'കേന്ദ്ര സര്‍ക്കാര്‍ ന്യൂനപക്ഷങ്ങളുടെ രക്ഷകരായി അഭിനിയിക്കുന്നു; വഖഫ് ദേദഗതി ബില്‍ രാജ്യം 2025ല്‍ കണ്ട ഏറ്റവും വലിയ തമാശ'; അനീതിയെന്ന ഇ ടി മുഹമ്മദ് ബഷീര്‍
അനീതിയെന്ന ഇ ടി മുഹമ്മദ് ബഷീര്‍
ന്യൂഡല്‍ഹി: വഖഫ് ദേദഗതി ബില്‍ രാജ്യം 2025ല്‍ കണ്ട ഏറ്റവും വലിയ തമാശയാണെന്ന് മലപ്പുറം എംപി ഇ.ടി.മുഹമദ് ബഷീര്‍. പുതിയ ഭേദഗതി ബില്‍ വഖഫ് ബോര്‍ഡിനെ നശിപ്പിക്കാനാണ് നിര്‍മിച്ചത്. കേന്ദ്രസര്‍ക്കാര്‍ ന്യൂനപക്ഷങ്ങളെ ഉപദ്രവിക്കുകയാണെന്നും മുസ്ലീമിനെതിരെ നടക്കുന്നത് അനീതിയാണെന്നും ഇ.ടി.മുഹമദ് ബഷീര്‍ ലോക്‌സഭയില്‍ നടന്ന ചര്‍ച്ചയ്ക്കിടെ തുറന്നടിച്ചു.
''കേന്ദ്ര സര്‍ക്കാര്‍ ന്യൂനപക്ഷങ്ങളുടെ രക്ഷകരായി അഭിനിയിക്കുകയാണ്. വഖഫ് ഭേദഗതി ബില്‍ രാജ്യം 2025ല്‍ കണ്ട ഏറ്റവും വലിയ തമാശയാണ്. 2013ലെ യുപിഎ സര്‍ക്കാര്‍ കൊണ്ടുവന്ന ഭേദഗതി ഏകകണ്ഠമായാണ് അംഗീകരിച്ചത്. പക്ഷേ, ഇവിടെ എന്താണ് സംഭവിച്ചതെന്ന് എല്ലാവരും കണ്ടു. വഖഫ് ബോര്‍ഡിനെ നശിപ്പിക്കാനാണ് കേന്ദ്രസര്‍ക്കാര്‍ നീക്കം. രാജ്യത്ത് മതങ്ങളുടെ പേരില്‍ ഒരുപാട് ട്രസ്റ്റുകള്‍ ഉണ്ട്. ബിജെപിക്ക് രണ്ട് തരത്തിലുള്ള നിയമനിര്‍മാണം മാത്രമേ അറിയുകയുള്ളൂ. ആദ്യത്തേത് മതത്തിന്റെ അടിസ്ഥാനത്തിലാണ്. രണ്ടാമത്തേത് മതത്തിന്റെ പക്ഷം പിടിച്ചിട്ടുള്ളതാണ്. വഖഫ് ബില്‍ ഇതില്‍ രണ്ടാമത്തേതാണ്.'' ഇ.ടി തുറന്നടിച്ചു.
''യുപിയിലെ കാശി ക്ഷേത്രത്തില്‍ ബോര്‍ഡിലെ ഉദ്യോഗസ്ഥര്‍ എല്ലാം ഹിന്ദുക്കളാകണമെന്നാണ് നിയമത്തില്‍ പറയുന്നത്. ഹിന്ദു വിശ്വാസിയല്ലാത്ത ഒരാള്‍ക്ക് അവിടത്തെ ഒരു പദവിയിലും ഇരിക്കാന്‍ സാധിക്കില്ലെന്നും ബോര്‍ഡിന്റെ നിയമത്തില്‍ പറയുന്നുണ്ട്. പക്ഷേ, ഇവിടെ ഇതെല്ലാം പിടിച്ചെടുക്കാനാണ് ശ്രമം.'' ഇ.ടി പറഞ്ഞു. പ്രസംഗത്തിനിടെ രണ്ട് തവണ ഇ.ടിയുടെ പ്രസംഗം പ്രതിപക്ഷ ബഹളത്തെ തുടര്‍ന്ന് നിര്‍ത്തേണ്ടി വന്നു. അതിനിടെ സമയം കടന്നുപോയെന്ന് കാണിച്ച് ഇ.ടിയുെട മൈക്ക് സ്പീക്കര്‍ ഓഫ് ചെയ്തത് പ്രതിപക്ഷ ബഹളത്തിന് ഇടയാക്കി.