സച്ചിൻ ദേവ് അടുത്ത സുഹൃത്ത്, ഒരേ രാഷ്ട്രീയം പരസ്പരം മനസ്സിലാക്കുന്നതിന് കാരണമായി; കുടുംബത്തിന്റേയും പാർട്ടിയുടേയും നിർദേശത്തിന് അനുസരിച്ച് ഉചിതമായ സമയത്ത് വിവാഹം നടത്തും; എംഎൽഎയുമായുള്ള വിവാഹ വാർത്തയോട് പ്രതികരിച്ചു മേയർ ആര്യ രാജേന്ദ്രൻ

തിരുവനന്തപുരം: സച്ചിൻ ദേവ് എംഎൽഎയുമായുള്ള വിവാഹവാർത്തയോട് പ്രതികരിച്ച് തിരുവനന്തപുരം മേയർ ആര്യ രാജേന്ദ്രൻ. ഏറെ കാലമായി സുഹൃത്തുക്കളായതിനു ശേഷമാണ് വിവാഹമെന്ന ആലോചനയിലേക്കെത്തിയത്. പരസ്പരം സംസാരിച്ചതിനു ശേഷം ഇരുവരുടേയും കുടുംബക്കാരേയും പാർട്ടിയേയും അറിയിക്കുകയായിരുന്നുവെന്ന് ആര്യ രാജേന്ദ്രൻ പറഞ്ഞു.

ഒരേ രാഷ്ട്രീയത്തിൽപ്പെട്ട ആളുകളായതുകൊണ്ടാണ് പരിചയക്കാരായതും സുഹൃത്തുക്കളായതും. പരസ്പരം മനസ്സിലാക്കുന്നതിലും സഹായിക്കുന്നതിലും അത് സഹായിച്ചു. വിവാഹം ഉടനെ ഉണ്ടാവില്ല. കുടുംബത്തിന്റേയും പാർട്ടിയുടേയും നിർദേശത്തിനനുസരിച്ച് ഉചിതമായ സമയത്ത് വിവാഹം നടത്തും. എപ്പോൾ നടത്തുമെന്നത് സംബന്ധിച്ച് നിലവിൽ തീരുമാനങ്ങളൊന്നുമില്ലെന്നും ആര്യ പറഞ്ഞു.

അത് അടിസ്ഥാനപരമായി ജീവിതത്തെ മുന്നോട്ട് കൊണ്ടുപോകുമെന്നാണ് വിശ്വസിക്കുന്നത്. എസ്.എഫ്.ഐ കാലം മുതൽ നല്ല സൗഹൃദമാണ് സച്ചിനുമായി. വിദ്യാഭ്യാസം പോലുള്ള വ്യക്തിപരമായ കാര്യങ്ങൾ ഉള്ളതിനാൽ നിലവിൽ ഉടനെ വിവാഹത്തിലേക്ക് കടക്കാൻ തീരുമാനിച്ചിട്ടില്ലെന്നും ആര്യ കൂട്ടിച്ചേർത്തു.

തിരുവനന്തപുരം മേയറായ ആര്യ രാജേന്ദ്രനും ബാലുശ്ശേരി എംഎൽഎ സച്ചിൻ ദേവും വിവാഹിതാരാവുന്നുവെന്ന വാർത്ത ഇന്നാണ് പുറത്തുവന്നത്. വിവാഹ തീയ്യതി പ്രഖ്യാപിച്ചില്ലെങ്കിലും ഇരുകുടുംബങ്ങളും ധാരണയായതായി സച്ചിന്റെ പിതാവ് കെ.എം നന്ദകുമാർ പറഞ്ഞു. നിയമസഭയിലെ ഏറ്റവും പ്രായം കുറഞ്ഞ എംഎൽഎയും, രാജ്യത്തെ ഏറ്റവും പ്രായം കുറഞ്ഞ മേയറുമാണ് വിവാഹിതരാകുന്നത്. ബാലസംഘം കാലം മുതലുള്ള ഇവരുടെ പരിചയമാണ് വിവാഹത്തിലേക്കെത്തിയത്. ബാലസംഘം, എസ്എഫ്‌ഐ പ്രവർത്തന കാലത്തു തന്നെ ഇരുവരും സുഹൃത്തുക്കളായിരുന്നു.

വിവാഹ തീയതി പ്രഖ്യാപിച്ചിട്ടില്ലെങ്കിലും ഒരു മാസത്തിന് ശേഷം വിവാഹം ഉണ്ടാകുമെന്നാണ് സൂചന. സച്ചിൻ ദേവ് എസ്എഫ്‌ഐ സംസ്ഥാന സെക്രട്ടറിയായിരിക്കെ ഇക്കഴിഞ്ഞ നിയമസഭാ തിരഞ്ഞെടുപ്പിലായിരുന്നു ബാലുശ്ശേരിയിൽ നിന്ന് മത്സരിച്ച് വിജയിച്ചത്. നിലവിൽ എസ്എഫ്‌ഐ അഖിലേന്ത്യാ ജോയിന്റ് സെക്രട്ടറി കൂടിയാണ്.

തിരുവനന്തപുരം ഓൾ സെയിന്റ്സ് കോളേജിൽ വിദ്യാർത്ഥിയായിരിക്കെയാണ് ആര്യ രാജ്യത്തെ ഏറ്റവും പ്രായം കുറഞ്ഞ മേയറായി ശ്രദ്ധ നേടിയത്. ബാല സംഘത്തിന്റെ സംസ്ഥാന പ്രസിഡന്റും എസ്എഫ്‌ഐ സംസ്ഥാന കമ്മിറ്റി അംഗവുമാണ് ആര്യ. 2020ലെ കേരള തദ്ദേശ സ്വയംഭരണ തെരഞ്ഞെടുപ്പിൽ മുടവന്മുകൾ വാർഡിൽ നിന്ന് എൽഡിഎഫ് സ്ഥാനാർത്ഥിയായി വിജയിച്ചാണ് ആര്യ രാജേന്ദ്രൻ തിരുവനന്തപുരം കോർപ്പറേഷൻ മേയറായത്. 21-ാം വയസിലായിരുന്നു മേയറായി ആര്യ അധികാരമേറ്റത്.