12 പന്തിൽ 50, 32 പന്തിൽ 100; അഭിഷേക് ശർമ്മയുടെ ബാറ്റിന്റെ ചൂടറിഞ്ഞ് ബംഗാൾ; റെക്കോർഡുകൾ തകർത്തെറിഞ്ഞ വെടിക്കെട്ട് ഇന്നിംഗ്സ്; സയ്യിദ് മുഷ്താഖ് അലി ട്രോഫിയിൽ പഞ്ചാബിന് കൂറ്റൻ ജയം

ഹൈദരാബാദ്: സയ്യിദ് മുഷ്താഖ് അലി ട്രോഫി ക്രിക്കറ്റ് ചാമ്പ്യൻഷിപ്പിൽ ബംഗാളിനെതിരായ മത്സരത്തിൽ പഞ്ചാബ് ക്യാപ്റ്റൻ അഭിഷേക് ശർമ നടത്തിയ ബാറ്റിംഗ് വെടിക്കെട്ടിൽ ടീമിന് 112 റൺസിന്റെ ആധികാരിക ജയം. ഹൈദരാബാദ് ജിംഖാന ഗ്രൗണ്ടിൽ നടന്ന മത്സരത്തിൽ 32 പന്തിൽ സെഞ്ചുറി തികച്ച അഭിഷേക്, ചാമ്പ്യൻഷിപ്പിലെ നിരവധി റെക്കോർഡുകൾ തിരുത്തിക്കുറിച്ചു. അന്താരാഷ്ട്ര താരങ്ങളായ മുഹമ്മദ് ഷമി, ആകാശ് ദീപ്, ഷഹബാസ് അഹമ്മദ് എന്നിവരടങ്ങിയ ശക്തമായ ബംഗാൾ ബൗളിംഗ് നിരയെ നിലംപരിശാക്കിയായിരുന്നു അഭിഷേകിന്റെ ബാറ്റിംഗ്.

52 പന്തുകൾ മാത്രം നേരിട്ട താരം എട്ട് ബൗണ്ടറികളും 16 കൂറ്റൻ സിക്സറുകളും സഹിതം 148 റൺസാണ് അടിച്ചുക്കൂട്ടിയത്. വെറും 12 പന്തിൽ അർധസെഞ്ചുറി പൂർത്തിയാക്കിയ അഭിഷേക്, പിന്നീട് 20 പന്തുകൾ കൊണ്ട് സെഞ്ചുറിയിലേക്ക് കുതിച്ചെത്തി അമ്പരപ്പിച്ചു. അവിശ്വസനീയമായ വേഗതയിൽ സ്കോർ ചെയ്ത ഈ ഇന്നിങ്സ്, എതിരാളികളെ നിഷ്പ്രഭരാക്കി പഞ്ചാബിന് കൂറ്റൻ സ്കോർ നേടിക്കൊടുക്കുന്നതിൽ നിർണായകമായി മാറി. സയ്യിദ് മുഷ്താഖ് അലി ട്രോഫി ചരിത്രത്തിലെ ഏറ്റവും വേഗമേറിയ സെഞ്ചുറികളിലൊന്ന് സ്വന്തം പേരിലാക്കിയ അഭിഷേക്, പഞ്ചാബിന്റെ 112 റൺസിന്റെ കൂറ്റൻ വിജയം സമ്മാനിക്കുകയായിരുന്നു.

