്യത്തില് കൈക്കൊണ്ടത്. മറ്റൊരു പാര്ട്ടിക്കും ഇക്കാര്യത്തില് കോണ്ഗ്രസിനെ വിമര്ശിക്കാന് അവകാശമില്ലെന്നും അദ്ദേഹം വ്യക്തമാക്കുന്നു.
'രേഖാമൂലമുള്ള പരാതി പാര്ട്ടിക്ക് കിട്ടിയത് ഡിജിപിക്ക് കൈമാറി. വ്യക്തിപരമായി മാങ്കൂട്ടവുമായുണ്ടായിരുന്ന സൗഹൃദത്തെ ഞാന് പൊളിറ്റിക്സിലേക്ക് കൊണ്ടുവന്നിട്ടില്ല, പാര്ട്ടി വഴിയുണ്ടായ ബന്ധം മാത്രമാണ് രാഹുലുമായുള്ളത്. പുതിയ തലമുറയിലെ ആളുകള് പാര്ട്ടിയില് വളര്ന്ന് വരുമ്പോള്, അവരെ സംഘടനാപരമായി സപ്പോര്ട്ട് ചെയ്യേണ്ട ചുമതല ഞങ്ങള്ക്കുണ്ട്. അതാണ് ചെയ്തത്. നാളെയും ഇത്തരത്തില് വളര്ന്നുവരുന്നവരെ കൊണ്ടുവരാന് പരിശ്രമിക്കും. അവര്ക്ക് സംഘടനാപരാമായി വളരാനുള്ള പിന്തുണയാണ് നല്കുന്നത്. അല്ലാതെ വേറെ തരത്തിലെ പ്രവര്ത്തനങ്ങള്ക്കല്ല പിന്തുണ കൊടുക്കുന്നത്.
ക്രിമിനല് പശ്ചാത്തലമുള്ള, നടപടിയെടുക്കാന് വേണ്ടിയുള്ള പരാതികളൊന്നും ആ സമയത്ത് എന്റെ മുന്നില് വന്നിട്ടില്ല. എംഎല്എ സ്ഥാനത്ത് തുടരണോ എന്നത് കോണ്ഗ്രസ് പാര്ട്ടി തീരുമാനിക്കും'. ഷാഫി മാങ്കൂട്ടത്തിലിനെ തള്ളിപ്പറഞ്ഞുകൊണ്ട് വ്യക്തമാക്കി.
രാഹുല് മാങ്കൂട്ടത്തിലിനെ കോണ്ഗ്രസില് നിന്ന് പുറത്താക്കിയതിന് പിന്നാലെ ഷാഫി പറമ്പിലും കൈവിട്ടിരിക്കുകയാണ്. രാഹുലിന് വ്യക്തിപരമായ പിന്തുണയല്ല നല്കിയത്. പരാതി കിട്ടിയപ്പോള് തന്നെ പാര്ട്ടി നടപടി സ്വീകരിച്ചതാണ്. കോണ്ഗ്രസ് എടുത്ത നടപടി മറ്റു പാര്ട്ടികള് ഇതുവരെ എടുത്തിട്ടില്ല. പാര്ട്ടി നടപടിക്കൊപ്പമാണ് താനുള്ളതെന്നും രാഹുലിന്റെ ക്രിമിനല് സ്വഭാവം ഉള്ള പരാതി രേഖ മൂലം കിട്ടിയിട്ടില്ലെന്നും ഷാഫി പറമ്പില് പറഞ്ഞു.