ആദ്യ ദിനത്തില്‍ 65 മത്സരങ്ങള്‍; ഇന്ത്യന്‍ സ്‌കൂള്‍ പ്ലാറ്റിനം ജൂബിലി ബാഡ്മിന്റണ്‍ ടൂര്‍ണമെന്റിന് ആവേശകരമായ തുടക്കം
മനാമ: ഇന്ത്യന്‍ സ്‌കൂള്‍ പ്ലാറ്റിനം ജൂബിലി ജൂനിയര്‍ ആന്‍ഡ് സീനിയര്‍ ഓപ്പണ്‍ ബാഡ്മിന്റണ്‍ ടൂര്‍ണമെന്റിന് ഉജ്ജ്വല തുടക്കം. ആദ്യ ദിനത്തില്‍ ആവേശകരമായ 65 മത്സരങ്ങള്‍ അരങ്ങേറി.ഇന്ത്യന്‍ സ്‌കൂള്‍ (ഐഎസ്ബി) ഇസാ ടൗണ്‍ കാമ്പസിലെ ജഷന്മാള്‍ ഓഡിറ്റോറിയത്തില്‍ ഒരുക്കിയ അന്താരാഷ്ട്ര നിലവാരമുള്ള ബാഡ്മിന്റണ്‍ കോര്‍ട്ടിലാണ് മത്സരങ്ങള്‍ നടക്കുന്നത്. സ്‌കൂളിന്റെ ഒരു വര്‍ഷം നീണ്ടുനില്‍ക്കുന്ന പ്ലാറ്റിനം ജൂബിലി ആഘോഷങ്ങളുടെ ഭാഗമായി നടക്കുന്ന ടൂര്‍ണമെന്റില്‍ 350-ലധികം കളിക്കാര്‍ രജിസ്റ്റര്‍ ചെയ്തിട്ടുണ്ട്. അഞ്ച് ദിവസങ്ങളിലായി 400-ലധികം മത്സരങ്ങള്‍ നാലു കോര്‍ട്ടുകളിലായി നടക്കും. ഇന്ത്യന്‍ സ്‌കൂള്‍ ചെയര്‍മാന്‍ അഡ്വ. ബിനു മണ്ണില്‍ വറുഗീസ് ടൂര്‍ണമെന്റ് ഉദ്ഘാടനം ചെയ്തതായി പ്രഖ്യാപിച്ചു.
നാഷണല്‍ ട്രേഡിംഗ് ഹൗസ് മാനേജിംഗ് ഡയറക്ടര്‍ ദിലീപ് സി താക്കര്‍, ബഹ്റൈന്‍ നാഷണല്‍ ബാഡിംന്റണ്‍ ടീം കോച്ച് അഹമ്മദ് അല്‍ ജല്ലാദ്, സ്‌കൂള്‍ സെക്രട്ടറി വി. രാജപാണ്ഡ്യന്‍, വൈസ് ചെയര്‍മാനും സ്‌പോര്‍ട്‌സ് അംഗവുമായ ഡോ. മുഹമ്മദ് ഫൈസല്‍, ഫിനാന്‍സ് ആന്‍ഡ് ഐടി അംഗം ബോണി ജോസഫ്, പ്രിന്‍സിപ്പല്‍ വി.ആര്‍ പളനിസ്വാമി, ജൂനിയര്‍ വിംഗ് പ്രിന്‍സിപ്പല്‍ പമേല സേവ്യര്‍, സീനിയര്‍ സ്‌കൂള്‍ ആന്‍ഡ് അക്കാദമിക് അഡ്മിനിസ്‌ട്രേഷന്‍ വൈസ് പ്രിന്‍സിപ്പല്‍ ജി സതീഷ്, ജൂനിയര്‍ വിംഗ് വൈസ് പ്രിന്‍സിപ്പല്‍ പ്രിയ ലാജി, സ്റ്റാഫ് പ്രതിനിധി പാര്‍വതി ദേവദാസ്, പ്ലാറ്റിനം ജൂബിലി കമ്മിറ്റി ജനറല്‍ കണ്‍വീനര്‍ പ്രിന്‍സ് എസ് നടരാജന്‍, മുന്‍ ഇ.സി സെക്രട്ടറി സജി ആന്റണി, മുന്‍ ഭരണസമിതി അംഗങ്ങളായ (സ്‌പോര്‍ട്‌സ്) രാജേഷ് എംഎന്‍, അജയകൃഷ്ണന്‍ വി, ടൂര്‍ണമെന്റ് ഡയറക്ടര്‍ ബിനു പാപ്പച്ചന്‍, റഫറി ഷനില്‍ അബ്ദുള്‍ റഹിം (ബാഡ്മിന്റണ്‍ ഏഷ്യ), ജനറല്‍ കണ്‍വീനര്‍ ആദില്‍ അഹമ്മദ്, കോര്‍ഡിനേറ്റര്‍ ബിനോജ് മാത്യു എന്നിവര്‍ ഉദ്ഘാടന ചടങ്ങില്‍ പങ്കെടുത്തു.
