2024ലെ മികച്ച വനിതാ ക്രിക്കറ്റര്‍; കിവികളെ ടി 20 കിരീടമണിയിച്ച് ഓള്‍ റൗണ്ടര്‍ മികവ്; റെയ്ചല്‍ ഹെയ്ഹോ ഫ്ളിന്റ് ട്രോഫി അമേലിയ കെര്‍ സ്വന്തമാക്കി
ദുബായ്: ഐസിസിയുടെ 2024ലെ മികച്ച വനിതാ ക്രിക്കറ്റ് താരത്തിനുള്ള റെയ്ചല്‍ ഹെയ്ഹോ ഫ്ളിന്റ് ട്രോഫി ന്യൂസിലന്‍ഡ് താരം അമേലിയ കെറിന്. ലൗറ വോള്‍വാര്‍ട്, ചമരി അട്ടപ്പട്ടു, അന്നബെല്‍ സതര്‍ലാന്‍ഡ് എന്നിവരെ മറികടന്നാണ് അമേലിയ പുരസ്‌കാരം സ്വന്തമാക്കിയത്. നേരത്തെ ഐസിസിയുടെ 2024ലെ മികച്ച വനിതാ ടി20 താരമായും അമേലിയ കെര്‍ തിരഞ്ഞെടുക്കപ്പെട്ടിരുന്നു.
2017 മുതലാണ് ഐസിസി റെയ്ചല്‍ ഹെയ്ഹോ ഫ്ളിന്റ് ട്രോഫി മികച്ച വനിതാ താരങ്ങള്‍ക്കു സമ്മാനിക്കാന്‍ ആരംഭിച്ചത്. പുരസ്‌കാരം നേടുന്ന നാലാമത്തെ മാത്രം താരമാണ് അമേലിയ കെര്‍. പുരസ്‌കാരം സ്വന്തമാക്കുന്ന ആദ്യ ന്യൂസിലന്‍ഡ് താരവും അമേലിയ തന്നെ. നേരത്തെ ഓസ്ട്രേലിയയുടെ എല്ലിസ് പെറി, ഇന്ത്യയുടെ സ്മൃതി മന്ധാന, ഇംഗ്ലണ്ടിന്റെ നാറ്റ് സീവര്‍ ബ്രാന്‍ഡ് എന്നിവരാണ് പുരസ്‌കാരം നേടിയവര്‍.
ന്യൂസിലന്‍ഡിനെ കന്നി ടി20 ലോകകപ്പ് കിരീട നേട്ടത്തിലേക്ക് നയിച്ച മികവടക്കം കഴിഞ്ഞ വര്‍ഷം മൂന്ന് ഫോര്‍മാറ്റിലും അമേലിയ കെര്‍ ഓള്‍ റൗണ്ട് മികവാണ് പുറത്തെടുത്തത്. ലോകകപ്പിലെ താരമായും കെര്‍ തിരഞ്ഞെടുക്കപ്പെട്ടിരുന്നു. കഴിഞ്ഞ വര്‍ഷം ഏകദിനത്തില്‍ 264 റണ്‍സും 14 വിക്കറ്റുകളും താരം സ്വന്തമാക്കി. ടി20യില്‍ 18 മത്സരങ്ങളില്‍ നിന്നു 387 റണ്‍സും 29 വിക്കറ്റുകളും വീഴ്ത്തി. ടി20 ലോകകപ്പില്‍ മാത്രം താരം 15 വിക്കറ്റുകള്‍ വീഴ്ത്തി.