ഭക്തിഗാന രചയിതാവ് സതീഷ് കെ മേനോനെ കെ.എച്.എന്‍.എ. ആദരിച്ചു
ന്യൂയോര്‍ക്ക്: മകരവിളക്ക് മഹോത്സവത്തോടനുബന്ധിച്ച് ജനുവരി 11 ശനിയാഴ്ച വൈകീട്ട് ന്യൂയോര്‍ക്കിലെ വൈഷ്ണവ ടെമ്പിള്‍ ഓഡിറ്റോറിയത്തില്‍ വച്ച് ബ്രീത്ത് മ്യൂസിക് അക്കാഡമി ഡിട്രോയിറ്റിന്റെ ഭക്തിഗാന മേള, അയ്യപ്പ സേവാസംഘവും കൃഷ്ണകൃപാ മ്യൂസിക് ടീമും ചേര്‍ന്ന് അവതരിപ്പിച്ചു. ഈ അയ്യപ്പ ഗാനമേളയിലെ ശ്രദ്ധിക്കപ്പെട്ട നിരവധി ഗാനങ്ങള്‍ സതീഷ് കെ മേനോന്‍ രചിച്ചതായിരുന്നു.
അനിത കൃഷ്ണയുടെ നേതൃത്വത്തില്‍ ആരംഭിച്ച ഗാനമേള, ഡിട്രോയിറ്റില്‍ നിന്നെത്തിയ ബ്രീത്ത് മ്യൂസിക് അക്കാഡമി ടീമംഗങ്ങള്‍ മകരവിളക്ക് മഹോത്സവത്തില്‍ ശബരിമല സന്നിധാനത്തിന്റെ മാതൃകയില്‍ തീര്‍ത്ത മണ്ഡപത്തിലെ സംഗീതക്കച്ചേരി അവിസ്മരണീയമാക്കി. അയ്യപ്പസേവാ സംഘം പ്രസിഡന്റ് കൂടിയായ ഗോപിനാഥ് കുറുപ്പും കൃഷ്ണകൃപാ മ്യൂസിക്കിന്റെ പ്രസിഡന്റ് സതീഷ് കെ മേനോനും എന്‍.ബി.എ. പ്രസിഡന്റ് ജനാര്‍ദ്ദനന്‍ തോപ്പിലും ചേര്‍ന്ന് മണ്ഡപത്തില്‍ ഭദ്രദീപം തെളിയിച്ചു.
രാധാമണി നായരുടെ ഭക്തിനിര്‍ഭരമായ ഈശ്വര പ്രാര്‍ത്ഥനക്ക് ശേഷം അയ്യപ്പ സേവാസംഘം സെക്രട്ടറിയും കെ.എച്.എന്‍.എ. ട്രഷററുമായ രഘുവരന്‍ നായര്‍ ഡിട്രോയിറ്റ് ബ്രീത്ത് മ്യൂസിക് അക്കാഡമിയുടെ അംഗങ്ങളെ സദസ്സിന് പരിചയപ്പെടുത്തി. പ്രസിഡന്റ് ഗോപിനാഥ് കുറുപ്പ് സ്വാഗതം ആശംസിച്ചു. മാസ്റ്റര്‍ ഓഫ് സെറിമണിയായി ശോഭാ കറുവക്കാട്ട് പ്രശംസനീയമായി നിര്‍വഹിച്ചു. സതീഷ് മേനോന്‍ നന്ദിപ്രകാശനം നടത്തിക്കൊണ്ട് ബ്രീത്ത് മ്യൂസിക് അക്കാഡമിയിലെ എല്ലാവരെയും പൊന്നാട അണിയിച്ച് ആദരിച്ചു.
പ്രശംസനീയമായി മകരവിളക്ക് മഹോത്സവം വിജയിപ്പിക്കുന്നതിന് എന്‍.ബി.എ-യുടെ മുന്‍ സെക്രട്ടറി സേതുമാധവന്റെ ആത്മാര്‍ത്ഥമായ പ്രവര്‍ത്തനം ശ്ലാഘനീയമായിരുന്നു. പതിവുപോലെ തന്നെ മണിമണ്ഡപം അലങ്കരിച്ച് ഒരുക്കിയ തികഞ്ഞ കലാകാരനായ സുധാകരന്‍ പിള്ള അത് വളരെ ഭംഗിയാക്കി.
