പൊലീസ് സ്റ്റേഷനിൽ ഭീകരാന്തരീക്ഷം സൃഷ്ടിച്ചു പൊലീസുകാർക്ക് മർദ്ദനം; പ്രതി അറസ്റ്റിൽ

കോതമംഗലം: പൊലീസ് സ്റ്റേഷനിൽ ഭീകരാന്തരീക്ഷം സൃഷ്ടിച്ച പ്രതി അറസ്റ്റിൽ. സ്റ്റേഷനിൽ ഭീകരാന്തരീക്ഷം സൃഷ്ടിച്ച് പൊലീസുദ്യോഗസ്ഥരെ മർദിച്ച കുട്ടമംഗലം പിറക്കുന്നം മാറച്ചേരിയിൽ വീട്ടിൽ ജോണി (57) യെയാണ് അറസ്റ്റ് ചെയ്തത്. ജോണി ജോലി സ്ഥലത്ത് എത്തി കത്തി കാട്ടി ഭീഷണിപ്പെടുത്തിയെന്ന പരാതിയുമായി കഴിഞ്ഞ ദിവസം ഭാര്യ കോതമംഗലം സ്റ്റേഷനിലെത്തിയിരുന്നു.

പരാതിയുടെ അടിസ്ഥാനത്തിൽ ഇയാളെ സ്റ്റേഷനിലേക്ക് വരുത്തി. സംഭവത്തെക്കുറിച്ച് എസ്‌ഐ ചോദിക്കുന്നതിനിടയിൽ ഇയാൾ ആക്രമിക്കാൻ ശ്രമിക്കുകയും അസഭ്യം പറയുകയുമായുരുന്നു. തടയാനെത്തിയ രണ്ട് പൊലീസുദ്യോഗസ്ഥർക്ക് മർദ്ദനമേറ്റു. ഭാര്യയെ ഭീഷണിപ്പെടുത്തിയതിനും, സ്റ്റേഷനിൽ അക്രമം കാണിച്ചതിനും ഇയാൾക്കെതിരെ കേസെടുത്തു. കോടതിയിൽ ഹാജരാക്കിയ പ്രതിയെ റിമാന്റ് ചെയ്തു.