ഇന്ത്യക്കെതിരായ ഭീകരാക്രമണം നടത്താന്‍ എസ് 1 എന്ന പേരില്‍ പാകിസ്ഥാനില്‍ പ്രത്യേക സംഘം; മുംബൈ സ്‌ഫോടനങ്ങള്‍ മുതല്‍ പഹല്‍ഗാം ഭീകരാക്രമണം വരെ ആസൂത്രണം ചെയ്തത് ഈ സംഘം; അതിര്‍ത്തി കടന്നുള്ള ഭീകരവാദത്തെ എസ് വണ്‍ യൂണിറ്റ് പ്രോത്സാഹിപ്പിക്കുന്നത് തീവ്രവാദ സംഘടനകള്‍ക്ക് പരിശീലനം അടക്കം നല്‍കി
ഇന്ത്യക്കെതിരായ ഭീകരാക്രമണം നടത്താന്‍ എസ് 1 എന്ന പേരില്‍ പാകിസ്ഥാനില്‍ പ്രത്യേക സംഘം
ന്യൂഡല്‍ഹി: ഇന്ത്യക്കെതിരെ ഭീകരപ്രവര്‍ത്തനം നടത്താന്‍ പാക്കിസ്ഥാന്‍ സൈന്യം അടക്കം സഹായങ്ങള്‍ ചെയ്തു വരുന്നു എന്നതാണ് ഒരു യാഥാര്‍ഥ്യമാണ്. ഇക്കാര്യം ഇന്ത്യ പലതവണ ചൂണ്ടിക്കാട്ടുകയും ചെയ്തിരുന്നു. ഇന്ത്യക്കെതിരായ ഭീകരപ്രവര്‍ത്തനത്തിന് പാകിസ്ഥാന് എസ് 1 എന്ന പേരില്‍ പ്രത്യേക സംഘം പ്രവര്‍ത്തിച്ചിരുന്നതായാണ് ഇപ്പോള്‍ പുറത്തുവരുന്ന റിപ്പോര്‍ട്ട്. രഹസ്യാന്വേഷണ ഏജന്‍സി വൃത്തങ്ങളെ ഉദ്ധരിച്ച് എന്‍ഡിടിവിയാണ് ഈ വാര്‍ത്ത റിപ്പോര്‍ട്ട് ചെയ്തത്.
1993 ലെ മുംബൈ സ്‌ഫോടനങ്ങള്‍ മുതല്‍ ജമ്മു കശ്മീരിലെ പഹല്‍ഗാമില്‍ നടന്ന ഭീകരാക്രമണം വരെ എസ് 1 ആണ് ആസൂത്രണം ചെയ്തതെന്നാണ് റിപ്പോര്‍ട്ടില്‍ പറയുന്നത്. എസ്1 എന്നാല്‍ 'സബ്വേര്‍ഷന്‍ 1' എന്നാണ് എന്ന് ഇന്റലിലിജന്‍സ് വൃത്തങ്ങള്‍ വ്യക്തമാക്കി. പാക്കിസ്ഥാനിലെ അതിര്‍ത്തി കടന്നുള്ള ഭീകരവാദത്തിന്റെ ശക്തികള്‍ക്ക് പിന്നിലെ ഏറ്റവും വലിയ പ്രേരകശക്തി ഈ യൂണിറ്റാണെന്നും അവര്‍ വ്യക്തമാക്കി. പാക്കിസ്ഥാന്‍ ആര്‍മിയിലെ ഒരു കേണലാണ് എസ് 1 നെ നയിക്കുന്നത്. രണ്ട് റാങ്കിംഗ് ഓഫീസര്‍മാര്‍ ചേര്‍ന്ന് ഇതില്‍ സജീവമായി പ്രവര്‍ത്തിക്കുന്നുണ്ട്. ഈ രണ്ട് ഓഫീസര്‍മാരുടെയും കോഡ് നാമങ്ങള്‍ 'ഗാസി 1' ഉം 'ഗാസി 2' ഉം ആണ് എന്നും അവര്‍ വെളിപ്പെടുത്തി.
