'സ്വന്തം കാലില്‍ നില്‍ക്കാന്‍ പഠിക്കണം; ഇരുപാര്‍ട്ടികളും തങ്ങളുടേതായ വ്യക്തിത്വം പാലിക്കണം'; ശരദ് പവാറിന്റെ ചിത്രങ്ങളോ വിഡിയോയോ പ്രചാരണത്തിന് ഉപയോഗിക്കരുതെന്ന് അജിത് പവാറിനോട് സുപ്രീം കോടതി
ഇരുവിഭാഗങ്ങളും തങ്ങളുടെ പ്രത്യേക ഐഡന്റിറ്റി നിലനിര്‍ത്തണം
ന്യൂഡല്‍ഹി: നാഷണലിസ്റ്റ് കോണ്‍ഗ്രസ് പാര്‍ട്ടി(എസ്പി) നേതാവ് ശരദ് പവാറിന്റെ ചിത്രങ്ങളോ വിഡിയോയോ തിരഞ്ഞെടുപ്പ് പ്രചാരണത്തിന് ഉപയോഗിക്കരുതെന്ന് അജിത് പവാര്‍ വിഭാഗത്തോട് നിര്‍ദേശിച്ച് സുപ്രീംകോടതി. സ്വന്തം കാലില്‍ നില്‍ക്കാന്‍ പഠിക്കണമെന്നും ഇരുപാര്‍ട്ടികളും തങ്ങളുടേതായ വ്യക്തിത്വം പാലിക്കണമെന്നും കോടതി അജിത് പവാര്‍ വിഭാഗത്തോട് പറഞ്ഞു. മുന്‍ ഉത്തരവ് പാലിച്ചാണ് കോടതി ഈ നിര്‍ദ്ദേശങ്ങള്‍ പുറപ്പെടുവിച്ചത്. തിരഞ്ഞെടുപ്പിന് മുന്നോടിയായി ഇരുവിഭാഗങ്ങളോടും തങ്ങളുടെ പ്രത്യേക ഐഡന്റിറ്റി നിലനിര്‍ത്താനും കോടതി ആവശ്യപ്പെട്ടു.
നവംബര്‍ 20ന് നടക്കുന്ന മഹാരാഷ്ട്ര നിയമസഭാ തിരഞ്ഞെടുപ്പിന് മുന്നോടിയായാണ് കോടതിയുടെ നിര്‍ദേശം. 'സ്വന്തം കാലില്‍ നില്‍ക്കാന്‍ പഠിക്കണം. ഇപ്പോള്‍ നിങ്ങള്‍ക്ക് ശരദ് പവാറുമായി ആശയപരമായ വ്യത്യാസമുണ്ട്. ശരദ് പവാറുമായുള്ള സഹകരണം ഉപേക്ഷിച്ച സാഹചര്യത്തില്‍ അദ്ദേഹത്തിന്റെ പേരോ ചിത്രങ്ങളോ വിഡിയോയോ ഉപയോഗിക്കരുത്' ജസ്റ്റിസുമാരായ സൂര്യകാന്ത്, ഉജ്ജല്‍ ഭുയാന്‍ എന്നിവരുള്‍പ്പെട്ട ബെഞ്ച് പറഞ്ഞു.
അജിത് പവാര്‍ ഇപ്പോഴും ശരദ് പവാറിന്റെ സല്‍പ്പേര് ഉപയോഗിച്ചാണ് നേട്ടമുണ്ടാക്കുന്നതെന്ന് ശരദ് പവാറിന്റെ അഭിഭാഷകനായ അഭിഷേക് മനു സിങ്വി കോടതിയെ അറിയിച്ചതിനു പിന്നാലെയാണ് നിര്‍ദേശം. നിയമസഭാ തിരഞ്ഞെടുപ്പിന് മുന്നോടിയായി സ്വന്തം കാലില്‍ നില്‍ക്കാന്‍ പഠിക്കണമെന്നും പാര്‍ട്ടികളുടെ വ്യക്തിത്വം നിലനിര്‍ത്തണമെന്നും എന്‍സിപിയോട് സുപ്രീം കോടതി പറഞ്ഞു.
