ജീവന്റെ പാതി തുടിപ്പുമായി പാഞ്ഞെത്തിയ ആംബുലന്‍സ് കുടുങ്ങിയത് തിരക്കേറിയ റോഡില്‍; പെട്ടെന്ന് പിങ്ക് വണ്ടിയില്‍ നിന്ന് ഒരാളുടെ എന്‍ട്രി; മുന്നിലൂടെ വഴി കാട്ടി ഓടി ആ വനിതാ എ.എസ്.ഐ; നിമിഷനേരം കൊണ്ട് കുരുക്കഴിച്ച് മാതൃക; സോഷ്യല്‍ മീഡിയയില്‍ നിറഞ്ഞ കൈയ്യടി; വീണ്ടും മനുഷ്യത്വത്തിന്റെ പ്രതിരൂപമായി അപര്‍ണ മാറുമ്പോള്‍
തൃശൂർ: നഗരത്തിലെ രൂക്ഷമായ ഗതാഗത സ്തംഭനത്തിനിടയിൽ, ഒരു ജീവൻ രക്ഷിക്കുവാനായി കുതിച്ച ആംബുലൻസിന് മുന്നിൽ വഴികാട്ടിയായി ഓടിയ ഒരു പോലീസ് ഉദ്യോഗസ്ഥയുടെ ദൃശ്യങ്ങൾ ഇപ്പോൾ സാമൂഹിക മാധ്യമങ്ങളിൽ പ്രചരിക്കുകയാണ്. ഇതോടെ കേരളം വീണ്ടും ആ സഹോദരിയുടെ പേര് ഓർത്തെടുക്കുകയാണ്. തൃശ്ശൂർ സിറ്റി വനിതാ പോലീസ് സ്റ്റേഷനിലെ അസിസ്റ്റന്റ് സബ് ഇൻസ്പെക്ടറായ അപർണ ലവകുമാറിന്റെ നിസ്വാർത്ഥമായ ഈ പ്രവൃത്തി കേവലം ഒരു ഔദ്യോഗിക കൃത്യനിർവഹണത്തിനപ്പുറം മനുഷ്യത്വത്തിന് ഉദാത്തമായ ഒരു പ്രതിരൂപമായി മാറുകയാണ്.
കഴിഞ്ഞ ശനിയാഴ്ച ഉച്ചയോടെയാണ് സംഭവം നടക്കുന്നത്. തൃശൂർ കോലോത്തുംപാടത്തെ അശ്വിനി ജംഗ്ഷനിലായിരുന്നു സംഭവം നടന്നത്. മെഡിക്കൽ കോളേജിൽ നിന്ന് ജൂബിലി മിഷൻ ആശുപത്രിയിലേക്ക് അത്യാസന്ന നിലയിലുള്ള രോഗിയുമായി പോയ ആംബുലൻസ് തിരക്കേറിയ റോഡിൽ പെട്ടുപോവുകയായിരുന്നു.
ഇത് തിരിച്ചറിഞ്ഞ അപർണ ഉടനെ തന്നെ താൻ സഞ്ചരിച്ചിരുന്ന പിങ്ക് പോലീസ് വാഹനത്തിൽ നിന്നിറങ്ങി. ആംബുലൻസിന് മുന്നിൽ ഏറെ ദൂരം ഓടി മറ്റു വാഹനങ്ങളെ വശങ്ങളിലേക്ക് മാറ്റിക്കൊണ്ട് വഴിയൊരുക്കുകയായിരുന്നു. ഒരു ജീവന്റെ വിലയറിയുന്ന ആ ഓട്ടം ഒടുവിൽ അവർ ലക്ഷ്യസ്ഥാനത്ത് എത്തിയെന്ന് ഉറപ്പാക്കിയ ശേഷമാണ് അവസാനിച്ചത്.
അതേസമയം, അപർണയുടെ സേവനപാതയിലെ ഒരു ഒറ്റപ്പെട്ട അധ്യായമല്ല ഇത്. വർഷങ്ങൾക്ക് മുൻപ് ചികിത്സയ്ക്കിടെ മരണപ്പെട്ട ഒരു സ്ത്രീയുടെ മൃതദേഹം വിട്ടുകിട്ടാൻ പണമില്ലാതെ നിസ്സഹായരായ കുടുംബത്തിന് സ്വന്തം കൈവള ഊരിനൽകി അവർ സാന്ത്വനമായ സംഭവം ഉണ്ടായിരുന്നു. കാൻസർ രോഗികൾക്ക് വിഗ് നിർമ്മിക്കുന്നതിനായി തന്റെ മുടി പൂർണ്ണമായും മുറിച്ചുനൽകി അവർ കാരുണ്യത്തിന്റെ മറ്റൊരു മാതൃക തീർത്തു.
