കര്ണാടകയില് ഇനി ബൈക്ക് ടാക്സികള്ക്ക് ഓടാം; ബൈക്ക് ടാക്സികള്ക്ക് ഏര്പ്പെടുത്തിയിരുന്ന വിലക്ക് നീക്കി ഹൈക്കോടതി; വിധി സ്വാഗതം ചെയ്ത് കര്ണാടക ബൈക്ക് ടാക്സി വെല്ഫെയര് അസോസിയേഷന്
ബംഗളൂരു: സംസ്ഥാനത്തെ ബൈക്ക് ടാക്സി സേവനങ്ങള്ക്കുള്ള നിരോധനം നീക്കി കര്ണാടക ഹൈക്കോടതി. വാഹനങ്ങള് ട്രാന്സ്പോര്ട്ട് വാഹനങ്ങളായി രജിസ്റ്റര് ചെയ്യാനും കരാര് അടിസ്ഥാനത്തില് സര്വീസ് നടത്താനും അനുമതി നല്കണമെന്ന് കോടതി നിര്ദേശിച്ചു. നിലവിലുള്ള അഗ്രിഗേറ്റര്മാര്ക്ക് പുതിയ അപേക്ഷകള് സമര്പ്പിക്കാനും സ്വാതന്ത്ര്യമുണ്ടെന്ന് കോടതി പറഞ്ഞു.
ഓണ്ലൈന് ടാക്സി പ്ലാറ്റ്ഫോമുകളായ ഓല, ഊബര്, റാപ്പിഡോ തുടങ്ങിയ അഗ്രിഗേറ്ററുകള് സമര്പ്പിച്ച അപ്പീലുകള് ചീഫ് ജസ്റ്റിസ് വിഭു ബഖ്രു, ജസ്റ്റിസ് സി.എം. ജോഷി എന്നിവര് അധ്യക്ഷരായ ഡിവിഷന് ബെഞ്ചാണ് പരിഗണിച്ചത്. നിയമപരമായ അനുമതിക്ക് വിധേയമായി ബൈക്കുകളെ യാത്രാവാഹനങ്ങളായി ഉപയോഗിക്കാമെന്ന് കോടതി വിധി പുറപ്പെടുവിച്ചു. വാഹന രജിസ്ട്രേഷനും പെര്മിറ്റ് നല്കുന്നതിനും ബന്ധപ്പെട്ട ഉദ്യോഗസ്ഥര്ക്ക് പരിശോധന നടത്താം. എന്നാല്, മോട്ടോര് സൈക്കിളുകള് ട്രാന്സ്പോര്ട്ട് വാഹനങ്ങളായി ഓടിക്കാന് കഴിയില്ല എന്ന കാരണത്താല് ഇത് നിഷേധിക്കാന് പാടില്ല. റീജിയണല് ട്രാന്സ്പോര്ട്ട് അതോറിറ്റിക്ക് നിയമപരമായി ആവശ്യമായ വ്യവസ്ഥകള് പെര്മിറ്റുകളില് ഉള്പ്പെടുത്താം. മോട്ടോര് വാഹന നിയമം സെക്ഷന് 74(2) പ്രകാരം, നിലവിലുള്ള അഗ്രിഗേറ്റര്മാരുടെ അപേക്ഷകള് പരിഗണിച്ച് ഉചിതമായ ഉത്തരവുകള് പുറപ്പെടുവിക്കണമെന്നും ഹൈക്കോടതി സംസ്ഥാന സര്ക്കാരിനോട് നിര്ദേശിച്ചു.
മോട്ടോര് വാഹന നിയമപ്രകാരം ബൈക്ക് ടാക്സി പ്രവര്ത്തനങ്ങള്ക്ക് ദീര്ഘകാലമായി നിലനിന്നിരുന്ന നിയമപരമായ അവ്യക്തതകള്ക്ക് വ്യക്തത നല്കുന്നതാണ് കര്ണാടക ഹൈക്കോടതിയുടെ ചരിത്രപരമായ വിധിയെന്ന് കര്ണാടക ബൈക്ക് ടാക്സി വെല്ഫെയര് അസോസിയേഷന് (BTA) വ്യക്തമാക്കി. ആറ് ലക്ഷത്തോളം ബൈക്ക് ടാക്സി റൈഡര്മാരുടെ
ഉപജീവനാവകാശം ഉറപ്പാക്കിയ ചരിത്രപരമായ ഹൈക്കോടതി വിധിയെന്നും ബിടിഎ അഭിപ്രായപ്പെട്ടു. വര്ഷങ്ങളായി കര്ണാടകയിലുടനീളമുള്ള ബൈക്ക് ടാക്സി റൈഡര്മാര് നിയമത്തിന്റെ വ്യത്യസ്ത വ്യാഖ്യാനങ്ങള്ക്കും നിയന്ത്രണപരമായ അനിശ്ചിതത്വങ്ങള്ക്കും ഇടയില് പ്രവര്ത്തിക്കേണ്ടിവന്നിരുന്നു, ഇത് നിരന്തരമായ തൊഴില് അസ്ഥിരതയ്ക്ക് കാരണമായി. ഈ വിധി ഭരണഘടനാപരമായ ഉപജീവനാവകാശത്തെ ശക്തമായി സ്ഥിരീകരിക്കുകയും, കര്ണാടകയിലെ തൊഴില് രംഗത്ത് ബൈക്ക് ടാക്സികളെ ഒരു പ്രധാന വരുമാന സ്രോതസ്സായി സംരക്ഷിക്കുകയും ചെയ്യുന്നു.
