'എന്റെ ആത്മാവും ഹൃദയവും തുടിക്കുന്ന മണ്ണിലേക്ക് തിരിച്ചെത്തി; ഞാന്‍ വളരെയധികം സന്തോഷിച്ച ഇടം; കളിക്കാരന്‍ എന്ന നിലയില്‍ ഒരുനാള്‍ യാത്രപറയാന്‍ ഇവിടേക്ക് തിരിച്ചുവരും'; ബാഴ്‌സ ആരാധകരെ അമ്പരപ്പിച്ച് മെസി വീണ്ടും ക്യാംപ് നൗവില്‍
ബാഴ്സലോണ: അര്‍ജന്റീന നായകനും ഇതിഹാസ താരവുമായ ലയണല്‍ മെസി വീണ്ടും ബാഴ്സലോണയുടെ ഹോം മൈതാനമായ കാംപ് നൗ സ്റ്റേഡിയത്തില്‍. സ്റ്റേഡിയം പുതുക്കി പണിയുന്നതിനാല്‍ കുറച്ചു കാലമായി ഇവിടെ മത്സരങ്ങള്‍ നടക്കുന്നില്ല. നിലവില്‍ നവീകരണ ജോലികള്‍ പുരോഗമിക്കുകയാണ്. ഈ സീസണ്‍ അവസാനിക്കുന്നതിനുള്ളില്‍ തന്നെ സ്റ്റേഡിയം മത്സരങ്ങള്‍ക്കായി തുറക്കുമെന്നാണ് പ്രതീക്ഷിക്കുന്നത്. അതിനിടെയാണ് ഇതിഹാസ താരത്തിന്റെ അപ്രതീക്ഷിത വരവ്.
അപ്രതീക്ഷിതമായാണ് മെസി കാംപ് നൗ മൈതാനത്തേക്ക് വീണ്ടുമെത്തിയത്. 2021ല്‍ ബാഴ്സലോണയുടെ പടിയിറങ്ങിയ ശേഷം താരം ഇവിടേക്ക് വന്നിട്ടില്ല. അതുകൊണ്ടു തന്നെ തിരിച്ചു വരവ് ഏറെ വൈകാരികമാണെന്നു താരം സമൂഹ മാധ്യമങ്ങളില്‍ കുറിച്ചു. സ്പാനിഷ് ക്ലബിന്റെ നവീകരിച്ച കാംപ് നൗ സ്റ്റേഡിയം കാണാനാണ് മെസി എത്തിയത്.
മേജര്‍ ലീഗ് സോക്കറില്‍ ഇന്റര്‍ മയാമിക്കായി തകര്‍പ്പന്‍ പ്രകടനം നടത്തിയതിന് പിന്നാലെ മെസി ബാഴ്‌സലോണയിലേക്ക് പറക്കുകയായിരുന്നു. സ്റ്റേഡിയത്തിനകത്തും പുറത്തുനിന്നും ചിത്രങ്ങളെടുത്ത മെസി സാമൂഹിക മാധ്യങ്ങളില്‍ പങ്കുവച്ചു. എന്റെ ആത്മാവും ഹൃദയവും തുടിക്കുന്ന മണ്ണിലേക്ക് തിരിച്ചെത്തി. ഞാന്‍ വളരെയധികം സന്തോഷിച്ച ഇടം. ലോകത്തിലെ ഏറ്റവും സന്തോഷവാനായ വ്യക്തിയാണെന്ന് ആയിരം മടങ്ങ് തോന്നിപ്പിച്ച സ്ഥലം. കളിക്കാരന്‍ എന്ന നിലയില്‍ യാത്രപറയാന്‍ കൂടി ഒരു ദിവസം ഇവിടേക്ക് തിരിച്ചു കഴിയുമെന്നാണ് പ്രതീക്ഷയെന്നും മെസി ചിത്രങ്ങള്‍ക്കൊപ്പം കുറിച്ചു.
'ഇന്നലെ രാത്രി എന്റെ ആത്മാനന്ദമായ ഒരിടത്തേക്ക് ഞാന്‍ തിരിച്ചെത്തി. ഞാന്‍ ഏറെ സന്തോഷിച്ച സ്ഥലം, ലോകത്തില്‍ ഏറ്റവും ആനന്ദമുള്ള വ്യക്തിയായി എന്നെ ആയിരം മടങ്ങ് അനുഭവിപ്പിച്ച ഇടം. കളിക്കാരനെന്ന നിലയില്‍ ഇറങ്ങിപ്പോകല്‍ ഇവിടെ അസാധ്യമാണ്. ഒരു ദിവസം മടങ്ങി വരുമെന്ന പ്രതീക്ഷ ഇപ്പോഴും ബാക്കി നില്‍ക്കുന്നു'- സന്ദര്‍ശനത്തിനു പിന്നാലെ മെസി കുറിച്ചു.
20 വര്‍ഷത്തിലധികം മെസി ചെലവഴിച്ച ഇടമാണ് ബാഴ്സലോണ. ക്ലബും താരവും തമ്മില്‍ അഭേദ്യമായ ബന്ധമായിരുന്നു. മെസ്സി ക്ലബിനൊപ്പം സാധ്യമായ കിരീടങ്ങള്‍ എല്ലാം സ്വന്തമാക്കിയിരുന്നു. എന്നാല്‍ 2021ല്‍ സാമ്പത്തിക പ്രതിസന്ധിയില്‍ ക്ലബ് വട്ടംചുറ്റിയതോടെയാണ് താരം ബാഴ്‌സ വിട്ട് പിഎസ്ജിയിലേക്ക് ചേക്കേറിയത്. മെസിയുടെ വിട പറച്ചില്‍ സമയത്ത് അദ്ദേഹം പൊട്ടിക്കരഞ്ഞാണ് ടീമിന്റെ പടിയിറങ്ങിയത്.
പി എസ് ജി താരമായിരിക്കെ അറ്ജന്റീന കുപ്പായത്തില്‍ ലോകകപ്പ് കിരീടം നേടിയ മെസി പിന്നീട് മേജര്‍ ലീഗ് സോക്കറില്‍ ഇന്റര്‍ മയാമിക്കായി പന്ത് തട്ടാന്‍ പോയി. അടുത്ത വര്‍ഷം നടക്കുന്ന ഫു്ടബോള്‍ ലോകകപ്പിലും കളിക്കുമോ എന്ന കാര്യത്തില്‍ മെസി ഇതുവരെ മനസുതുറന്നിട്ടില്ല.