എകെജി സെന്റര് ഭൂമി ഇടപാട്: നിര്ണ്ണായക ഫയലുകള് കാണാനില്ല; ആര്ക്കൈവ്സിലും രേഖകളില്ലെന്ന് വിവരാവകാശ മറുപടി; സേവ് യൂണിവേഴ്സിറ്റി ക്യാമ്പയിന്റെ നിയമ പോരാട്ടം അട്ടിമറിക്കാനോ ഈ ഫയല് മോഷണം; ഹൈക്കോടതി നിലപാട് നിര്ണ്ണായകമാകും
തിരുവനന്തപുരം: തിരുവനന്തപുരത്ത് എകെജി സെന്ററിന് അനുവദിച്ച ഭൂമിയുമായി ബന്ധപ്പെട്ട ദുരൂഹതകള് വര്ദ്ധിപ്പിച്ചുകൊണ്ട് സര്ക്കാര് രേഖകള് അപ്രത്യക്ഷമാകുന്നു. എകെജി പഠന ഗവേഷണ കേന്ദ്രത്തിനായി ഭൂമി വിട്ടുനല്കിയതുമായി ബന്ധപ്പെട്ട സുപ്രധാന ഫയലുകള് സംസ്ഥാന ആര്ക്കൈവ്സ് വകുപ്പിന്റെ കൈവശമില്ലെന്ന വിവരാവകാശ രേഖ പുറത്തുവന്നു. ഹൈക്കോടതിയില് ഭൂമി കൈമാറ്റം സംബന്ധിച്ച കേസ് നടന്നുവരുന്നതിനിടെയാണ് സര്ക്കാരിനെ പ്രതിരോധത്തിലാക്കുന്ന ഈ വെളിപ്പെടുത്തല്.
ഭൂമി അനുവദിച്ചുകൊണ്ടുള്ള ഉത്തരവ് ആര്ക്കൈവ്സിന് കൈമാറിയെന്നായിരുന്നു റവന്യൂ വകുപ്പ് നേരത്തെ വിവരാവകാശ നിയമപ്രകാരം നല്കിയ മറുപടി. എന്നാല്, 1977 ഓഗസ്റ്റ് 20-ലെ ജി.ഒ.എം.എസ്. 1172/77/ ആര്ഡി എന്ന നമ്പറിലുള്ള തീര്പ്പ് ഫയല് തങ്ങള്ക്ക് ലഭിച്ചിട്ടില്ലെന്ന് ആര്ക്കൈവ്സ് ഡയറക്ടര് ഇപ്പോള് വ്യക്തമാക്കിയിരിക്കുകയാണ്. ഫയലുകളുടെ ക്രമത്തില് 1171-ന് ശേഷം നേരിട്ട് 1174-ാം നമ്പര് ഫയലാണുള്ളത്. ഇടയിലുള്ള നിര്ണ്ണായകമായ രണ്ട് ഫയലുകള് എവിടെപ്പോയി എന്ന ചോദ്യത്തിന് ഉത്തരമില്ല.
എകെജി സെന്ററിന് അനുവദിച്ചതിനേക്കാള് കൂടുതല് ഭൂമി കൈവശമുണ്ടെന്ന പരാതിയില് ഹൈക്കോടതിയില് കേസ് നിലനില്ക്കുന്നുണ്ട്. ഈ കേസില് ജില്ലാ കളക്ടര് നല്കിയിട്ടുള്ളത് കാണാതായ ഇതേ ഉത്തരവ് നമ്പറാണ്. എന്നാല് കോടതിയില് ഈ ഉത്തരവിന്റെ പകര്പ്പ് ഹാജരാക്കാന് ഇതുവരെ സാധിച്ചിട്ടില്ല. ഫയല് കാണാനില്ലെന്ന പുതിയ വെളിപ്പെടുത്തല് ഈ കേസിന്റെ ഗതിയെ ബാധിക്കുമെന്നുറപ്പാണ്.
1977-ല് എ.കെ. ആന്റണി മുഖ്യമന്ത്രിയായിരുന്ന കാലത്താണ് എകെജി സ്മാരക സമിതിക്ക് കേരള സര്വകലാശാലയോട് ചേര്ന്നുള്ള ഭൂമി കൈമാറിയത്. എകെജിയുടെ മരണത്തെത്തുടര്ന്ന് ഇ.എം.എസ്. ചെയര്മാനും ഇ.കെ. നായനാര് സെക്രട്ടറിയുമായി രൂപീകരിച്ച സമിതിക്കുവേണ്ടി എം.വി. രാഘവനും ടി.കെ. രാമകൃഷ്ണനും മുഖ്യമന്ത്രിയെ കണ്ട് ഭൂമി ആവശ്യപ്പെടുകയായിരുന്നു. സര്വകലാശാലയ്ക്ക് നല്കിയ ഭൂമിയില് നിന്നാണ് സ്മാരകത്തിന് സ്ഥലം അനുവദിച്ചത്.