'സ്വന്തം കാലില്‍ നില്‍ക്കാന്‍ പഠിക്കുക, ഇപ്പോല്‍ നിങ്ങള്‍ക്ക് ശരദ് പവാറുമായി ആശയപരമായ വ്യത്യാസമുണ്ട്. ശരദ് പവാറുമായി ബന്ധം വേര്‍പെടുത്തി കഴിഞ്ഞ സാഹചര്യത്തില്‍ അദ്ദേഹത്തിന്റെ പേരോ ഫോട്ടോയോ വീഡിയോയോ ഉപയോഗിക്കരുത്,' ബാര്‍ ആന്‍ഡ് ബെഞ്ച് ഉദ്ധരിച്ച് സുപ്രീം കോടതി പറഞ്ഞു.
ആര്‍ക്ക് വോട്ട് ചെയ്യണമെന്ന് അറിയാവുന്ന വോട്ടര്‍മാരുടെ ജ്ഞാനത്തില്‍ തങ്ങള്‍ക്ക് പൂര്‍ണ വിശ്വാസമുണ്ടെന്ന് കേസ് നവംബര്‍ 19-ന് പോസ്റ്റ് ചെയ്തുകൊണ്ട് സുപ്രീം കോടതി പറഞ്ഞു. മഹാരാഷ്ട്ര തിരഞ്ഞെടുപ്പിനായുള്ള ചൂടേറിയ പ്രചാരണം തുടരുന്നതിനാല്‍ ഇരു വിഭാഗങ്ങളും തങ്ങളുടെ പക്ഷത്ത് ശ്രദ്ധ കേന്ദ്രീകരിക്കണമെന്ന് ജസ്റ്റിസുമാരായ സൂര്യകാന്ത്, ഉജ്ജല്‍ ഭൂയാന്‍ എന്നിവരടങ്ങുന്ന സുപ്രീം കോടതി ബെഞ്ച് പറഞ്ഞു.
ശരദ് പവാറിന്റെ അനന്തരവന്‍ ഇപ്പോഴും അമ്മാവന്റെ നല്ല മനസ്സിന് വഴങ്ങുകയാണെന്ന് ശരദ് പവാറിന്റെ എന്‍സിപിയെ പ്രതിനിധീകരിച്ച് മുതിര്‍ന്ന അഭിഭാഷകന്‍ അഭിഷേക് മനു സിങ്വി കോടതിയെ അറിയിച്ചതിന് പിന്നാലെയാണിത്. അജിത് പവാറിന്റെ എന്‍സിപി സുപ്രീം കോടതിയുടെ ഉത്തരവുകള്‍ പാലിക്കുന്നില്ലെന്നും സിങ്വി പറഞ്ഞു. ശരദ് പവാറിന്റെ നേതൃത്വത്തിലുള്ള വിഭാഗം കുടുംബത്തിലെ ഭിന്നതയെക്കുറിച്ചുള്ള വോട്ടര്‍മാരുടെ അറിവിനെ ചോദ്യം ചെയ്യുകയാണോ എന്നും കോടതി ചോദിച്ചു.
പാര്‍ട്ടിയെച്ചൊല്ലി ശരദ് പവാറിന്റെ എന്‍സിപിയുമായി നടക്കുന്ന നിയമപോരാട്ടത്തിന്റെ അനന്തരഫലത്തിന് വിധേയമാണ് പാര്‍ട്ടി ഉപയോഗിക്കുന്ന 'ക്ലോക്ക്' ചിഹ്നം എന്ന് വ്യക്തമാക്കുന്ന നിരാകരണം തിരഞ്ഞെടുപ്പ് പരസ്യങ്ങളില്‍ ചേര്‍ക്കാന്‍ അജിത് പവാറിന്റെ നേതൃത്വത്തിലുള്ള വിഭാഗത്തോട് സുപ്രീം കോടതി നേരത്തെ നിര്‍ദേശിച്ചിരുന്നു. ചിഹ്നം പ്രദര്‍ശിപ്പിച്ച പത്രങ്ങളില്‍ മറാത്തി ഭാഷയില്‍ നിരാകരണം പ്രസിദ്ധീകരിക്കുമെന്ന് അജിത് പവാറിന്റെ പാര്‍ട്ടി കോടതിയെ അറിയിച്ചു.
