വില കൂടിയ ഇനത്തിൽപ്പെട്ട തത്തയെ കൊടുക്കാമെന്നു പറഞ്ഞ് പണം തട്ടി; ഒരാൾ അറസ്റ്റിൽ

ആലുവ:വില കൂടിയ ഇനത്തിൽപ്പെട്ട തത്തയെ കൊടുക്കാമെന്നു പറഞ്ഞ് പണം തട്ടിയ കേസിൽ ഒരാളെ മുനമ്പം പൊലീസ് അറസ്റ്റ് ചെയ്തു. കൊല്ലം മയ്യനാട് യേശു ഭവൻ വീട്ടിൽ നവീൻ ജോസഫ് ഫെർണാണ്ടസ് എന്ന മുഹമ്മദ് റിയാസ് (37) എന്നയാളെയാണ് അറസ്റ്റ് ചെയ്തത്. ഗ്രേറ്റ് പാരറ്റ് ഇനത്തിൽപ്പെട്ട തത്തയെ വിൽക്കാനുണ്ടെന്ന് പറഞ്ഞ് മാധ്യമങ്ങൾ വഴി ഇയാൾ പരസ്യം നൽകുകയായിരുന്നു.

ഇതു കണ്ട കുഴുപ്പിള്ളി സ്വദേശി ഇയാളുമായി ബന്ധപെടുകയും അഡ്വാൻസായി 18,000 രൂപ ബാങ്ക് അക്കൗണ്ട് വഴി നൽകുകയുമായിരുന്നു. തത്തയെ നൽകാതെ കബളിപ്പിച്ചതിനെ തുടർന്ന് പരാതിയിൽ പ്രതിയെ അറസ്റ്റ് ചെയ്തു.