എന്നാല്, എത്ര സെന്റ് ഭൂമിയാണ് അന്ന് അനുവദിച്ചതെന്ന കാര്യത്തില് ഇപ്പോഴും തര്ക്കം നിലനില്ക്കുകയാണ്. ഈ തര്ക്കത്തില് വ്യക്തത വരണമെങ്കില് കാണാതായ ആ ഉത്തരവ് കണ്ടെത്തേണ്ടത് അനിവാര്യമാണ്. ഉത്തരവ് അപ്രത്യക്ഷമായത് ബോധപൂര്വ്വമാണോ എന്ന സംശയമാണ് സേവ് യൂണിവേഴ്സിറ്റി ക്യാമ്പയിന് കമ്മിറ്റി ഉയര്ത്തുന്നത്. ഫയല് മുക്കിയത് ആര് എന്ന ചോദ്യം രാഷ്ട്രീയ കേന്ദ്രങ്ങളിലും സജീവമാണ്.
പിന്നീട് കേരള സര്വകലാശാലയില് നിന്ന് 15 സെന്റ് ഭൂമി കൂടി എകെജി ട്രസ്റ്റിന് 'സമ്മാനമായി' (ഗിഫ്റ്റ്) നല്കിയെന്നും രേഖകള് പറയുന്നു. സര്ക്കാര് വക ഭൂമി സര്വകലാശാലയ്ക്ക് ഇത്തരത്തില് മറ്റൊരു സ്വകാര്യ ട്രസ്റ്റിന് കൈമാറാന് അധികാരമില്ലെന്നാണ് നിയമവിദഗ്ദ്ധര് ചൂണ്ടിക്കാട്ടുന്നത്. ഈ ഭൂമി ഇതുവരെയും സര്ക്കാര് രേഖകളില് പതിച്ചുനല്കിയിട്ടില്ല എന്നതും ശ്രദ്ധേയമാണ്.
വിവരാവകാശ രേഖകള് പ്രകാരം 2018-ലെ റീസര്വേയില് എകെജി സെന്റര് 55 സെന്റ് ഭൂമി കൈവശം വെച്ചിരിക്കുന്നതായി കണ്ടെത്തിയിരുന്നു. എന്നാല് ഈ ഭൂമി പുറമ്പോക്കാണെന്നും അതുകൊണ്ട് തന്നെ തണ്ടപ്പേര് പതിക്കുകയോ കരമൊടുക്കുകയോ ചെയ്യുന്നില്ലെന്നും അധികൃതര് വ്യക്തമാക്കുന്നു. റവന്യൂ രേഖകളില് ഇല്ലാത്ത ഭൂമിയില് എങ്ങനെയാണ് ബഹുനില മന്ദിരം ഉയര്ന്നതെന്ന ചോദ്യത്തിന് ഉദ്യോഗസ്ഥര്ക്കും മറുപടിയില്ല.
ഭൂമി ഏത് ആവശ്യത്തിനാണോ അനുവദിച്ചത് അതിനല്ലാതെ ഉപയോഗിച്ചാല് കൈമാറ്റം അസാധുവാകുമെന്നാണ് ചട്ടം. എകെജി പഠന ഗവേഷണ കേന്ദ്രത്തിനായി ലഭിച്ച ഭൂമി പാര്ട്ടി ആസ്ഥാനമായി ഉപയോഗിക്കുന്നത് ചട്ടവിരുദ്ധമാണെന്ന് ചൂണ്ടിക്കാട്ടിയാണ് സേവ് യൂണിവേഴ്സിറ്റി ക്യാമ്പയിന് കമ്മിറ്റി കോടതിയെ സമീപിച്ചിരിക്കുന്നത്. അതീവ സുരക്ഷാ മേഖലയിലുള്ള ഈ ഭൂമിയുടെ ഉടമസ്ഥാവകാശം ഇപ്പോഴും നിയമക്കുരുക്കിലാണ്.
നിര്ണ്ണായകമായ ഫയലുകള് കാണാതാകുന്നത് സെക്രട്ടേറിയറ്റിലെയും ആര്ക്കൈവ്സിലെയും സുരക്ഷാ വീഴ്ചയായാണ് വിലയിരുത്തപ്പെടുന്നത്. രാഷ്ട്രീയമായി വലിയ പ്രാധാന്യമുള്ള ഒരു വിഷയത്തില് ഫയലുകള് അപ്രത്യക്ഷമാകുന്നത് അന്വേഷിക്കണമെന്ന ആവശ്യം ശക്തമായിട്ടുണ്ട്. ഫയലുകള് ബോധപൂര്വ്വം നശിപ്പിച്ചതാണോ അതോ രേഖകളില് കൃത്രിമം കാട്ടിയതാണോ എന്നും സംശയിക്കപ്പെടുന്നു.
കോടതിയില് കേസ് അന്തിമഘട്ടത്തിലേക്ക് നീങ്ങുമ്പോള് ഭൂമി സംബന്ധിച്ച ഉത്തരവ് ഹാജരാക്കാന് സര്ക്കാരിന് വലിയ വെല്ലുവിളിയാകും. ആര്ക്കൈവ്സില് ഫയലില്ലെന്ന് ഔദ്യോഗികമായി അറിയിച്ചതോടെ, കളക്ടര് കോടതിയില് നല്കിയ രേഖകളുടെ ആധികാരികതയും ചോദ്യം ചെയ്യപ്പെടും. വരും ദിവസങ്ങളില് എകെജി സെന്റര് ഭൂമി വിവാദം കേരള രാഷ്ട്രീയത്തില് വലിയ കൊടുങ്കാറ്റ് ഉയര്ത്തുമെന്നുറപ്പാണ്.