തിലക് വർമ്മയ്ക്ക് പരിക്ക്; ടി20 ലോകകപ്പിന് മുമ്പ് ഇന്ത്യക്ക് കനത്ത തിരിച്ചടി; ന്യൂസിലൻഡിനെതിരായ പരമ്പര നഷ്ടമാകും; പകരം ഗില്ലിന് സാധ്യത?

ഹൈദരാബാദ്: വരാനിരിക്കുന്ന ടി20 ലോകകപ്പിന് മുന്നോടിയായി ഇന്ത്യൻ ക്രിക്കറ്റ് ടീമിന് തിരിച്ചടിയായി യുവ ബാറ്റർ തിലക് വർമയുടെ പരിക്ക്. അടിവയറ്റിൽ പരിക്കേറ്റതിനെ തുടർന്ന് തിലക് വർമ ശസ്ത്രക്രിയക്ക് വിധേയനായി. ന്യൂസിലൻഡിനെതിരായ ടി20 പരമ്പരയിലെ മത്സരങ്ങളിൽ താരം കളിക്കാൻ സാധ്യതയില്ലെന്നാണ് റിപ്പോർട്ടുകൾ. ജനുവരി 21-നാണ് കിവീസിനെതിരായ ടി20 പരമ്പര ആരംഭിക്കുന്നത്.

കടുത്ത വേദനയെത്തുടർന്ന് ആശുപത്രിയിൽ പ്രവേശിപ്പിച്ച താരത്തിന് വിജയകരമായി ശസ്ത്രക്രിയ നടത്തിയതായി അടുത്ത വൃത്തങ്ങളെ ഉദ്ധരിച്ച് പിടിഐ റിപ്പോർട്ട് ചെയ്തു. നിലവിൽ തിലക് സുഖംപ്രാപിച്ചുവരികയാണ്. താരത്തിന്റെ രോഗമുക്തിയെക്കുറിച്ചും കളിക്കളത്തിലേക്കുള്ള തിരിച്ചുവരവിനെക്കുറിച്ചും മെഡിക്കൽ പാനലുമായി ചർച്ച നടത്തിയ ശേഷം കൂടുതൽ വിവരങ്ങൾ അറിയിക്കുമെന്നും റിപ്പോർട്ടിൽ പറയുന്നു. വിജയ് ഹസാരെ ട്രോഫിയിൽ ഹൈദരാബാദ് ടീമിനൊപ്പമായിരിക്കെയാണ് തിലകിന് പരിക്കേറ്റത്.

തിലക് വർമയ്ക്ക് പകരം ടീമിൽ ആരെയെടുക്കുമെന്ന കാര്യത്തിൽ ഇതുവരെ വ്യക്തതയില്ല. ടി20 സ്ക്വാഡിൽ നിന്ന് ഒഴിവാക്കപ്പെട്ട മുൻ ഉപനായകൻ ശുഭ്മാൻ ഗില്ലിനെ ഉൾപ്പെടുത്തുമോ എന്നതായിരുന്നു പ്രധാന ചർച്ച. എന്നാൽ ഗില്ലിനെ ടീമിലെടുക്കാൻ സാധ്യതയില്ലെന്നാണ് ഇന്ത്യൻ എക്സ്പ്രസ് റിപ്പോർട്ട് ചെയ്യുന്നത്. നിലവിലെ ടെസ്റ്റ്, ഏകദിന നായകനായ ഗില്ലിനെ ടീമിൽ കളിപ്പിക്കാതിരിക്കുന്നത് ശരിയായ സമീപനമായിരിക്കില്ലെന്നാണ് സെലക്ടർമാർ കരുതുന്നതെന്നും റിപ്പോർട്ടിൽ പറയുന്നു.

അതേസമയം, മറ്റൊരു പ്രധാന താരമായ ശ്രേയസ് അയ്യർ ഫിറ്റ്നസ് വീണ്ടെടുത്തതായി റിപ്പോർട്ടുണ്ട്. വിജയ് ഹസാരെ ട്രോഫിയിൽ മുംബൈക്ക് വേണ്ടി ഹിമാചൽ പ്രദേശിനെതിരെ താരം 53 പന്തുകളിൽ നിന്ന് 82 റൺസ് നേടി മികച്ച പ്രകടനം കാഴ്ചവെച്ചു. ന്യൂസിലൻഡിനെതിരായ ഏകദിന പരമ്പരയിൽ ശ്രേയസ് അയ്യർ കളിക്കുമെന്നാണ് പ്രതീക്ഷിക്കുന്നത്.