ആദിവാസികളുടെ ആരോഗ്യ സംരക്ഷണത്തിനായി ''സമാശ്വാസം'' ടെലിമെഡിസിന്‍ പദ്ധതിയുമായി അമൃത ആശുപത്രി
കൊച്ചി : സംസ്ഥാനത്തെ ആദിവാസികളുടെ ആരോഗ്യ സംരക്ഷണം ലക്ഷ്യമാക്കി അമൃത ആശുപത്രി നടപ്പാക്കുന്ന ടെലിമെഡിസിന്‍ പദ്ധതിയായ ''സമാശ്വാസം'' പദ്ധതിക്ക് തുടക്കമായി. ആധുനിക ചികിത്സ സംവിധാനങ്ങള്‍ കുറവുള്ള വയനാട്ടിലെ മുട്ടിലും, വള്ളിയൂര്‍ക്കാവിലും നടപ്പാക്കി തുടങ്ങിയ പദ്ധതി ആദിവാസി വിഭാഗങ്ങള്‍ കൂടുതലായുള്ള സംസ്ഥാനത്തെ വിവിധ ഭാഗങ്ങളില്‍ നടപ്പാക്കാനാണ് ഉദേശിക്കുന്നത്.
ദീര്‍ഘകാല ശ്വാസകോശ രോഗങ്ങള്‍ കണ്ടെത്തി ചികിത്സിക്കുക എന്നതാണ് സമാശ്വാസം പദ്ധതിയുടെ പ്രധാന ലക്ഷ്യം. കൂടാതെ വനവാസികള്‍ക്കിടയിലുള്ള ക്ഷയരോഗമടക്കം കണ്ടെത്തി ചികിത്സ ഉറപ്പാക്കുന്നതിനൊപ്പം ശ്വാസകോശ പുനരധിവാസ ചികിത്സയും പുകയില ഉപയോഗ നിയന്ത്രണ ചികിത്സയും പദ്ധതിയുടെ ലക്ഷ്യമാണ്. ശ്വാസകോശ പ്രവര്‍ത്തന ക്ഷമത വര്‍ദ്ധിപ്പിക്കാന്‍ പ്രാണധാര എന്ന ടെലിമെഡിസിന്‍ യോഗയും പദ്ധതിയുടെ ഭാഗമായി നടപ്പാക്കും.
ഇസ്രോയുമായി സഹകരിച്ച് മുമ്പ് നടപ്പാക്കിയ ടെലിമെഡിസിന്‍ പദ്ധതി കൂടുതല്‍ സാങ്കേതിക തികവോടെയാണ് ഇപ്പോള്‍ അമൃത ആശുപത്രി നടപ്പാക്കുന്നത്. പദ്ധതിയുടെ ഉദ്ഘാടനം കൊച്ചി അമൃത ആശുപത്രി ടെലിമെഡിസില്‍ വകുപ്പ് മേധാവിയും അമൃത വിശ്വ വിദ്യാപീഠം അസോസിയേറ്റ് ഡീനുമായ ഡോ. ഡി. എം. വാസുദേവന്‍ നിര്‍വ്വഹിച്ചു.
ബ്രഹ്മചാരിണി ദീക്ഷിതാമൃത ചൈതന്യ അനുഗ്രഹ പ്രഭാഷണം നടത്തി. സമാശ്വാസം പ്രോജക്റ്റ് ലീഡ് ഡോ. അഖിലേഷ് പദ്ധതി വിശദീകരിച്ചു. കൊച്ചി അമൃത ആശുപത്രി അഡീഷ്ണല്‍ മെഡിക്കല്‍ സൂപ്രണ്ട് ഡോ. കെ. വി. ബീന, അമൃത സ്‌കൂള്‍ ഓഫ് മെഡിസിന്‍ വൈസ് പ്രിന്‍സിപ്പല്‍ ഡോ. ആനന്ദ് കുമാര്‍, ഡോ. സി. ശ്രീകുമാര്‍, ഡോ. സിബി ഗോപിനാഥ്, ഡോ. വിവേക് നമ്പ്യാര്‍, ഡോ. അസ്മിത മെഹ്ത, ഡോ, ഉണ്ണികൃഷ്ണന്‍, ഡോ. മുരളി ദാമോദര്‍, ഡോ. ശിവകുമാര്‍, ഡോ. മംഗളാനന്ദന്‍ ടി. എസ് , ഡോ. കണ്ണോത്ത് ശ്രീകുമാര്‍, ഡോ. പ്രീതി, എം. വി. രജീഷ് തുടങ്ങിയവര്‍ പങ്കെടുത്തു.
