ജിത് നായരുടെ പുതിയ പുസ്തകം 'പറഞ്ഞാലും തീരാത്ത കഥകള്‍' ബഹ്പ്രകാശനം ചെയ്തു
ചലച്ചിത്ര സംവിധായകനും എഴുത്തുകാരനുമായ അജിത് നായരുടെ പുതിയ പുസ്തകം 'പറഞ്ഞാലും തീരാത്ത കഥകള്‍' ബഹ്റൈനില്‍ പ്രകാശനം ചെയ്തു. പ്രശസ്ത സംവിധായകന്‍ ഹരിഹരന്‍, എഴുത്തുകാരന്‍ ബെന്യാമിന്‍ എന്നിവര്‍ അവതാരികയെഴുതിയ പുസ്തകമാണ് പ്രകാശനം ചെയ്തത്.
ബഹ്റൈന്‍ കേരളീയ സമാജം സാഹിത്യ വിഭാഗത്തിന്റെ ആഭിമുഖ്യത്തില്‍ സമാജം ബാബുരാജന്‍ ഹാളില്‍ നടന്ന ചടങ്ങില്‍ വിവിധ മേഖലകളിലെ പ്രമുഖരും സാഹിത്യപ്രേമികളും പങ്കെടുത്തു. കഥകള്‍, ഓര്‍മ്മക്കുറിപ്പുകള്‍, യാത്രാവിവരണങ്ങള്‍ എന്നിവ ഉള്‍പ്പെടുന്ന ഈ സമാഹാരം, ബാല്യത്തിന്റെ നിഷ്‌കളങ്കത, ഗള്‍ഫ് പ്രവാസികളുടെ ജീവിതാനുഭവങ്ങള്‍, ഒരു ചലച്ചിത്രകാരന്റെ കാഴ്ചപ്പാടുകള്‍ എന്നിവയിലേക്ക് വെളിച്ചം വീശുന്നു.
ചടങ്ങില്‍ പ്രമുഖ മാധ്യമ പ്രവര്‍ത്തകയും റേഡിയോ അവതാരകയുമായ രാജി ഉണ്ണികൃഷ്ണന്‍ പുസ്തകത്തെ പരിചയപ്പെടുത്തി. ബഹ്റൈന്‍ കേരളീയ സമാജം പ്രസിഡന്റ് പി.വി. രാധാകൃഷ്ണ പിള്ള പുസ്തകത്തിന്റെ പ്രകാശനം നിര്‍വഹിച്ചു. സമാജം ജനറല്‍ സെക്രട്ടറി വര്‍ഗീസ് കാരയ്ക്കല്‍ ആദ്യ കോപ്പി ഏറ്റുവാങ്ങി.
തുടര്‍ന്ന് സോമന്‍ ബേബി, ഡോ. ബാബു രാമചന്ദ്രന്‍, പ്രദീപ് പുറവങ്കര , പ്രേംജിത്ത്, പ്രദീപ് പത്തേരി, മോഹിനിതോമസ്, പ്രശാന്ത്, ആശാ രാജീവ്, ബാലചന്ദ്രന്‍ കൊന്നക്കാട്, കൃഷ്ണകുമാര്‍ പയ്യന്നൂര്‍, പ്രവീണ വിമല്‍ തുടങ്ങിയവര്‍ ആശംസകള്‍ നേര്‍ന്ന് സംസാരിച്ചു. അജിത് നായര്‍ മറുപടി പ്രസംഗം നടത്തി. ബഹ്റൈനിലെ പ്രവാസി സമൂഹത്തിന്റെ സജീവമായ സാഹിത്യാഭിരുചിയെ വിളിച്ചോതുന്നതായിരുന്നു പുസ്തക പ്രകാശന ചടങ്ങ്.
കേരളീയ സമാജം സാഹിത്യവിഭാഗം സെക്രട്ടറി വിനയചന്ദ്രന്‍ നായര്‍ സ്വാഗതം പറഞ്ഞ ചടങ്ങില്‍ സാഹിത്യവേദി കണ്‍വീനര്‍ സന്ധ്യ ജയരാജ് നന്ദി രേഖപ്പെടുത്തി.
