പ്രതീക്ഷയുടെ പ്രകാശം തൊട്ടുണര്‍ത്തി സോമര്‍സെറ്റ് ദേവാലയത്തില്‍ ക്രിസ്മസ് കരോളിംഗ്
ന്യൂജേഴ്‌സി: നിലാവിന്റേയും, നക്ഷത്രങ്ങളുടേയും, ചിമ്മിനിവെട്ടത്തിന്റേയും ഇത്തിരിവെളിച്ചത്തില്‍ ലോകരക്ഷകന്റെ ജനനം വിളിച്ചറിയിച്ച് കരോള്‍ സംഘങ്ങള്‍ ലോകമെമ്പാടും ക്രിസ്മസ് രാവുകളെ സമ്പന്നമാക്കുമ്പോള്‍, ശാന്തിയുടേയും സമാധാനത്തിന്റേയും, സ്‌നേഹദൂതുമായി സോമര്‍സെറ്റ് സെന്റ് തോമസ് സീറോ മലബാര്‍ ഫൊറോനാ ദേവാലയവും വാര്‍ഡ് തോറുമുള്ള ക്രിസ്മസ് കരോള്‍ ഈ വര്‍ഷവും ഭക്തിസാന്ദ്രമായി നടത്തപ്പെട്ടു.
സമാധാനത്തിന്റെയും, പ്രത്യാശയുടേയും നക്ഷത്രങ്ങളുദിച്ച ക്രിസ്മസ് കാലത്തിന്റെ ഓര്‍മയുണര്‍ത്തി, സകല ജനത്തിനുംവേണ്ടിയുള്ള വലിയ സന്തോഷത്തിന്റെ സദ്വാര്‍ത്ത ഉത്‌ഘോഷിച്ച ക്രിസ്മസ് രാത്രിയുടെ മനോഹാരിത വിളിച്ചോതുന്ന ഗാനങ്ങള്‍ കരോള്‍ സംഘം ഇംഗ്ലീഷിലും, മലയാളത്തിലും ആലപിച്ചു. നേറ്റിവിറ്റിയും, ക്രിസ്മസ് പാപ്പയും കരോളിംഗിനെ കൂടുതല്‍ ആകര്‍ഷകമാക്കി.
വാര്‍ഡ് തിരിച്ചു നടത്തിയ ക്രിസ്തുമസ് കരോളിംഗിന് വാര്‍ഡ് പ്രതിനിധികള്‍ നേതൃത്വം നല്‍കി. ചുമലിലെ സഞ്ചിയില്‍ സമ്മാനങ്ങളുമായി ക്രിസ്മസ് പാപ്പായും ഗായക സംഘത്തെ അനുഗമിച്ചു. ഉണ്ണിയേശുവിന്റെ തിരുപ്പറവി നല്‍കുന്ന സന്ദേശവുമായി പ്രാര്‍ത്ഥനാ ചൈതന്യത്തോടെ നടത്തിയ കരോളിംഗില്‍ ഓരോ വീടുകളിലും കുടുംബ പ്രാര്‍ത്ഥനയോടെ ആരംഭിച്ച്, ക്രിസ്തുമസ് സന്ദേശം നല്‍കി ക്രിസ്തുമസ് ഗാനാലാപനത്തോടെയാണ് സമാപിച്ചത്.
വികാരി അച്ചനും ഇടവകാംഗങ്ങളോടൊപ്പം കരോളിംഗില്‍ പങ്കെടുത്തു.ശാന്തിയുടേയും സമാധാനത്തിന്റേയും സ്നേഹത്തിന്റേയും സന്ദേശം നാമോരുത്തരിലും നിറയ്ക്കുവാന്‍ ദൈവപുത്രന്റെ തിരുപ്പിറവി ആഘോഷത്തിലൂടെ സാധിക്കണമെന്ന് വികാരി ഫാ. ആന്റണി പുല്ലുകാട്ട് ആശംസാ സന്ദേശത്തില്‍ പറഞ്ഞു.
ക്രിസ്മസ് പാപ്പായുടെ അകമ്പടിയോടെ ഉണ്ണിയേശുവിനെ കൈയ്യിലേന്തി നടത്തിയ കുടുംബ സന്ദര്‍ശനം കുട്ടികള്‍ക്കും മുതിര്‍ന്നവര്‍ക്കും സ്നേഹത്തിന്റേയും സന്തോഷത്തിന്റേയും നിമിഷങ്ങളായിരുന്നു. കരോള്‍ സംഘത്തെ വരവേല്‍ക്കാന്‍ എല്ലാം വീടുകളിലും ക്രിസ്മസ് ട്രീയും, മനോഹരമായ ദീപാലങ്കാരങ്ങളും നടത്തിയിരുന്നു.
ഒമ്പത് വാര്‍ഡുകളിലായി നടത്തിയ കരോളിംഗില്‍ ഇടവകയിലെ 250 -ല്‍പ്പരം കുടുംബങ്ങള്‍ സന്ദര്‍ശിച്ചതായി വാര്‍ഡ് പ്രതിനിധികള്‍ അറിയിച്ചു.ജോസ് ജോസഫ് കണ്ടവനം / മിനി റോയ് (സെന്റ് അല്‍ഫോന്‍സ വാര്‍ഡ് ), ഫ്രാന്‍സിസ് മാത്യു കല്ലുപുരക്കല്‍ / ലിയ നേരേപറമ്പില്‍ (സെന്റ്ആന്റണി വാര്‍ഡ് ), സോമി മാത്യു / റീബ പോള്‍ (സെന്റ് ജോര്‍ജ് വാര്‍ഡ്), സാം അലക്‌സാണ്ടര്‍ / ലിന്‍ഡ റോബര്‍ട്ട് ( സെന്റ് ജോസഫ് വാര്‍ഡ്), സൂരജ് ജോര്‍ജ് / ലിസ് മാത്യു (സെന്റ് ജൂഡ് വാര്‍ഡ്), സുനില്‍ ജോസ് / റീനു ജേക്കബ് ( സെന്റ് മേരി വാര്‍ഡ് ), കുരിയന്‍ കല്ലുവാരപരമ്പില്‍ / അനു സെബാസ്റ്റ്യന്‍ ( സെന്റ് പോള്‍ വാര്‍ഡ്), ലാസര്‍ ജോയ് വെള്ളാറ / ആനി വര്‍ഗീസ് (സെന്റ് തെരേസ ഓഫ് കലകട്ട വാര്‍ഡ്), ജോസഫ് പൗലോസ് തമ്പിതറയില്‍ / മഞ്ജു ജോസഫ് (സെന്റ്‌തോമസ് വാര്‍ഡ് ).ബോബി വര്‍ഗീസ് (ട്രസ്റ്റി), റോബിന്‍ ജോര്‍ജ് (ട്രസ്റ്റി), സുനില്‍ ജോസ് (ട്രസ്റ്റി) , ലാസര്‍ ജോയ് വെള്ളാറ (ട്രസ്റ്റി).