രാമൻ യംഗ് സയൻസ് ഇന്നൊവേറ്റർ ദേശീയ അവാർഡ് പുതിയകാവ് അമൃത വിദ്യാലയത്തിന്

സ്‌കൂൾ കുട്ടികൾക്കുള്ള ദേശീയ ശാസ്ത്ര അവാർഡായ രാമൻ യംഗ് സയൻസ് ഇന്നൊവേറ്റർ അവാർഡ് (RYSI) ആറാം ക്ലാസ്സ് വിദ്യാർത്ഥിയായ തേജസ് ശ്യാംലാൽ കരസ്ഥമാക്കി. രാജ്യത്തിന്റെ പലഭാഗങ്ങളിൽ നിന്നുള്ള പതിമൂവായിരത്തിലധികം വിദ്യാർത്ഥികൾ പങ്കെടുത്ത ഈ മത്സരത്തിൽ അഞ്ചു മുതൽ ഏഴ് ക്ലാസ് വരെയുള്ള വിഭാഗത്തിൽ അവസാന റൗണ്ട് വരെ എത്തിയ 41 വിദ്യാർത്ഥികൾക്കാണ് ഈ അവാർഡ് നൽകിയത്. ലളിതമായ മെറ്റീരിയലുകൾ ഉപയോഗിച്ച് എവിടെയും പര്യവേക്ഷണം നടത്തുക, ശാസ്ത്രത്തെ രസകരമായ രീതിയിൽ സമീപിക്കുക തുടങ്ങിയ പ്രവണത കുട്ടികളിൽ വളർത്തിയെടുക്കുക എന്ന ലക്ഷ്യത്തോടെ രാമൻ റിസേർച്ച് ഇൻസ്റ്റിട്യൂട്ടാണ് ഈ അവാർഡുകൾ നൽകുന്നത്.

ഓരോ വർഷവും മികച്ച പ്രകടനം കാഴ്ചവയ്ക്കുന്ന സ്‌കൂളുകൾക്ക് 'സ്‌കൂൾ ഓഫ് സയൻസ് എക്‌സല്ലൻസ്' അവാർഡ് നൽകി രാമൻ റിസേർച്ച് ഇൻസ്റ്റിട്യൂട്ട് ആദരിക്കാറുണ്ട്. കഴിഞ്ഞ രണ്ടു വർഷങ്ങളിലും തുടർച്ചയായി പുതിയകാവ് അമൃതവിദ്യാലയം ഈ അവാർഡ് കരസ്ഥമാക്കുന്നതിൽ അതിയായ സന്തോഷമുണ്ടെന്ന് പ്രിൻസിപ്പൽ സ്വാമിനി ശ്രീചരണാമൃത പ്രാണ പറഞ്ഞു.