സമരം ചെയ്യാന്‍ തെരുവെങ്കിലും വിട്ട് തരൂ; മലയില്‍ പോയി ആരെങ്കിലും പ്രകടനം നടത്തുമോ ? കോടീശ്വരന്മാര്‍ പാര്‍ലമെന്റ് കയ്യടക്കിയതോടെ അങ്ങോട്ട് പോകാന്‍ വയ്യാതെയായി; വഞ്ചിയൂരില്‍ റോഡില്‍ സ്റ്റേജ് കെട്ടിയതിനെ ന്യായീകരിച്ച് വീണ്ടും എ വിജയരാഘവന്‍
വഞ്ചിയൂരില്‍ റോഡില്‍ സ്റ്റേജ് കെട്ടിയതിനെ ന്യായീകരിച്ച് വീണ്ടും എ വിജയരാഘവന്‍
മലപ്പുറം: ഒരു സമരം നടത്തിയാല്‍ അത് സഹിക്കാന്‍ പറ്റാത്ത ആളുകളുണ്ട് നമ്മുടെ നാട്ടിലെന്ന് സിപിഎം പോളിറ്റ് ബ്യൂറോ അംഗം എ. വിജയരാഘവന്‍. റോഡില്‍ സ്റ്റേജ് കെട്ടി വഞ്ചിയൂരില്‍ സിപിഎം ഏരിയ സമ്മേളനത്തിന്റെ ഭാഗമായുള്ള പൊതുസമ്മളനം നടത്തിയതിനെ ന്യായീകരിച്ചാണ് വീണ്ടും വിജയരാഘവന്‍ രംഗത്തെത്തിയിരിക്കുന്നത്. സിപിഎം മലപ്പുറം ജില്ലാ സമ്മേളനത്തില്‍ പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
''റോഡിലൂടെ പ്രകടനം നടത്തണ്ട, മലയില്‍ കൂടെ നടത്തിക്കോ എന്നതാണ് ചിലരുടെ വാദം. മലയില്‍ പോയി ആരെങ്കിലും പ്രകടനം നടത്തുമോ ? കോടീശ്വരന്മാര്‍ പാര്‍ലമെന്റ് കയ്യടക്കിയതോടെ അങ്ങോട്ട് പോകാന്‍ വയ്യാതെയായി. റോഡില്‍ പ്രകടനം നടത്തിയാല്‍ അത് നടത്തുന്നവരെ പിടിക്കുന്ന അവസ്ഥയാണുള്ളത്. സമരം ചെയ്യാന്‍ തെരുവെങ്കിലും വിട്ട് തരൂ എന്നാണ് ഞങ്ങള്‍ പറയുന്നത്'' വിജയരാഘവന്‍ പറഞ്ഞു.
പത്താം ക്ലാസ് റിസള്‍റ്റ് പ്രസിദ്ധീകരിച്ചാല്‍ ഉടന്‍ മലപ്പുറത്ത് സീറ്റില്ല എന്ന് വാര്‍ത്ത വരും. ആഗ്രഹിച്ച സ്‌കൂളില്‍ പിണറായി പഠിക്കാന്‍ സമ്മതിക്കില്ല എന്ന് പറയും. റോഡ് മുഴുവന്‍ കുണ്ടും കുഴിയുമാണെന്നു വാര്‍ത്ത നല്‍കും. കണ്ണില്ലാത്ത ക്യാമറകള്‍ ആണ് മാധ്യമപ്രവര്‍ത്തകര്‍ക്ക് ഉള്ളതെന്നും വിജയരാഘവന്‍ വിമര്‍ശിച്ചു.