കെ.എച്ച്.എന്‍.എ. പ്രസിഡന്റ് ഡോ നിഷാ പിള്ള തദവസരത്തില്‍ വിരാട് 25 സില്‍വര്‍ ജൂബിലി കണ്‍വന്‍ഷന്‍ ഓഗസ്റ്റ് 17 മുതല്‍ 19 വരെ ന്യൂജെഴ്‌സിയിലെ അറ്റ്ലാന്റിക് സിറ്റിയിലുള്ള എം ജി എം റിസോര്‍ട്ട് ഇന്റര്‍നാഷണലില്‍ നടക്കുന്നതിനെക്കുറിച്ച് വിശദീകരിക്കുകയും കണ്‍വന്‍ഷനിലേക്ക് ഏവരേയും സ്വാഗതം ചെയ്യുകയും ചെയ്തു. ഡോ. നിഷാ പിള്ളയെ സദസ്സിന് പരിചയപ്പെടുത്തിക്കൊണ്ട് അയ്യപ്പസേവാ സംഘം പ്രസിഡന്റും കെ.എച്ച്.എന്‍.എ ട്രസ്റ്റീ ബോര്‍ഡ് ചെയര്‍മാനുമായ ഗോപിനാഥ് കുറുപ്പ് പറഞ്ഞത് ഇവിടെ ന്യൂയോര്‍ക്കില്‍ ഒരു വിഭാഗീയതയുമില്ല. എല്ലാ ഹൈന്ദവ സഹോദരങ്ങളും ഒരുമയോടെ ഒറ്റക്കെട്ടായി ''സില്‍വര്‍ ജൂബിലി'' കണ്‍വന്‍ഷന്‍ വിജയിപ്പിച്ച് അവിസ്മരണീയമാക്കും എന്നാണ്.
തുടര്‍ന്ന് കെ.എച്ച്.എന്‍.എ ട്രഷറര്‍ രഘുവരന്‍ നായരും ചെയര്‍മാന്‍ ഗോപിനാഥ് കുറുപ്പും ചേര്‍ന്ന് രജിസ്‌ട്രേഷന്‍ പാക്കറ്റ് അംഗങ്ങളുടെയിടയില്‍ വിതരണം ചെയ്തു.നൂറു കണക്കിന് ഭക്തിഗാനങ്ങള്‍ രചിച്ച സതീഷ് കെ. മേനോനെ കെ.എച്.എന്‍.എ. പ്രസിഡന്റ് ഡോ. നിഷാ പിള്ളയും ചെയര്‍മാന്‍ ഗോപിനാഥ് കുറുപ്പും ചേര്‍ന്ന് പൊന്നാട അണിയിച്ച് ആദരിച്ചു. ട്രഷറര്‍ രഘുവരന്‍ നായര്‍, ട്രസ്റ്റീ ബോര്‍ഡ് മെമ്പര്‍ വനജ നായര്‍, ഡയറക്ടര്‍ ബോര്‍ഡ് മെമ്പര്‍ രാധാമണി നായര്‍, എന്‍ എസ് എസ് ഹഡ്‌സണ്‍ വാലി പ്രസിഡന്റ് ജി.കെ. നായര്‍, എന്‍ ബി എ പ്രസിഡന്റ് ജനാര്‍ദ്ദനന്‍ തോപ്പില്‍, മഹിമ പ്രസിഡന്റ് പുരുഷോത്തമ പണിക്കര്‍, എസ് എന്‍ എ ചെയര്‍മാന്‍ സഹൃദയ പണിക്കര്‍, കെ എച്ച് എന്‍ എ ന്യൂയോര്‍ക്ക് കണ്‍വന്‍ഷന്‍ കോഓര്‍ഡിനേറ്റര്‍ ഡോ ഉണ്ണിക്കൃഷ്ണന്‍ തമ്പി എന്നിവര്‍ സന്നിഹിതരായിരുന്നു.
വാര്‍ത്ത: ജയപ്രകാശ് നായര്‍