പാര്‍ട്ടി പ്രചാരണത്തിന് നാഷണലിസ്റ്റ് കോണ്‍ഗ്രസ് പാര്‍ട്ടി (എന്‍സിപി) സ്ഥാപകന്‍ ശരദ് പവാറിന്റെ പേരും ചിത്രവും അജിത് പവാര്‍ പക്ഷം ഉപയോഗിച്ചതിനെതിരെ സുപ്രീംകോടതി രൂക്ഷവിമര്‍ശനം നടത്തിയിരുന്നു. നിങ്ങള്‍ ഇപ്പോള്‍ മറ്റൊരു രാഷ്ട്രീയ പാര്‍ട്ടിയാണെന്നും ഇനി സ്വന്തം സ്വത്വത്തില്‍ പ്രവര്‍ത്തിക്കണമെന്നും അജിത് പവാര്‍ പക്ഷത്തോട് കോടതി നിര്‍ദേശിച്ചു. ശരദ് പവാറിന്റെ ചിത്രം ഉപയോഗിക്കില്ലെന്ന് സത്യവാങ്മൂലം നല്‍കാനും അജിത് പക്ഷത്തോട് കോടതി നിര്‍ദേശിച്ചിരുന്നു.
അജിത് പവാര്‍ പക്ഷത്തെ ഔദ്യോഗിക എന്‍സിപിയായി തിരഞ്ഞെടുപ്പ് കമ്മീഷന് അംഗീകരിച്ചത് ചോദ്യം ചെയ്ത് ശരദ് പവാര്‍ പക്ഷമാണ് ഹര്‍ജി സമര്‍പ്പിച്ചത്. വോട്ടര്‍മാരെ സ്വാധീനിക്കാന്‍ അജിത് പവാര്‍ പക്ഷം ശരദ് പവാറിന്റെ പേരും ചിത്രങ്ങളും ദുരുപയോഗം ചെയ്യുന്നുവെന്നായിരുന്നു ഹര്‍ജിയിലെ ആരോപണം.
അധികാര തര്‍ക്കത്തെ തുടര്‍ന്ന് ശരദ് പവാര്‍ നയിക്കുന്ന പാര്‍ട്ടിയില്‍നിന്ന് വിട്ട അജിത് പവാര്‍ വിഭാഗമാണ് യഥാര്‍ഥ എന്‍സിപിയെന്ന് ഫെബ്രുവരി ആറിന് തിരഞ്ഞെടുപ്പ് കമ്മീഷന് പ്രഖ്യാപിച്ചിരുന്നു. ഒപ്പം എന്‍സിപിയുടെ തിരഞ്ഞെടുപ്പ് ചിഹ്നമായ ക്ലോക്കും പതാകയും അജിത് പവാര്‍ പക്ഷത്തിന് അനുവദിക്കുകയും ചെയ്തു.
പാര്‍ട്ടി പിളര്‍ന്നതോടെ മഹാരാഷ്ട്രയിലെ 53 എന്‍സിപി എം എല്‍ എമാരില്‍ 40 പേരും ഒന്‍പത് എം എല്‍ സിമാരില്‍ അഞ്ച് പേരും അജിത് പക്ഷത്തായിരുന്നു. ഇതോടെയായിരുന്നു പാര്‍ട്ടിയുടെ പേരും ചിഹ്നവും അനുവദിക്കണമെന്ന് ആവശ്യപ്പെട്ട് അജിത് വിഭാഗം കേന്ദ്ര തിരഞ്ഞെടുപ്പ് കമ്മീഷന് മുമ്പാകെ അപേക്ഷ നല്‍കിയത്.
ശരദ് പവാറിനെ പാര്‍ട്ടി അധ്യക്ഷസ്ഥാനത്തുനിന്ന് അജിത് പവാര്‍ പക്ഷം നീക്കിയിരുന്നു. തിരഞ്ഞെടുപ്പ് കമ്മീഷനില്‍നിന്നും തിരിച്ചടി നേരിട്ടതിന് പിന്നാലെ ശരദ് പവാര്‍ നേതൃത്വം നല്‍കുന്ന വിഭാഗത്തിന് 'നാഷണലിസ്റ്റ് കോണ്‍ഗ്രസ് പാര്‍ട്ടി ശരദ്ചന്ദ്ര പവാര്‍' എന്നാണ് പുതിയ പേര് നിര്‍ദേശിച്ചിട്ടുള്ളത്.