ബഹ്റൈന്‍ ബാഡ്മിന്റണ്‍ ആന്‍ഡ് സ്‌ക്വാഷ് ഫെഡറേഷന്റെ (ബിബിഎസ്എഫ്) അനുമതിയോടെ നടക്കുന്ന ഈ പ്രധാന കായിക മത്സരം രാജ്യത്തെ ഏറ്റവും വലിയ ബാഡ്മിന്റണ്‍ ടൂര്‍ണമെന്റുകളില്‍ ഒന്നാണ്. ബഹ്റൈന്‍, സൗദി അറേബ്യ, കുവൈറ്റ് ഉള്‍പ്പെടെ ജി.സി.സി രാജ്യങ്ങളില്‍ നിന്നുള്ള പ്രമുഖ കളിക്കാര്‍ മത്സരത്തില്‍ പങ്കെടുക്കുന്നു. ടൂര്‍ണമെന്റില്‍ 39 ഇനങ്ങള്‍ ഉള്‍പ്പെടുന്നു, അതില്‍ U9 മുതല്‍ U19 വരെ പ്രായപരിധിയിലുള്ള ആണ്‍കുട്ടികളുടെയും പെണ്‍കുട്ടികളുടെയും സിംഗിള്‍സ്, ഡബിള്‍സ്, പുരുഷ ഡബിള്‍സ് (എലൈറ്റ്, ചാമ്പ്യന്‍ഷിപ്പ്, F1-F5), വനിതാ ഡബിള്‍സ് (ലെവലുകള്‍ 1 & 2), മിക്‌സഡ് ഡബിള്‍സ് (ലെവലുകള്‍ C, 1 & 2) എന്നിവ ഉള്‍പ്പെടുന്നു. എല്ലാ മത്സരങ്ങളും നോക്കൗട്ട് ഫോര്‍മാറ്റിലാണ് നടക്കുക. ബാഡ്മിന്റണ്‍ വേള്‍ഡ് ഫെഡറേഷന്‍ നിയമങ്ങള്‍ കര്‍ശനമായി പാലിക്കുകയും സര്‍ട്ടിഫൈഡ് അമ്പയര്‍മാര്‍ കളി നിയന്ത്രിക്കുകയും ചെയ്യുന്നു.മെയ് 10ന് നടക്കുന്ന സമാപന ചടങ്ങില്‍ ഓരോ വിഭാഗത്തിലെയും വിജയികള്‍ക്ക് ക്യാഷ് പ്രൈസുകളും ട്രോഫികളും സമ്മാനിക്കും.
എല്ലാ പങ്കാളികള്‍ക്കും അവരുടെ പങ്കാളിത്തത്തെ അംഗീകരിക്കുന്ന ഡിജിറ്റല്‍ സര്‍ട്ടിഫിക്കറ്റുകള്‍ ലഭിക്കും. ഇന്ത്യന്‍ സ്‌കൂള്‍ പ്ലാറ്റിനം ജൂബിലി ആഘോഷങ്ങളില്‍ സുപ്രധാനമായ കായിക മത്സരമാണ് ഈ ഓപ്പണ്‍ ടൂര്‍ണമെന്റ്. സ്‌കൂള്‍ ചെയര്‍മാന്‍ അഡ്വ. ബിനു മണ്ണില്‍ വറുഗീസ്,സെക്രട്ടറി വി. രാജപാണ്ഡ്യന്‍, ഭരണസമിതി അംഗങ്ങള്‍, പ്രിന്‍സിപ്പല്‍ വി.ആര്‍ പളനിസ്വാമി, പ്ലാറ്റിനം ജൂബിലി ജനറല്‍ കണ്‍വീനര്‍ പ്രിന്‍സ് എസ് നടരാജന്‍ എന്നിവര്‍ കായിക പ്രേമികളെയും വിശാലമായ സമൂഹത്തെയും മത്സരങ്ങളില്‍ പങ്കെടുക്കാനും ഈ ചരിത്രപരമായ ആഘോഷത്തിന്റെ ഭാഗമാകാനും സ്‌നേഹപൂര്‍വ്വം ക്ഷണിച്ചു.
