അഞ്ചൽ: അയൽവാസികളായ സ്ത്രീകളെ അസഭ്യം പറയുകയും നഗ്‌നത പ്രദർശിപ്പിക്കുകയും ചെയ്ത യുവാവിനെ അഞ്ചൽ പൊലീസ് അറസ്റ്റ് ചെയ്തു. പാലമുക്ക് ഇടയിലഴികത്ത് വീട്ടിൽ ഷിബു (35) വാണ് അറസ്റ്റിലായത്.

കഴിഞ്ഞ ദിവസം വൈകീട്ട് മദ്യപിച്ചെത്തിയ ഷിബു അയൽവാസിയായ വയോധികയെ അസഭ്യം പറഞ്ഞു. രോഷാകുലയായ സമീപവാസിയായ മറ്റൊരു സ്ത്രീ ഷിബുവിനെ വഴക്കു പറയുകയും പൊലീസിനെ ഫോൺ വിളിച്ച് വരുത്തുമെന്നും അറിയിച്ചു. പിന്നാലെ കൂടുതൽ പ്രകോപിതനായ ഷിബു അക്രമാസക്തനാവുകയും നഗ്‌നതാപ്രദർശനം നടത്തിക്കൊണ്ട് വെല്ലുവിളി നടത്തുകയും ചെയ്തു.

നാട്ടുകാരുടെ പരാതിയെത്തുടർന്ന് സ്ഥലത്തെത്തിയ പൊലീസ് ഷിബുവിനെ അറസ്റ്റ് ചെയ്തു. സ്ത്രീത്വത്തെ അപമാനിക്കുന്ന വിധത്തിൽ പെരുമാറിയതിനുള്ള കേസ് ചുമത്തിയ ശേഷം പുനലൂർ കോടതിയിൽ ഹാജരാക്കി.