ഇസ്ലാമാബാദ് ആസ്ഥാനമാക്കിയാണ് എസ് 1 പ്രവര്‍ത്തിക്കുന്നത്. , ഭീകരപ്രവര്‍ത്തനങ്ങള്‍ക്ക് ആവശ്യമായ പണത്തിന്റെ ഭൂരിഭാഗവും മയക്കുമരുന്ന് വില്‍പ്പന വഴിയാണ് നടക്കുന്നതെന്നും വൃത്തങ്ങള്‍ അറിയിച്ചു. എസ്1 ഉദ്യോഗസ്ഥരും പരിശീലകരും എല്ലാത്തരം ബോംബുകളും ഇംപ്രൊവൈസ്ഡ് സ്‌ഫോടകവസ്തുക്കളും നിര്‍മിക്കുന്നതില്‍ വിദഗ്ധരാണ്. കൂടാതെ വിവിധതരം ചെറു ആയുധങ്ങള്‍ കൈകാര്യം ചെയ്യുന്നതില്‍ അവര്‍ സമര്‍ഥരാണ്. ഇന്ത്യയിലെ മിക്ക സ്ഥലങ്ങളുടെയും വിശദമായ ഭൂപടങ്ങള്‍ യൂണിറ്റിന്റെ പക്കലുണ്ട് എന്നും അവര്‍ പറഞ്ഞു.
കഴിഞ്ഞ 25 വര്‍ഷമായി എസ്1 പ്രവര്‍ത്തിക്കുന്നുണ്ട്. എന്നാല്‍ അടുത്തിടെയാണ് ഇന്ത്യയുടെ സുരക്ഷാ ഏജന്‍സികള്‍ അതിന്റെ പ്രവര്‍ത്തനങ്ങളുടെ മുഴുവന്‍ വ്യാപ്തിയും മനസിലാക്കിയത്. ഇന്ത്യയില്‍ ഭീകരാക്രമണങ്ങള്‍ നടത്താന്‍ പ്രത്യേകമായി ചുമതലപ്പെടുത്തിയിരിക്കുന്ന എസ്1, പാകിസ്ഥാനില്‍ പ്രവര്‍ത്തിക്കുന്ന എല്ലാ ഭീകര ഗ്രൂപ്പുകളുമായും ബന്ധപ്പെട്ടിരിക്കുന്നുവെന്നും എന്‍ഡിടിവി റിപ്പോര്‍ട്ട് ചെയ്തു.
ജെയ്ഷെ മുഹമ്മദ്, ലഷ്‌കര്‍-ഇ-തൊയ്ബ, ഹിസ്ബുള്‍ മുജാഹിദീന്‍ തുടങ്ങിയ സംഘടനകളുടെ ഭീകര പരിശീലന ക്യാമ്പുകളില്‍ എസ്1 ഉദ്യോഗസ്ഥരെ കണ്ടിട്ടുണ്ട്. ഈ യൂണിറ്റ് വളരെ രഹസ്യമായി പ്രവര്‍ത്തിക്കുന്നതിനാല്‍ പല ഭീകര ഗ്രൂപ്പുകള്‍ക്കും അവരുടെ പരിശീലകര്‍ എസ് 1 ല്‍ നിന്നുള്ളവരാണെന്ന് അറിയില്ല എന്ന് വൃത്തങ്ങള്‍ പറഞ്ഞു. എസ് 1 ല്‍ നിന്നും ഏകദേശം ആയിരക്കണക്കിന് തീവ്രവാദികള്‍ക്ക് പരിശീലനം നല്‍കിയിട്ടുണ്ടെന്നും റിപ്പോര്‍ട്ടില്‍ പറയുന്നു.