ഈ വിധിയിലൂടെ, ഗിഗ് സമ്പദ്വ്യവസ്ഥയെ ആശ്രയിച്ച് ഉപജീവനം കണ്ടെത്തുന്ന ആറ് ലക്ഷത്തിലധികം പൗരന്മാര്ക്ക് നിര്ണായകമായ നിയമപരമായ ഉറപ്പ് ലഭിച്ചിരിക്കുകയാണ്. യുവതൊഴിലാളികള്ക്കും കുടുംബങ്ങളുടെ പ്രധാന വരുമാനമാര്ഗമായി ഈ മേഖലയെ ആശ്രയിക്കുന്നവര്ക്കും മാന്യവും നിയമപരവും സുസ്ഥിരവുമായ തൊഴില് ഉറപ്പാക്കുന്നതാണ് ഈ വിധി. സംസ്ഥാനത്തിന്റെ തൊഴില് ഘടനയില് ബൈക്ക് ടാക്സികള് വഹിക്കുന്ന പങ്ക് കോടതി വ്യക്തമായി അംഗീകരിച്ചിരിക്കുന്നു.
മോട്ടോര് വാഹന നിയമത്തിന്റെയും അനുബന്ധ ചട്ടങ്ങളുടെയും കീഴില് ബൈക്ക് ടാക്സി പ്രവര്ത്തനങ്ങള് കോടതി ഔദ്യോഗികമായി അംഗീകരിച്ചിരിക്കുകയാണ്.
മോട്ടോര്സൈക്കിളുകള്ക്ക് കോണ്ട്രാക്ട് കാരേജ് പെര്മിറ്റുകള് അനുവദിക്കുന്നതില് യാതൊരു നിയമപരമായ തടസ്സവുമില്ലെന്ന് വിധി വ്യക്തമായി അടിവരയിടുന്നു. ഇതോടെ, ഇതുവരെ ഈ വ്യവസായത്തിന്റെ ഭാവിയെ ഭീഷണിപ്പെടുത്തിയിരുന്ന പ്രധാന നിയന്ത്രണങ്ങള് നീക്കം ചെയ്യപ്പെട്ടിരിക്കുകയാണ്. താങ്ങാനാവുന്ന വിലയില് അവസാന മൈല് കണക്റ്റിവിറ്റി തേടുന്ന യാത്രക്കാര്ക്കും സ്ഥിരതയുള്ളതും വളര്ച്ചയ്ക്ക് അനുകൂലവുമായ ഒരു നിയന്ത്രണാന്തരീക്ഷം ആവശ്യപ്പെടുന്ന പ്ലാറ്റ്ഫോം ഓപ്പറേറ്റര്മാര്ക്കും ഉള്പ്പെടെ എല്ലാ പങ്കാളികള്ക്കും ഈ നിര്ണായക ചുവടുവെപ്പ് ഗുണകരമാണെന്ന് അസോസിയേഷന് വ്യക്തമാക്കി.
വിധിയെ സ്വാഗതം ചെയ്തുകൊണ്ട് കര്ണാടക ബൈക്ക് ടാക്സി വെല്ഫെയര് അസോസിയേഷന് പ്രസിഡന്റ് ആദി നാരായണ പറഞ്ഞു: ''കര്ണാടകയിലുടനീളമുള്ള ലക്ഷക്കണക്കിന്റൈഡര്മാര്ക്ക് ഈ വിധി ഒരു പുതുജീവനാണ്. മോട്ടോര്സൈക്കിള് പെര്മിറ്റുകളുടെ സാധുത
അംഗീകരിച്ചുകൊണ്ട്, നമ്മുടെ കഠിനാധ്വാനികളായ റൈഡര്മാരുടെ തൊഴില്മാന്യതയെ ഹൈക്കോടതി ശക്തമായി ഉറപ്പിച്ചിരിക്കുകയാണ്. അനവധി കുടുംബങ്ങളുടെ ഉപജീവനത്തിന് ആവശ്യമായ നിയമസ്ഥിരത ഈ വിധി നല്കുന്നു, കൂടാതെ യുവജനങ്ങള്ക്ക് അര്ത്ഥവത്തായ തൊഴില് അവസരങ്ങള് വികസിപ്പിക്കാനും ഇത് വഴിയൊരുക്കുന്നു. ഇനി റൈഡര്മാര്ക്ക് ആത്മവിശ്വാസത്തോടെ മുന്നോട്ട് പോകാന് സാധിക്കും.''
സംസ്ഥാനത്തിന്റെ ഗതാഗത സംവിധാനത്തിന് നിര്ണായക പിന്തുണ നല്കുന്ന തൊഴിലാളി സമൂഹത്തിന് ഈ വിധി അഭിമാനവും ആത്മവിശ്വാസവും പുനഃസ്ഥാപിക്കുന്നു. ബൈക്ക് ടാക്സി സേവനം ഒരു മാന്യവും നിയമപരവുമായ തൊഴില് മേഖലയാണെന്ന സുതാര്യമായ സ്ഥിരീകരണമാണ് ഇത്. സര്ക്കാരുമായും നിയന്ത്രണ അധികാരികളുമായും സഹകരിച്ച് സുരക്ഷിതവും നിയമാനുസൃതവുമായ പ്രവര്ത്തനങ്ങള് ഉറപ്പാക്കുന്നതിനും പൊതുതാല്പര്യത്തിന്അ നുയോജ്യമായ സുസ്ഥിര ഗതാഗത പരിഹാരങ്ങള് മുന്നോട്ട് കൊണ്ടുപോകുന്നതിനും BTA തുടര്ന്നും പ്രതിജ്ഞാബദ്ധമാണെന്ന് അസോസിയേഷന്അറിയിച്ചു.
