ശിവഗിരി മഠം സംഘടിപ്പിക്കുന്ന ലോക സര്‍വമതസമ്മേളനത്തിനും ലോക മതപാര്‍ലമെന്റിനും വത്തിക്കാനില്‍ ഇന്ന് തുടക്കം; ഫ്രാന്‍സിസ് മാര്‍പാപ്പയുടെ ആശിര്‍വാദ പ്രഭാഷണം നാളെ
ലോക സര്‍വമതസമ്മേളനത്തിനും ലോക മതപാര്‍ലമെന്റിനും വത്തിക്കാനില്‍ ഇന്ന് തുടക്കം
വത്തിക്കാന്‍ സിറ്റി: ശിവഗിരി മഠം വത്തിക്കാനില്‍ സംഘടിപ്പിക്കുന്ന ലോക സര്‍വമതസമ്മേളനത്തിനും ലോക മതപാര്‍ലമെന്റിനും ഇന്നു വൈകിട്ട് തുടക്കമാകും. വൈകിട്ട് ഏഴിന് സ്‌നേഹ സംഗമത്തോടെയാണ് മൂന്ന ദിവസത്തെ സര്‍വ്വമത സമ്മേളനത്തിന് തുടക്കമാകുക. മതങ്ങളുടെ ഏകതയും സൗഹാര്‍ദവും സമത്വവും പ്രചരിപ്പിക്കുകയെന്ന ലക്ഷ്യത്തോടെയാണ് സമ്മേളനം. ശ്രീനാരായണഗുരു ആലുവയില്‍ 100 വര്‍ഷം മുന്‍പു സംഘടിപ്പിച്ച സര്‍വമത സമ്മേളനത്തിന്റെ ശതാബ്ദിയോടനുബന്ധിച്ചാണ് ശിവഗിരിമഠം വത്തിക്കാനില്‍ ഇങ്ങനെ ഒരു സമ്മേളനം സംഘടിപ്പിച്ചത്.
വിവിധ മതങ്ങളുടെ പ്രതിനിധികള്‍ സമ്മേളനത്തില്‍ പങ്കെടുക്കും. നാളെ ഫ്രാന്‍സിസ് മാര്‍പാപ്പ ആശീര്‍വാദ പ്രഭാഷണം നിര്‍വഹിക്കും. ചടങ്ങില്‍ വത്തിക്കാനിലെ വിവിധ മതപ്രതിനിധികള്‍ സംബന്ധിക്കും. ഒന്നിന് ചേരുന്ന ലോക മതപാര്‍ലമെന്റില്‍ ഇറ്റലിയിലെ ജനപ്രതിനിധികള്‍ പങ്കെടുക്കും. 15 രാജ്യങ്ങളില്‍നിന്നു വിവിധ മതങ്ങളെ പ്രതിനിധീകരിക്കുന്നവര്‍ സമ്മേളനത്തില്‍ പങ്കെടുക്കുന്നുണ്ട്. ശിവഗിരി മഠം പ്രസിഡന്റ് സ്വാമി സച്ചിദാനന്ദ, സെക്രട്ടറി സ്വാമി ശുഭാംഗാനന്ദ എന്നിവരുടെ നേതൃത്വത്തിലുള്ള സംഘമാണ് ചുമതലകള്‍ നിര്‍വഹിക്കുന്നത്.