ഇന്ത്യന്‍ സ്‌കൂള്‍ ആലേഖ് ചിത്രകലാ മത്സര രജിസ്ട്രേഷന് മികച്ച പ്രതികരണം
മനാമ: ഇന്ത്യന്‍ സ്‌കൂള്‍ സംഘടിപ്പിക്കുന്ന ആലേഖ് '25 ഇന്റര്‍-സ്‌കൂള്‍ ചിത്രകലാ മത്സരത്തിനായുള്ള രജിസ്ട്രേഷന് ആവേശജനകമായ പ്രതികരണം. ഇന്ത്യന്‍ സ്‌കൂളിന്റെ പ്ലാറ്റിനം ജൂബിലി പതിപ്പായ ആലേഖിനായി ഇതിനകം രാജ്യത്തുടനീളമുള്ള സ്‌കൂളുകളില്‍ നിന്നും ആയിരത്തോളം വിദ്യാര്‍ഥികള്‍ രജിസ്റ്റര്‍ ചെയ്തുകഴിഞ്ഞു. രജിസ്ട്രേഷനുള്ള അവസാന തിയ്യതി ഏപ്രില്‍ 22ലേക്ക് നീട്ടിയിട്ടുണ്ട്.
മത്സരത്തില്‍ അന്തിമ പങ്കാളിത്തം 3,000 കവിയുമെന്ന് പ്രതീക്ഷിക്കുന്നു. ഇന്ത്യന്‍ സ്‌കൂളിന്റെ ഒരു വര്‍ഷം നീണ്ടുനില്‍ക്കുന്ന പ്ലാറ്റിനം ജൂബിലി ആഘോഷങ്ങളുടെ ഭാഗമായി സംഘടിപ്പിക്കുന്ന ആലേഖ് '25 ഏപ്രില്‍ 24, 25 തീയതികളില്‍ സ്‌കൂളിന്റെ ഇസ ടൗണ്‍ കാമ്പസിലാണ് നടക്കുക. ഈ വര്‍ഷത്തെ മത്സരം 5 മുതല്‍ 18 വരെ പ്രായമുള്ള വിദ്യാര്‍ത്ഥികളെ നാലു വിഭാഗങ്ങളായി തിരിച്ചാണ് നടത്തുന്നത്: ദൃശ്യ, വര്‍ണ്ണ, സൃഷ്ടി, പ്രജ്ഞ എന്നിവയാണ് ഈ ഗ്രൂപ്പുകള്‍. മത്സരത്തില്‍ രജിസ്റ്റര്‍ ചെയ്യാനുള്ള മികച്ച പ്രതികരണത്തില്‍ ജനറല്‍ കണ്‍വീനര്‍ ശശിധരന്‍ എം, കണ്‍വീനര്‍ ദേവദാസ് സി എന്നിവര്‍ സന്തോഷം പ്രകടിപ്പിച്ചു. ഇന്ത്യന്‍ സ്‌കൂളിന്റെ കലാപരമായ കഴിവുകളും സാംസ്‌കാരിക സമന്വയവും പ്രോത്സാഹിപ്പിക്കുന്നതിനുള്ള പ്രതിബദ്ധതയെയാണ് ഈ മികച്ച പ്രതികരണം സൂചിപ്പിക്കുന്നതെന്ന് അവര്‍ പറഞ്ഞു. ഏപ്രില്‍ 24നു വ്യാഴാഴ്ച വൈകുന്നേരം 6:00 മണിക്ക് ജഷന്‍മാല്‍ ഓഡിറ്റോറിയത്തില്‍ ഉദ്ഘാടന ചടങ്ങോടെ രണ്ട് ദിവസത്തെ ആഘോഷം ആരംഭിക്കും. തുടര്‍ന്ന് പ്രശസ്ത കലാകാരന്‍ മൊഹ്സെന്‍ അല്‍തൈതുണ്‍ നയിക്കുന്ന 6 മുതല്‍ 12 വരെ ക്ലാസുകളിലെ വിദ്യാര്‍ത്ഥികക്കുള്ള ഒരു പ്രത്യേക