താൻ ചെയ്തത് ഒരു പോലീസ് ഉദ്യോഗസ്ഥയുടെ കർത്തവ്യം മാത്രമാണെന്ന വിനയാന്വിതമായ പ്രതികരണത്തിലൂടെ, അപർണ തന്റെ പ്രവൃത്തിയുടെ മഹത്വം വീണ്ടും വർദ്ധിപ്പിക്കുന്നു. എന്നാൽ, ഔദ്യോഗിക പദവിയുടെ പരിധികൾ ഭേദിച്ച്, സഹാനുഭൂതിയുടെയും സമർപ്പണത്തിന്റെയും പ്രതീകമായി മാറുന്ന ഇത്തരം നിസ്തുലമായ ഇടപെടലുകളാണ് അപർണ ലവകുമാറിനെ കേരള പോലീസിലെ ഒരു വ്യത്യസ്ത മുഖമായി മാറ്റുന്നത്.
പതിനൊന്നു വർഷങ്ങൾക്ക് മുൻപ് ഔദ്യോഗിക നിർവഹണത്തിനിടയിൽ തന്റെ കൈയിൽക്കിടന്ന മൂന്നു സ്വർണ്ണ വളകൾ ഊരി നൽകിയാണ് അപർണ അന്ന് മനുഷത്വം പ്രകടിപ്പിച്ചത്. തൃശ്ശൂരിലെ സ്വകാര്യ ആശുപത്രിയിൽ ഒരു കൊലപാതകക്കേസിൽ ഇൻക്വസ്റ്റ് നടത്താൻ പോയതായിരുന്നു അപർണ. 60,000 രൂപയുടെ ബിൽ അടച്ചാലെ മൃതദേഹം വീട്ടുകാർക്ക് വിട്ടുനൽകൂ എന്ന നിലപാടിലായിരുന്നു ആശുപത്രി അധികൃതർ.
ഗാർഹിക പീഡനത്തെത്തുടർന്നായിരുന്നു ആ സ്ത്രീ മരിച്ചത്. അമ്മയുടെ മൃതദേഹം ഏറ്റുവാങ്ങാൻ വഴികാണാതെ കണ്ണീരോടെ നിൽക്കുന്ന അവരുടെ മക്കളെ കണ്ട് മനസ്സലിഞ്ഞപ്പോഴാണ് അപർണ തന്റെ കൈയിലെ മൂന്നു സ്വർണവളകൾ അവർക്കൂരി നൽകിയത്. ആ സംഭവം നടന്ന് 11 വർഷങ്ങൾക്കിപ്പുറം അപർണ വീണ്ടും വാർത്തകളിൽ നിറയുകയാണ്. കാന്സർ ബാധിതർക്ക് മുടിദാനം ചെയ്യാനായി തലമുണ്ഡനം ചെയ്തതോടെയാണ് അപർണ വീണ്ടും വാർത്തകളിൽ നിറയുന്നത്.
തൃശ്ശൂർ ജില്ലയിലെ ആമ്പല്ലൂർ സ്വദേശിനിയാണ് അപർണ. വളരെ ചെറുപ്പത്തിലേ തന്നെ ഭർത്താവ് മരിച്ച അപർണ രണ്ട് പെൺകുഞ്ഞുങ്ങളെ ഒറ്റയ്ക്കാണ് വളർത്തിയത്. അടുത്തിടെയാണ് അപർണ പുനർവിവാഹിതയായത്. ട്രാഫിക് നിയമങ്ങളെപ്പറ്റിയും വ്യക്തി സുരക്ഷയെപ്പറ്റിയും സ്കൂളുകളിൽ ക്ലാസെടുക്കാറുണ്ട് അപർണ. സെപ്റ്റംബറിൽ അത്തരമൊരു ക്ലാസെടുക്കാൻ പോയപ്പോഴാണ് മുടിദാനം ചെയ്യാൻ തീരുമാനമെടുത്തതെന്ന് അപർണ പറയുന്നു.