മീററ്റ്: യുപിയിൽ തെരഞ്ഞെടുപ്പ് പ്രചാരണം കഴിഞ്ഞ് മടങ്ങിയ എഐഎംഐഎം തലവൻ അസദുദ്ദീൻ ഒവൈസിക്ക് നേരെ ആക്രമണം. താൻ സഞ്ചരിച്ച വാഹനത്തിന് നേരെ വെടിയുതിർത്തെന്നാണ് ഒവൈസിയുടെ പരാതി. മീററ്റിലെ തെരഞ്ഞെടുപ്പ് പ്രചാരണം കഴിഞ്ഞ് ഡൽഹിക്ക് മടങ്ങും വഴിയാണ് ആക്രമണം നടന്നത്.

താൻ സുരക്ഷിതനാണെന്നും മറ്റൊരു വാഹനത്തിൽ ഡൽഹിക്ക് മടങ്ങിയെന്നും ഒവൈസി വ്യക്തമാക്കി. സംഭവം അന്വേഷിക്കുന്നതായി യുപി പൊലീസ് അറിയിച്ചു.

യുപിയിലെ ഹാപൂരിൽ ടോൾ പ്ലാസയ്ക്ക് അടുത്താണ് സംഭവം. വെടിവെപ്പിൽ ആർക്കും പരിക്കില്ല. എന്നാൽ, കാറിന്റെ ടയറുകൾ പഞ്ചറായി. മീററ്റിലെ കിതോറിൽ തിരഞ്ഞെടുപ്പ് പരിപാടിരക്ക് ശേഷം ഡൽഹിക്ക് മടങ്ങുകയായിരുന്നു ഒവൈസി. ഛാർജാസി ടോൾ പ്ലാസയ്ക്ക് അടുത്ത് വച്ച് രണ്ടുപേർ ഒവൈസിയുടെ വാഹനത്തിന് നേരേ നാല് റൗണ്ട് ബുള്ളറ്റുകൾ ഉതിർത്തു. അവർ നാല് പേരുണ്ടായിരുന്നുവെന്ന് ഒവൈസി പറഞ്ഞു. തന്റെ വാഹനത്തിന്റെ ടയറുകൾ പഞ്ചറായെന്നും താൻ മറ്റൊരു വാഹനത്തിൽ മടങ്ങിയെന്നും അദ്ദേഹം പറഞ്ഞു.

ടോൾ പ്ലാസയിൽ നിന്നുള്ള ദൃശ്യങ്ങൾ ഒവൈസി ട്വീറ്റ് ചെയ്തു. വെള്ള എസ് യുവിയിൽ ബുള്ളറ്റുകൾ കൊണ്ട് രണ്ട് തുളകൾ കാണാം. മൂന്നാമത്തെ ബുള്ളറ്റാണ് ടയറിൽ കൊണ്ടത്.

മറുനാടന്‍ മലയാളി

    മറുനാടന്‍ മലയാളി ബ്യൂറോ