ശില്‍പനിര്‍മ്മാണ ശാല നടക്കും. മൂന്ന് മണിക്കൂര്‍ നീണ്ടുനില്‍ക്കുന്ന ശില്പകലാ ശാല വിദ്യാര്‍ത്ഥികള്‍ക്ക് ശില്‍പ കല പര്യവേക്ഷണം ചെയ്യാനുള്ള അപൂര്‍വ അവസരമായിരിക്കും. ഏപ്രില്‍ 25നു വെള്ളിയാഴ്ച പ്രധാന പെയിന്റിംഗ് മത്സരം നടക്കും. വിദ്യാര്‍ത്ഥികള്‍ക്ക് അവരുടെ വിഷയങ്ങള്‍ വേദിയില്‍ നല്‍കും. രാവിലെ 10മണി മുതല്‍ ഉച്ചയ്ക്ക് 1 മണി വരെ നടക്കുന്ന ആര്‍ട്ട് വാള്‍, മുതിര്‍ന്ന കലാകാരന്മാര്‍ക്ക് അവരുടെ സര്‍ഗ്ഗാത്മകത പ്രദര്‍ശിപ്പിക്കുന്നതിനായി അവസരമേകും. ആര്‍ട്ട് വാളിനുള്ള രജിസ്ട്രേഷന് അന്ന് രാവിലെ 9മണിക്ക് ആരംഭിക്കും. ഏപ്രില്‍ 25ന് വൈകുന്നേരം 6:30 ന് സമാപന ചടങ്ങും സമ്മാന വിതരണവും നടക്കും.
* സ്‌കൂളുകള്‍ വഴി രജിസ്റ്റര്‍ ചെയ്യുന്നതിനുള്ള അവസാന തീയതി: ഏപ്രില്‍ 22, 2025
* എല്ലാ വിദ്യാര്‍ത്ഥികളും അവരുടെ സ്‌കൂള്‍ യൂണിഫോമും ഐഡിയും ധരിക്കണം
* മത്സര ഹാളിനുള്ളില്‍ മൊബൈല്‍ ഫോണുകള്‍ അനുവദനീയമല്ല
സ്‌കൂള്‍ ചെയര്‍മാന്‍ അഡ്വ. ബിനു മണ്ണില്‍ വറുഗീസ്, സെക്രട്ടറി വി. രാജപാണ്ഡ്യന്‍, ഭരണസമിതി അംഗങ്ങള്‍,പ്രിന്‍സിപ്പല്‍ വി.ആര്‍ പളനിസ്വാമി, പ്ലാറ്റിനം ജൂബിലി കമ്മിറ്റി ജനറല്‍ കണ്‍വീനര്‍ പ്രിന്‍സ് നടരാജന്‍ എന്നിവര്‍ കലാപരമായ കഴിവുകള്‍, സാംസ്‌കാരിക സമന്വയം, യുവ മനസ്സുകളുടെ അതിരുകളില്ലാത്ത സര്‍ഗ്ഗാത്മകത എന്നിവ പരിപോഷിപ്പിക്കാനുള്ള വേദിയാണിതെന്ന് പരിപാടിയെ വിശേഷിപ്പിച്ചു.
വിശദ വിവരങ്ങള്‍ക്കും രജിസ്ട്രേഷനും ബന്ധപ്പെടുക:
• സതീഷ് പോള്‍: +973 39813905
* ലേഖ ശശി: +973 39804126
* ഫഹീമ ബിന്‍ റജബ്: +973 33799916
മത്സരത്തില്‍ പങ്കെടുക്കാനാഗ്രഹിക്കുന്നവര്‍ താഴെ കൊടുത്ത ഗൂഗിള്‍ ഫോം പൂരിപ്പിച്ചു ഏപ്രില്‍ 22നകം സമര്‍പ്പിക്കുക: https://forms.gle/DZWXXD5GDFySLF5HA