ടി20 ക്രിക്കറ്റിൽ ഇന്ത്യൻ താരങ്ങളിൽ ഏറ്റവും വേഗത്തിൽ അർദ്ധസെഞ്ച്വറി നേടുന്നവരുടെ പട്ടികയിൽ അഭിഷേക്, തന്റെ ഉപദേഷ്ടാവായ യുവരാജ് സിംഗിനൊപ്പമെത്തി. 2007-ലെ പ്രഥമ ടി20 ലോകകപ്പിൽ ഇംഗ്ലണ്ടിനെതിരെ യുവരാജിനെതിരെ യുവരാജ് 12 പന്തിൽ അർദ്ധസെഞ്ച്വറി തികച്ചിരുന്നു. 12 പന്തിൽ ഫിഫ്‌റ്റിയടിച്ച അഭിഷേക് അടുത്ത 20 പന്തുകൾക്കുള്ളിൽ തന്റെ സെഞ്ച്വറിയും പൂർത്തിയാക്കി. 32 പന്തിൽ നിന്ന് മൂന്നക്കം കടന്ന ഈ പ്രകടനം ഒരു ഇന്ത്യൻ താരം ടി20യിൽ നേടുന്ന സംയുക്ത നാലാമത്തെ അതിവേഗ സെഞ്ച്വറിയാണ്. 7 ഫോറുകളും 11 സിക്സറുകളും ഉൾപ്പെട്ടതായിരുന്നു താരത്തിന്റെ സെഞ്ച്വറി നേട്ടം.

52 പന്തുകൾ നേരിട്ട് 8 ഫോറുകളും 16 കൂറ്റൻ സിക്സറുകളും സഹിതം 148 റൺസ് നേടി അഭിഷേക് പുറത്തായി. ടി20 ക്രിക്കറ്റിലെ താരത്തിന്റെ എട്ടാമത്തെ സെഞ്ച്വറിയായിരുന്നു ഇത്. ഈ നേട്ടത്തോടെ, ടി20യിൽ ഏറ്റവും കൂടുതൽ സെഞ്ച്വറികൾ നേടിയ ഇന്ത്യൻ താരങ്ങളുടെ പട്ടികയിൽ രോഹിത് ശർമ്മയുടെ (8) റെക്കോർഡിനൊപ്പം അഭിഷേക് എത്തി. വിരാട് കോഹ്ലിക്ക് (9 സെഞ്ച്വറികൾ) മാത്രമാണ് ഇനി അഭിഷേകിന് മുന്നിലുള്ളത്. കൂടാതെ, അഭിഷേകിന്റെ ഈ 148 റൺസ് പ്രകടനം സയ്യിദ് മുഷ്താഖ് അലി ട്രോഫി ചരിത്രത്തിലെ ഏറ്റവും ഉയർന്ന രണ്ടാമത്തെ വ്യക്തിഗത സ്കോറുമാണ്. ഷമിയുടെ നാലോവറിൽ നിന്ന് 61 റൺസാണ് പഞ്ചാബ് ഓപ്പണർ അടിച്ചെടുത്തത്.

അഭിഷേകിന്റെ പ്രകടനത്തിന്റെ പിൻബലത്തിൽ പഞ്ചാബ് ടീം ടി20 ക്രിക്കറ്റ് ചരിത്രത്തിലെ ഒരു വലിയ നാഴികക്കല്ല് പിന്നിട്ടു. സഹ ഓപ്പണറായ പ്രഭ്‌സിമ്രാൻ സിംഗുമായി (35 പന്തിൽ 70 റൺസ്) ചേർന്ന് അഭിഷേക് ആദ്യ വിക്കറ്റിൽ 205 റൺസിന്റെ കൂറ്റൻ കൂട്ടുകെട്ടാണ് പടുത്തുയർത്തിയത്. ഈ കൂട്ടുകെട്ടും ഒരു ടൂർണമെന്റ് റെക്കോർഡാണ്. നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 310 റൺസ് എന്ന പടുകൂറ്റൻ സ്കോറാണ് പഞ്ചാബ് നേടിയത്. ടി20 ക്രിക്കറ്റ് ചരിത്രത്തിലെ ഏറ്റവും ഉയർന്ന നാലാമത്തെ ടീം ടോട്ടലും സയ്യിദ് മുഷ്താഖ് അലി ട്രോഫി ചരിത്രത്തിലെ രണ്ടാമത്തെ ഉയർന്ന ടോട്ടലുമാണിത്.